Сонау тоқсаныншы жылдардың басындағы аумалы-төкпелі кезеңде елдің көбі жабайы базардың арқасында нан тауып, бала-шағасын асырап-бақты. Ол тұста қолма-қол ақша болмаса да айырбас жасауға мол мүмкіндік болған-ды. Күнкөріс үшін сандығының түбінде сақтаулы жатқан құнды деген заттарын базарға шығарып, саудалап отырған әйелдер бейнесі бүгінде біртіндеп ұмытылып келе жатқаны сізге байқалмай ма? Саудагерлер азайып жатқан жоқ. Есесіне күн санап көбейіп келеді. Тек әйел затының орнын ер-азаматтар алмастырды. Әсіресе, жастар жағы көбейген үстіне көбеюде. Бұл – көпшілік үшін қуанарлық іс емес.
Өткен жолы базарға бас сұққанымызда қызу жұмыс істеп жатқан өрімдей жас қызды көзіміз шалып қалды. Шамамен жасы 21-де деп топшыладық өзіміз. Өткен-кеткен көпшілікті шақырып, арзан бағаға сауда жасайтынын айтып, алыс-беріспен айналысып жатты. Біраз қарап тұрып, қасына барып, сөзге тарттық. Өзі сондай пысық. «Тәте, мына киім сізге жарасып кететін сияқты. Киіп көріңізші. Тура сіздің размеріңіз», – деп қояды. Алмасыңа қоймайды тегі. Сонымен саудасы өтсін деген оймен өзімізге керектіні алып, ашық әңгімеге кірістік.
Самалдың (есімі өзгертілді) айтуынша, колледжді қызыл дипломмен бітірген соң жұмыс таппай біраз уақыт жұмыссыздар қатарын көбейтіп жүргенге ұқсайды. Қазақ тілі мен әдебиеті пәнінің мұғалімі болуды армандап қана қалған жас қыз енді мүлде дипломмен жұмыс істеуді ойламайтынын айтты. Оның себебі де жоқ емес. Ол ауыл, қала мектептерінің табалдырығын тоздырған. Бірақ нәтиже жоқ болғандықтан, мейрамханаларда даяшы болған. Оның жасындағылар тәтті ұйқыда жатқанда ол табанынан тозып, маңдайын шым-шым тер басып, ауыр жолмен ақша тапты. Негізі бір көргенде бұл жұмыс соншалықты ауыр емес сияқты. Бірақ мұның да өзіндік қиыншылығы бар. Алайда ол қиналысты тойға келген қонақтарға көрсетуге болмайды. Шаршап тұрсаңыз да күліп тұруға міндеттісіз. Бұл – әрбір мейрамхана қожайынының талабы. Самал көп әрі ауыр жұмыс жасап, мардымсыз ақша алғанда әр заттың тіпті, бес теңгенің де оңай жолмен келмейтінін ерте түсінген. Біраз уақыттан соң сауда-саттықтың қыры мен сырын сұрастырып, жалға базардан орын алып, тәуекел етіп, жиған-тергенін біріктіріп, ала сөмкені толтырып, тауар алып келеді. Міне, содан бері екі жыл өтіпті. «Ешкімге қол жайып отырған жоқпын, осыған да разымын», – деп қояды жымиып. – Базардағы саудагерлердің көбін танимын. Олардың басым көпшілігі жастар. Мен қатарлы. Олар да түрлі жұмыстың басы-қасында жүріп көрген. Соңында осы істен пайда барына көз жеткізді. Кейде қатты шаршағанымда неге өз мамандығыммен жұмыс істемедім екен деп ойлап қоямын. Бірақ қазір жұмыс табу, оған орналасу қиынның қиыны. Қазір өз қолым өз аузыма жетті. Енді өзім армандаған мамандықты мақтан тұта алмайтын сияқтымын. Осы саудамен біржола айналысып кетемін. Қазіргі жоспарым да осы, – деп әңгімесін айтып тұрса да біраз саудасын сатып үлгерді. Негізі бұл қыздың табиғаты осы салаға жақын сияқты көрінді бір қарағанда. Жылдам-жылдам киімдерді көрушілерге жарнамалап, бірін алып, екіншісін беріп, өз ісін қыздырып жатқан қаршадай