Оқи отырыңыз
Кеген ауданы Саты ауылындағы А.Түркебаев атындағы орта мектептің 2000 жылғы түлектері «Saty.Bilim.Tulek» жобасын іске қосты.
Ағарту, ақпарат тарату бағытын қамтыған жоба аясында ауылдың ақпараттық-танымдық «isaty.kz» сайты ашылып, мектеп түлегі, білікті дәрігер Қуаныш Ендеев атындағы стипендия тағайындалды. Сондай-ақ, мектеп оқушыларына білім, мамандық таңдау туралы дәріс өткізілді. Түлектер бұл жобаны сыныптастары Қуаныш Ендеевті еске алып, ол бастаған игі істерді жалғастыру мақсатымен қолға алған. «Ауылымыз туристік өлке ретінде қарқынды дами бастады. Бірақ, ауыл туралы интернетте ақпарат табу қиын. Сондықтан арнайы ашылған сайтқа ауыл туралы барлық ақпаратты топтастырамыз. Және бұл жұмысқа мектеп оқушыларын тартамыз. Әр ай сайын сайтқа контент дайындап, көмектескен ең үздік 3 оқушыға сыныптасымыз Қ.Ендеев атындағы стипендияны беріп отырамыз», – дейді шараны ұйымдастырушылар. Ендеев Қуаныш Жеңісұлы 1983 жылы Кеген ауданы Саты ауылында дүниеге келген. А.Түркебаев атындағы орта мектептің түлегі. 2006 жылы С.Асфендияров атындағы Ұлттық медицина университетінің түлегі әскери госпитальда аға мейірбек, «Гүлдала» дәрігерлік амбулаториясына дәрігер-педиатр, Алматы көпсалалы клиникалық ауруханасына дәрігер-педиатр, дәрігер-невропатолог, хирургия бөлімінде дәрігер нейрохирург, КТ дәрігері болып қызмет істеді. Болашағынан үлкен үміт күттірген азамат 2017 жылы қайтыс болды. «Қуаныш өмірге, білімге құштар жан еді. Ол бастаған істер мен еңбегін жалғастыру мақсатымен өзі түлеп ұшқан мектеп оқушыларына бүгінгі заман талабына сай болуы үшін бағыт-бағдар беріп, Қуаныштың атындағы стипендияны тағайындадық», – дейді сыныптастары. Қ.Ендеев атындағы стипендияны оқу жылының соңына дейін А.Түркебаев атындағы орта мектептің 12 оқушысы алады. Жобаның үшінші бағыты аясында мектеп оқушыларына білім, медиа, коммуникация тақырыбына дәріс өткізілді. «Болашақта адамдардың өзара бәсекесінен гөрі жасанды интеллект, роботтармен бәсекеге түсетіні анық байқалады. Қазір әлем ауқымды трансформация кезеңіне аяқ басты. Дамыған елдерді айтпағанда біздің қоғамда да көрініс беріп отыр. Алдағы 5-10 жыл көлемінде мұны анық сеземіз. Сондықтан басты құндылық білім болады. Қазірден соған бейімделіп ІТ сынды сұранысқа ие мамандықтарға бағыттау керек. Біз өзіміз түлеп ұшқан мектеп оқушыларына соны жеткізіп, түсіндіріп, бағыт-бағдар бергіміз келді. Әрі ауыл сайтына контент дайындау арқылы оқушылар мұның алғышарттарын сезіне бастайды», – дейді ұйымдастырушылар.
Таныстырылым соңында дастарқан жайылып, марқұмның аруағына Құран бағышталды.
Әмір САНА
