Осыдан 20 жыл бұрын Қазақстан өз тарихында тұңғыш рет тәуелсіз мемлекет ретінде жазғы Олимпиада ойындарына қатысқан болатын.
Төрткүл дүниенің теңдессіз спортшылары жиналған жарыста жасындай жарқырап, қасиетті Көк туымызды Америка көгінде желбіреткен өрендеріміздің бірі әрі бірегейі еркін күрес өнерінің хас шебері Мәулен Мамыров еді.
1996 жылғы Атланта Олимпиадасында Мәулен қола медальді мойнында жарқыратты. Одан бөлек, қазақтың қайсар ұлы әр жылдары әлем чемпионатының қола жүлдегері, Азия ойындарының жеңімпазы, Азия чемпионы атанды. Сондай-ақ басқа да көптеген аса ірі халықаралық жарыстарда топ жарған Мамыров Алаш жұртының мақтан тұтар азаматына айналды. Бозкілеммен қош айтысқаннан кейін де атақты балуан өзінің сүйікті ісінен қол үзген жоқ. Бұл күндері ол Алматы облыстық Олимпиада ізбасарларын даярлау орталығының директоры қызметін атқаруда.
Міне, осы мерейлі күнге орай Алакөл ауданының Лепсі ауылында Мәулен Мамыровтың жүлдесі үшін еркін күрестен жасөспірімдер арасындағы республикалық турнирдің тұсауы кесілді. Осы жарыстың ашылу салтанатына той иесінен бөлек, грек-рим күресінен Бейжің Олимпиадасы мен әлем чемпионатының қола жүлдегері Нұрбақыт Теңізбаев, Алматы облысы күрес түрлері федерациясының вице-президенті Алтай Танабаев, мүмкіндігі шектеулі спортшыларға арналған спорт клубының директоры Ерлан Бақтыбаев, Қазақстан Республикасының еңбек сіңірген жаттықтырушысы Аман Бұғыбаев, еркін күрестен ел чемпионы Самат Айтқожин және тағы басқа да саңлақтар қатысты.
– Жетісу өңірінен спорт саңлақтарының көптеп шыққанын жанкүйерлер жақсы біледі. Ал сол саңлақтарға құрмет пен қошемет көрсету біздің парызымыз. Жасыратыны жоқ, талай жақсылар мен жайсаңдардың есімдері уақыт озған сайын ұмыт болып барады. Көптеген жерлестеріміздің спорттық аренадағы ерлігі жайында кейінгі жастар көп біле бермейді. Осы жағы бізді көптен бері қатты мазалап жүрген еді. Байрақты бәсекелерде ел намысын абыройлы қорғаған азаматтардың есімдерін өскелең ұрпаққа үлгі ету үшін өзіміздің жерлесіміз, қазақтың атымтай жомарты, Республикалық бокс және күрес федерацияларының вице-президенті, «ЖерСу» корпорациясы бақылау кеңесінің төрағасы Бауыржан Оспанов мырзаның мұрындық болуымен табиғаты тамаша, көркіне көз тоймайтын Лепсі ауылында осындай дүбірлі доданың тұсауы кесілді. Бүгін біз Мәулен Мамыровтың жүлдесі үшін жарыс ұйымдастырдық. Бұл бәсеке көпшілік көңілінен шықты деген ойдамыз. Алайда, осы шарамен ғана шектеліп қалмаймыз. Алдағы күндері «Жетісу жұлдыздары» деген циклмен кәсіпқой рингте қарсыластарын қоғадай жапырып жүрген боксшы Қанат Ислам, грек-рим күресінің хас шебері Нұрбақыт Теңізбаев, татамидің тарланбозына айналған қос дзюдошы – Айдын Смағұлов пен Асхат Житкеевтің де құрметіне керемет турнирлер өткізуді көздеп отырмыз, – дейді осы жарыстың ұйымдастырушысы, самбодан әлем біріншілігінің қола жүлдегері, қазақ күресінен талай дүбірлі додада түйе балуан атанған Сержан Омаров.
Жоңғар Алатауының етегінде Мәулен Мамыровтың құрметіне өткен жарыстың қорытындысы бойынша Лепсі ауылындағы спорттағы дарынды балаларға арналған облыстық мамандандырылған мектеп-интернатының филиалы бірінші орын алса, Кербұлақ ауданы мен Алматы қаласы командалары екінші және үшінші орындарды өзара бөлісті. Осы бәсекелер барысында ерекше көзге түскен Әлімбек Полатов «Ең үздік техникасы үшін» жүлдесімен марапатталса, Батырхан Ноянов «Жеңіске деген жігері үшін» деп аталатын арнайы сыйлыққа ие болды.
Ғалым Сүлеймен.