қызға қарап разы болдық. Әр сөзін өзіне тән әдебімен, білімімен асқан сабырлықпен жауап берген қыздың дәл осы арада емес, оқушыны білім нәрімен сусындатып, білім ордасында отырғанда ғой деп ойладық. Дегенмен, ісін бес саусағындай біліп, саудасын қыздырып жатқан жас қызға сәттілік тіледік те өз ісімізбен кете бердік. Бұл бір ғана саудагердің пікірі. Бірақ біз онымен шектеліп қалмадық. Енді әңгіменің өзегін ер-азаматтар жаққа бұрдық. Біразы бұл істі қыруар ақша шығарып бастаса, енді бірі реализатор яғни, жалданып істеп жатқанға ұқсайды. Былайша тепсе темір үзетін ер-азаматтардың ала сөмкені олжалағандары көңілімізге қаяу түсірді. Елуді еңсерген азаматтарға түсіністікпен қарадық. Ал орда бұзар жасқа келген азаматтарға бір сөз айтудың өзі артық секілді. Дайын дипломды іске асырмай, жемісін жемей шаң бастырғандарын түсінбегендіктен сол төңіректен әңгіме бастадық. Сол жағын сұрастырғанымызда: «Қазір қиын уақыт қой. Жоғарыда көкең болмаса, ойыңдағы шаруаң да іске аспасы анық. Қысқасы, «крышаң» болмаса саусақ қимылдата алмайсың», – деп төтесінен жауап қайырды. Бүгінгі түсінік осыдан аса алмайтын болып тұр. Неге? Сонда қызметте жүргендердің бәрінің бір-бір көкесі жоғарыда отыр деген сөз бе? Осы түсініктен арылатын уақыт келгелі қашан? Бірақ біздің түсінік әлі де сол төменгі сатыда қалып қойғаны көңілге қаяу түсіреді.
Психолог мамандардың айтуынша, мұндай адамдар өздеріне сенімсіз болып келеді. Қандай да бір іс бастауды ойласа міндетті түрде келесі адамның көмегіне зәру болып тұрады. Өздерінің жеке ұстанымдары, қағидалары басқалармен салыстырғанда төмен екенін де ғалымдар анықтаған. Расында солай емес пе? Егер де білімің мен ақылың, қайратың мен күш-жігеріңіз жетсе, жауапкершілікті бір кісідей сезініп тұрсаңыз, сіз де өзіңіз қалаған қызметке орналаса аласыз. Ол үшін белгілі біреуге қоңырау шалып, «ағалап, көкелеудің» ешқандай да қажеті жоқ. Тәуекелшіл еместігіміз осындайдан білінеді. Бір қарағанда «міндетті түрде жоғарыда крышаңыз болуы керек» – дегеннің өзі тым таяз ой екенін түсінейік. Сөзіміз дәлелді болу үшін тағы да дана Абайдың сөзіне жүгініп көрейікші. Қайран, біздің ділмарларымыз-ай?! Жаңа заманға, жаңа қоғамға ненің қажет екенін, неден жирену керектігін тәптіштеп айтып, ақ қағазға түсіріп бізге мол мұра етіп қалдырғандары үшін қанша алғыс айтсақ та аз. Сонымен асқан даналығымен, білімімен жұртты аузына қаратқан Құнанбайдың Абайы не деп еді. Ол: «Сенбе жұртқа, тұрса да қанша мақтап, Әуре етеді ішіне қулық сақтап. Өзіңе сен, өзіңді алып шығар, Еңбегің мен ақылың екі жақтап», – деген еді. Әрбір жас осындай мағыналы сөзді өзінің өмірлік ұстанымы етсе ғой. Сонда қоғамда желдей ескен арзан пікірлер туындамас та еді. Амал қанша, біз үшін жазылған өсиетке өкінішке қарай ешкімнің де құлақ түргісі жоқ. Ал енді әңгіменің ауанын базардағы көріністерге тағы бұрайық. Кез келген адам күніне болмаса да аптасына бір рет базарға барары анық. Сол кезде жан-жағыңызға қарап көріңізші. Біз айтқан мысалдарға айна-қатесіз тап боласыз. Тіпті, шұлық сатып отырған азаматтардың қатары да