Ақ пен қарасы қатар жалғанда жер басып жүрген жандардың да түр-түрі бар. Мен оны әр күннен алған қилы көріністерден, тоқсан тіршіліктің қат-қабатынан көрдім. Иә, білгенім замананың бүгінгі бейнесі. Адамдардың сан алуан мінезі. Жаратушымыздың пейілімен жұмыр жерге түскен пенделердің бірі ақкөңіл арайлы, екіншісі қан қақсатар талайды. Бірі шын жүрегімен жанашырлық танытады, енді бірі сырттай сыпайы болғанымен іштей арам оймен арытады. Осындай пиғылдардың кесірі көпке тиеді. Қаншама жүрек азап тартып, қаншама жанарға мұң ұялады. Бүгінде алдыңа күліп тұрып, артыңнан сөз айтатын, көзіңе мақтап, өзгеге даттайтын екіжүзділердің еселенгені өкінішті-ақ.
Самат бүгін үйінде. Тіршіліктің тауқыметі әбден тоздырып жіберген. Ол өзінің ойы. Әйтпесе киер киімі, ішер асы әрқашан алдынан табылады. Жұбайы Жанар да жолдасының тапқанын екі балаға жеткізіп, артылғанын жинап та қояды. Жұрттың алды болмаса, соңына түскендері көрінбейді. Бірақ қымбат көлік мініп, зәулім үй тұрғызған достарын қызғанатын Самат тез арада сол жағдайға жетуді мақсат тұтады. Соны ойлап-ақ азаннан кешке тозып отырады. Бүгін тағы көңілі суық, басы салбыраңқы. «Барынша беріліп істесең қызметіңді көтеремін» деген бастығының сөзі орындалмағанына күйініп отырған түрі бар жігіттің. Күйініп, кейіп, ренжіп қана қойса жөн болар. Бастығын жерден алып жерге салып, ышқынып отыр. «Айтқанын істемеген адам емес» – деп те айқайлап қояды. Алғаш арба сүйреуші ретінде жұмысқа қабылданып, жауапты адам лауазымына дейін көтерілгені де көкейінен шығып кетті осы сәт. Бастығы сол айтқандай жаман болса жігіттің жағдайын жасамас еді-ау. Самат ақшаның артынан еріп, қуысын бітеймін деп жүріп қанағатты жоғалтқанын жұбайы жақсы біледі. Бірақ оның қолынан келері сабырға шақырумен шектеледі. Жанында отырған досы Арман да бастығы жайлы өтірік-шыны аралас әңгімелерді ақтарып салды. Екеуі жабылып біреуді жамандаған түн де өтті. Таң атысымен күрсінген келбетін суық суға салып, жуынып-шайынып алған жігіт жұмысқа беттеді. Қызметімен қоса, бастығының айтқанын да бұлжытпай орындап үлгеруде. «Аға осы күніміз сіздің арқаңыз, сіздей жақсы адамдар көп болса шіркін!» деп көлгірсіп те үлгереді арасында. Бастығына арналған кешегі боқауыздары бір сәтте ұмытылғандай. Міне, бұл Саматтың бетпердесі еді. Кешегі көріністерін ішіне сақтап, сол арам пиғылын жасырып, бастығына жақсы болып көрініп жағдайын жасамаққа көшкен. Әйелінің “Неге адамдарды алдайсың?” деген сұрағына, “Тоғайына қарай торғайы, заманына қарай адамы”, заман сондай, бұл өмір, байлыққа солай ғана қол жеткізесің деп жауап берген жігіттің беті де бүлк етпеген еді. Бүгін міне, сол арқылы бетперде киіп, екіжүзді атанғанын өзі де сезбей қалды. Доспын деп қасынан қалмайтын Арманның да Саматқа деген сырттай өкпесі бар еді. Саматтың тез көтеріліп, жұмыста абыройлы болғанын көре алмайтын. Кешегі әңгімеден соң соның есесін қайтарар кез де келді. Досым деп бетперде киген жігіт, күні кеше болған келеңсіз әңгіме жайында бастығына барып жайып салды. Екі жігіттің бұндай перделі әрекеттерін бұрыннан байқаса да көрмегендей болып, кешіріммен қараған бастық бүгінгі бір-біріне жасаған сатқындықтарына ашынып екеуін де жұмыстан қуып шықты. Бетперде киіп бақытқа жетем деп, былыққа батқан жігіттер бүгінде бір-біріне қарауға бет жоқ. Мүмкін ұялатын болар, бірақ тіршілік үшін біреудің сыртынан сөз сөйлейтіндер қысылудың не екенін білмейтін де болар. Заман сондай, заманына қарай адамы дейміз, сонда шынайылықтың бейнесі қайда? Заманды өзгертетін адам емес пе? Бәрі адамның қолында. Өзің қандай болсаң, айналаңдағы адамдар да сондай болады. Оған осы бір мысал дәлел болса керек.
