Бүгінде қоғамның әр саласындағы қызметкерлер арасында түрлі жарыс ұйымдастырылып, ой сергітіп, бой жазуға тамаша мүмкіндік жасап келеді. Журналистердің мерекесі жақындап қалған тұста БАҚ қызметкерлері арасында облысымызда бірінші рет спартакиада ұйымдастырылғалы жатыр.
Бұл жөнінде Бейсен Құранбек атындағы Журналистер үйінде болған брифингте «Жетісу Медиа» МКК басшысының орынбасары Рүстем Қанапиянов пен «Jetіsý» газеті бас редакторының орынбасары Ришад Тұрғанбай айтты.
– Жетісудағы журналистердің басын құрайтын спартакиада алғаш рет ұйымдастырылғалы отыр. Нақты ереже бекітілді. Дәл қазіргі сәтте қатысушыларды тізімдеп, өтініштерін қабылдап жатырмыз, – деді өз сөзінде Рүстем Қанапиянов.
Ал Ришад Тұрғанбай: «Спартакиада футбол, волейбол, үстел теннисі, шахмат, дойбы, тоғызқұмалақ сынды 7 спорт түрінен болады. Жарысты білікті мамандар қадағалайды. Спартакиаданың ресми ашылуы 15 маусымда «Жастар» спорт сарайында өтеді. Апталық жарыс болғандықтан бірінші футбол мен волейбол 15 маусым бастайды, одан кейін тоғызқұмалақ 23 маусым, үстел теннисі мен бильярд 24 маусым, шахмат пен дойбы 25 маусым күндері болады», – деді.
Жарысты дене шынықтыру және спорт басқармасы тікелей қадағалап, жарысты өткізу үшін қолдау көрсетіп отыр. Ұйымдастырушылар бұл спартакиаданы дәстүрге айналдырып, журналистер мерекесі қарсаңында тұрақты ұйымдастырмақ.
Қали АСҚАР