көбейіп кеткенін де көзіңізбен көресіз. Біз бұл мәселені бір жақты қарағанымыз да дұрыс болмас. «Есектің артын жусаң да мал тап», деген тағы бар. Осы тұстан қарағанда қол қусырып, «алма піс, ауызға түс», – деп отырғанша азын-аулық тиын-тебен тауып, еңбектенгені жақсы. Ерінбей еңбек етсеңіз, тіленбей қарныңыздың тоятынын Абай атамыз әлдеқашан айтып кеткен. Десе де, сол уақыттан бері күні бүгінге дейін осы сөздің мәні мен мағынасын тереңнен түсіне алмай жүргеніміз өкінішті-ақ. Бұл заман біреуді тоңдырып, біреуді тойдырып секіртетінін де естен шығармағанымыз жөн. Оған келтірер мысал да шаш етектен. Соның біріне тоқталар болсақ, үлкен қалалардағы көпқабатты сауда үйлеріндегі таза әрі кең «бутиктерді» көбіне өзге ұлт өкілдері иемденіп алған. Мәселен, кішкентай күнімізде көпшілігімізді «орыс келе жатыр», – деп қорқытатынын еске алсақ, бұл күнде үлкендердің сол қылықтары үшін күлеміз. Міне, сол орыс тәтейлеріміздің басым көпшілігі қою көлеңкенің астында, көбіне далада емес сауда үйлерінде кәсібін қыздырып отырғанын көреміз. Одан қала берді өзбек ағайындар алақандай жерді алып, жеміс-жидектің сан алуан түрін сатып, қиналмай-ақ ақшасын табуда. Осындайда: «неге біздікілер қақаған күннің аязына тоңып, шіліңгір шілденің аптап ыстығында далада тұруы керек», – деп намыстанып кететініміз рас. Егер сізде мұндай сезім болмаса, бір сәт осы тұрғыда ойланып көріңізші. Осындай жайлы орындар басқаға тигенде біздер яғни, қазақ әйелі көше жағалап, жабайы сауданың көркін қыздыруға атсалысады. Ішкі істер органының қызметкерлерінен қашып-пұшып жүргендер де біздің апайлар. Арқасында асынған ала дорбасы, қолында томпиған сөмкесін ұстап, әр жерге барып, тауарын өткізу мақсатында жүгіріп жүргендері үшін оларды кінәлауға да болмас. Өйткені бала-шағаны өмірге алып келу, оларды қанаттыға қақтырмай, тұмсықтыға шоқтырмай бағып-қағу ата-ана мойнындағы негізгі әрі жауапты міндет. Осындай тырбыңдаған еңбекпен перзентін қанаттандырып жүрген кез келген әке-шеше: «Әйтеуір балаларымыз жақсы жерде білім алса. Жас кездерінде оқыса, білсе, көрсе дейміз. Біз көрген бейнетті олар көрмесе екен», – деп қынжылып, соңынан еріксіз күліп жүріп жұмыстарын одан ары жалғастыратындарды да жолықтырдық. Қайран, біздің алтыннан да жақұттан да қымбат асыл қазыналарымыз-ай?! «Баламның табанына кірген тікен менің маңдайыма кірсін», – дегенді жиі қайталаудан шаршамайтын, талмайтын ардақтылардың бар арманы – перзентінің адам болуы. Міне, сол үшін де олар жұмыстың ауыры мен жеңіліне, жақсысы мен жаманына қарамайды. Орта жастан асып, егде тартып қалғандардың тіршілігі осы дейік. Қалай дегенмен де отбасын осы сауданың арқасында асырап отыр. Ал бұл тірішілікпен айналысып жүрген жастарды әсіресе, ер-азаматтарды көріп оларды да сөзге тарттық. Дегенмен саудагерлердің сөйлегені, қойған сұрағыңа тақылдап тұрып ана тілінде жауап бергеніне қарайсың да екі сөздің басын қоса алмай жүрген шенеуніктерге жаның ашиды. «Елім, жерім, ұлтым» деген бірауыз сөз жүректерінен шынайы шығып жатқанын сезінгенде тіпті, елжіреп, кеудең қуанышқа толады.