Құйрығы – шаян, беті – адам
Байқамай сенбе құрбыға.
Жылмыңы сыртта, іші – арам
Кез келер қайда сорлыға, –
деп Абай атамыз айтпақшы екіжүзді адамдар тірлік үшін, бірлікті жасанды қылып, өзгелердің алдында өз бас пайдасын ойлап, қулық-сұмдықтың небір сиқырын меңгерген. Иә бұл жандар өздері үшін өзгелер өлім құшса да көңілі жасымайтын жағымсыз қасиеттерге ие. Олар өтірік көлгірсіп өз бойындағы жаман қасиеттерді бүркемелеп, өзін өнегелі, көргенді етіп көрсеткісі келеді. Тек қана бас пайдасын ойлап, өзгелерге жалған мақтаумен жағынып, өсек тасып жамандап, елді шағыстырып, соңынан ұрыстырып жүреді. Екі аяқты екіжүзділердің ең сорлы қасиеті өз ісін тындырып алғаннан кейін, бұрынғы таныстары мен қызметтестерін танымай кетуі. Сіздер де осындай пенделерге тап болған боларсыздар. Иә таңғалатын түгі жоқ олардың бет-пердесін танып, олардан аулақ жүру кім-кімге де үлкен олжа екені белгілі.
Орамды ойларым неге пенделердің көбі екіжүзді болып кетті дегенге алып келді. Иә бетперде кигендер хақында көп ойландым. Мүмкін бесікте жатқанында қалыптасатын мінез шығар дедім?! Бірақ олай болуы мүмкін емес. Қай ата-ана баласын жаман болсын деп тәрбиелейді. Ақ сүтімен адалдықты берген ана мен, кең пейілімен адамдықты үйреткен әкенің кінәсі болуы мүмкін емес. Ендеше не? Екіжүзділік жүре келетін мінез болар бәлкім. Ойларым осында келіп тоқтады. Расымен адамның ортасы, тіршіліктегі қызыл-жасылға деген қызығушылық өзгертсе керек. Ортаң дұрыс, тәрбиең түзу болмаса, өтірік айтып, өсек тасу түк те қиын емес. Содан барып екіжүзділік басталады. Бірақ адамның қай-қайсысы болмасын өзінің бетперде кигенін байқамайтын болса керек. Білсе ұялып, қысылып, қисық әрекетін қояр ма еді? Бүгінгі қоғамның да сыздауығы сол. Солқылдағанда есіңді шығарады. Жағымсыз мінездің бойымызда болмағаны абзал еді.
