Аудан өзінің көлдерімен әйгілі. Сасықкөл, Қоржынкөл, Қошқаркөл, Жалаңашкөл көлдерінің тоғысқан торабы Алакөлмен астасады. Тауларында арқар, тауешкі, марал, аю, барыс мекендесе, құмды жерлерінде ақбөкендер жортып жүреді. Бал татыған балықтарының өзі аса жоғары сұранысқа ие.

Ауданның негізгі байлығы – балық. Оны аулау үшін арнайы комбинаттар құрылып, бірнеше шаруа қожалықтары жұмыс істейді. Бұдан бөлек, өсімдіктер дүниесінің алуан түрі бар. Жанға шипа дәрілік шөптердің бірсыпырасын да осы жақтан табасыз.

Аяғымның астында жатса ғалам, – деп жырлаған Сәкеннің сөзден сарай тұрғызған жыры талайды таңдай қақтырған. Расында, айдынды Алакөлді ақ шағаласыз елестету ешбір қисынға келмейді.

Елбасы Үшарал шаһарына келген кезінде туризмді дамыту керектігін ерекше атап өтті. Алтай мен Алатаудың асқарынан, Бурабай мен Алакөл жағасынан шетелдік туристерді көріп қалатынымыз жасырын емес. Өйткені қызығушылық бар. Тек соны дамытудың амалын табуға тиістіміз. Оларға Альпі тауы, Жерорта теңізі сияқты жерлер жерұйық болудан қалып барады. Дәл осындай сәтте сұңғылалық танытып, туризмді дамытудағы мемлекеттік саясаттың мүддесін баршамыз түйсіне алсақ нұр үстіне нұр болары хақ.

Бұл – қаржыны қыр асырмай, туған өлкеңе құй деген тұспал ғой, бағамдай білсек. Өрістемеген өнердің өкініші көп деседі. Алдында тұрған асын, сауған сүтін сатуды ар көретін кеңпейіл ұлт болғанымыздан шығар, біз қонақүй, қоғамдық тамақтану, дәмхана сияқты қызмет көрсету түрімен тәуелсіздік алған соң ғана айналыса бастадық. Ендігі көзделген меже – отандық кәсіпкерлер, шағын және орта бизнестің өкілдері бұл саланың тасын өрге дөңгелетеді деген пайымдамыз. Жадымызда болса, жалпы демалушыларға  арналған қызмет түрі 2000 жылдан бері түзеле бастады. Яғни, көп бола қойған жоқ. 

«Қазірдің өзінде демалушылар саны 700 мыңнан асып жығылады. Бүгінде алакөлдіктер мыңғыртып мал, жайқалтып егін өсіріп, бау мен бақты желектендіріп, балық өнімдерін Еуропа асырып, табыс табуда. Айдын көл арқасында туризм де мемлекеттік кіріс тіректерінің біріне айналды. Алакөл көлінің маңайындағы елді мекендерде заман талабына сай демалыс орындары салынып, өз елімізді қоса алғанда, алыс-жақын шет мемлекеттерден келетін демалушылар саны да алға жылжыған жылдармен бірге артып келеді. Биыл туристердің көлге шаршамай-шалдықпай жетуін қамтамасыз ету үшін жайлы автобустармен бірге, жолаушылар пойызы қатынасы жолға қойылды. Былтыр заманауи әуежай салынып, ұшақ қатынайтын болды», –  дейді аудан басшысы  Ә. Жа- қанбаев.

Алатау мен Тарбағатайды, Жетісу мен Арқаны тел емген төлдей Алакөл жазық даланы жастанып, бейнебір Балқаштан бөлініп шығып, Жоңғар Алатауының қойнына қотарыла көшкендей бұл мекен қашанда қараша үйдің түндігіндей жылы көрінері рас. Мидай ашыған мимырт тірліктен бірқауым тояттағыңыз немесе рахаттың не екенін сезінгіңіз келсе, киелі құт мекенге ат басын бұрыңыз. Өйткені, ол Жаратқанның берген жердегі жұмағы.