Тақырыпқа орай
Мақсат:
– Саудамен айналысқаныма 10 жыл болды. Ата-анам оқуға түсірді. Жастықпен оқымай кеттік қой. Өкінемін қазір. Дипломсыз ешбір есіктен де сығалай алмайсыз. Отбасылы болдым, басыма бас қосылды, жаныма жан қосылды. Бала-шағаны асырап бағу керек. Содан ала сөмке арқалап Бішкек, Қытай асып кеттім. Киім-кешек алып келеміз де, үстіне азын-аулық ақша қосып, пайда табамыз. Қазіргі заманда ер, әйел, кәрі, жас болып бөлінудің қажеті жоқ. Кімнің қолынан не келеді, соны жасағаны дұрыс. Тіршіліктің қамымен зулап өтіп жатқан уақытта шек жоқ. Сондықтан тынбай еңбек ету керек. Саудаға шығарған ақшамызды қайтарып аламыз. Ұтпасақ, ұтылмаймыз.
Жібек:
– Саудамен айналысқан адам күнделікті ақшаға, ай сайынғы айналымға үйреніп қалады. Басында біраз қиын болды. Қазір үйреніп кеттім. Негізі, алған білімім жоғары. Заңгер мамандығын төрт жыл оқыдым. Тас лақтырсаң заңгердің басына тиетін заман болды ғой бүгін де. Жұмыс таптым, жалақысы аз. Қысқасы, басыма тартсам аяғыма, аяғыма тартсам басыма жетпедінің күйін кештім. Ақыр соңында болмаған соң, аяқкиім сатамын деп шештім де, ата-анамның жиып-терген азын-аулық ақшасын алып, ер-азаматтардың аяқкиімін сатуға кірістім. Бұл менің күнкөрісім. Менің шағын бизнесім. Осының ақшасымен жан бағып отырмын. Негізгі кәсібім осы.
Бақтияр:
– Талдықорғанға көшіп келгеніме 8 жыл болды. Туған жерім Шымкент қаласы. Мата сатамын. Керек дүние. Тұрақты клиенттерім де бар. Үнемі келіп тұрады, арзан бағаға беремін. Маталарды шым қаладан алып келемін. Ер-азамат болсын, әйел заты болсын бәрі де қолынан келіп тұрса, өз істерін істей берсін. Онда тұрған не бар деп ойлаймын. Алдағы уақытта отбасын құрсам да осы істі жалғастыра беремін. Диплом шаң басып үйдегі сандықтың түбінде жатыр. Мамандығым бойынша жұмыс таппаған соң осы істі бастадым. Қыры мен сырына әбден қанықтым. Әзірге күнкөрісім осы.
Түйін:
Заман дейміз, қоғам дейміз. Мұның бәрін қалыптастырып, өз арнасынан тасытпай жүйелеп отырған Жаратқанның құдіреті. Ал ол жердегі ауызбіршілік, даму, өсу, өркендеу дегеніңіз әрбір адамның қолында десек, қате пікір бола қоймас. Не айтқымыз келіп тұрғанын түсініп тұрған шығарсыз. Замандастар, қатарластар, бауырластар! Дәл бүгінгі таңда біз «Болашақ жастардыкі. Еліміздің ертеңі – жастар» деген сөзді жиі-жиі естіп жүрміз десек, өтірік емес. Газет-жорналды алсаңыз да, телеарнаға құлақ түрсеңіз де айтылып жатқан сөз төркіні осы. Демек, әрбір жас өзінің дегенін, арманын, мақсатын, жоспарын, әрине, егер де елге, жақындарына, өмір сүріп отырған ортасына зияны келмейтіндей болса жүз пайыз болмаса да тоқсан пайыз орындай алады. Тек қана «крышаң болмаса...» деген сөзден арылайықшы. Егер де санаңыз, біліміңіз, ақылыңыз сәл де болса өз ісіңіздің қыры мен сырына жетіңкіремей, түсіне алмасаңыз жоғарыда отырған ағаңыз дейік, тіпті, әкеңіз бен анаңыз болса да сіз ол орында ұзақ отыра алмайсыз. Өйткені бүгінгі күн, бүгінгі нарық заманы сізді ондай деңгейде, «көкесінің жиені екен ғой» деп қабылдай алмайды. Қысқасы, маңдай термен оқытқан ата-ананың үмітін ақтап, алған біліміңізді кейінгі ұрпаққа қалдыруды ойлап, өзгеге емес, өзіңізге сенсеңіз болғаны.
Еңлік САҒЫНДЫҚОВА