Ауылдан аңғалдық пен адалдықтан өзгені көрмеген мен үлкен қалаға келіп жұрт алдында жақсы болып көрінгісі келетін сұм ниеттілерді байқап, басымды шайқағаным әлі есімде. Жоғарғы оқу орнына түсіп студент атандық, сол кезде үлкен қаладан бетперде киіп бірін-бірі алдаған айлакерлерді жиі кездестірдім десем жалған емес. Міне, содан бері қанша уақыт өтсе де өз басын ойлап, өзгенің жасын шығаратындардың әр жерде бар екеніне көзім жетті. Көзіммен көрген келеңсіз көріністер де жетерлік. Туыстарын, достарын алдап «мен мынадай мықты жерде жұмыс істеймін» деп, небір керемет көлікті жалға алып, досының сеніміне кіріп, кейіннен қыруар ақшаны қарызға алып қашып кеткендері де кездесті. Туыстарына да дәл осылай жанашырлық танытып, біршама көмек көрсетіп, соңынан сергелдеңге тастап тасжүрек болып кеткендер де қаншама? Қазіргінің махаббаты да бетпердеге жасырылған. Жігітке қымбат көлігі үшін қызығып, қызға қылығы үшін қызығып, былыққа батып жатқандар неше? Қызды қайткен күнде де құрығыма түсірем дегендер бар жағдайын жасырып, жалған өмірмен жоқ байлығын барға балап, жүрегіне жол тауып жатыр. Бірнеше жыл сөйлесіп жүріп, бақытты боламыз деп серттесіп, бірінің сөзін бірі тыңдап, мейірімді, кеңпейіл, ақкөңіл болып көрінетіндер де үйленген соң мүлдем басқа болып шыққаны да бүгінгінің шындығы. Бетперденің ең жаманы достықта көрініс тапқаны. Тай құлындай тебісіп, бала шақтан бірге өскендер де ақшаға келгенде өз басын күйттеп кететіні де өкінішті. Сол арқылы сырттай дос, іштей жау болып екіжүзділік көрсетеді. Сол сәтте «”Итіңнің дос болғаны жақсы ғой, ал досыңның ит болғаны қандай жаман», – деген аталы сөз ауызға оралады.
Бүгінде белең алған бұл көрініс бұрында қандай еді? Пенденің адамдық қасиеттерін сыйлаған бабаларымыз кезінде екіжүзділерді елге сыйғызбаған екен. Кім болса да, қандай билік иесі болса да құрметтен алыс еткен. «Мал аласы сыртында, адам аласы ішінде» деп те тауып айтқан. Досым деп шатасып, жақыным деп адасып жүргендер сол жақынының нағыз келбетін танығанда жігері құм болып жатады. Жан-жағымызды қоршаған адамдарымызды тануда шатаспас үшін айтып өткен қайран бабалар сөзі-ай, дейсің кейде... Екіжүзділерге екі дүниеде де орын табылмасын шариғат та түсіндіреді. «Мұнафих» яғни бетперделілер бұл өмірден біреуді алдап-арбап орын тапқанымен, мәңгілік өмірде тозақтың ең түбіне түседі екен. Пайғамбарымыз (с.ғ.с) «Екіжүзділіктің белгісі үшеу: сөйлесе – жалған сөйлейді, уәде берсе – орындамайды, аманат етілсе – қиянат етеді», – деген.
Жалған сөзбен ел ішіне іріткі салатын екіжүзділер мен жағымпаздар көбейсе жағдайымыз не болмақ. Ойланарлық жайт. Сол үшін тәлім-тәрбиені күшейтіп, осындай жаман мінездердің жеткізетін надандығын түсіндіруіміз керек-ақ. Содан тәлім алған ұрпақ парасатты болып өссе, ел болашағы да жарқын болары сөзсіз.
Таза мінсіз асыл тас,
Су түбінде жатады,
Таза, мінсіз асыл сөз,
Ой түбінде жатады.
Су түбінде жатқан тас,
Жел толқытса шығады.
Ой түбінде жатқан сөз,
Шер толқытса шығады.
Асанқайғы.
Әйнектің екі жағы болады. Соның бір жағын жуып, екінші жағын жумасаң, әйнек толықтай кір болып көрінеді. Сол сияқты адамның бүкіл болмысын түзеу үшін, бойына жақсылықты тұрақтандыру керек. Адамның әйнек секілді ішкі жан дүниесі мен сыртқы келбеті сұлу болса, мінсіз болары сөзсіз. Әрқайсымыз осылай өткеннен сабақ алып, бетперде кигеннің бәрі былыққа ұрынатынын біліп, бабалар даналығына сүйеніп өмір сүрсек, ғұмырымыз баянды, өміріміз бақытты болары анық.
Құралбек Сәбитов