Футболдан УЕФА Чемпиондар лигасында 1/8 финалының алғашқы ойындары аяқталды.
Бұл туралы 7-su.kz желілік басылымы kaz.inform.kz сайтына сілтеме жасап хабарлайды.
Әлемдегі атақты клубтардың бірі, каталониялық «Барселона» Лиссабонда «Бенфика» (Португалия) командасымен шеберлік байқасты.
Бұл ойында 22-минутта испаниялық клубтан қорғаушы Пау Кубарси алаңнан қуылды. Туғанына 18 жас 42 күн болған П.Кубарси Чемиондар лигасында ХХІ ғасырда алаңнан қуылған ең жас футболшы атанды.
Бір ойыншысы кем болғанына қарамастан, «Барселона» 1:0 есебімен жеңіске жетті. Гол авторы — бразилиялық Рафинья.
«Барселона» қақпашысы, поляк Войцех Щенсны ойын барысында 8 сейв жасап, 2003-2004 жылғы маусымнан бергі үздік нәтижеге қол жеткізді.
Биыл Ағылшын премьер-лигасында жеке-дара көш бастап келе жатқан «Ливерпуль» Парижде «ПСЖ» командасын 1:0 есебімен тізе бүктірді. Мұнда 87-минутта Харви Эллиотт жеңіс голын соқты.
«Бавария» өз алаңында тағы бір германиялық клуб «Байерді» 3:0 есебімен ойсырата ұтты. Гарри Кейн қос голдың авторы атанса, Джамал Мусиала да құр кеткен жоқ.
Италиялық «Интер» Роттердамда «Фейеноорд» командасының 2:0 есебімен меселін қайырды. Маркус Тюрам мен Лаутаро Мартинес алаң иелерінің қақпасынан саңылау тапты.
Бір күн бұрын Лондонның «Арсеналы» Эйндховенде ПСВ клубын 7:1 есебімен қақырата жеңіп, АПЛ командалары арасында рекорд орнатты.
Сондай-ақ тағы бір ағылшындық клуб «Астон Вилла» сырт алаңда бельгиялық «Брюггеден» 3:1 есебімен айласын асырып, ширек финал жолдамасын алуға жақын тұр.
«Боруссия» (Германия) — «Лилль» (Франция) клубтары 1:1 есебімен тең тарқасты.
Мадридтік дербиде «Реал» өз алаңында «Атлетикодан» басым түсті — 2:1.
Қарымта кездесулер 11-12 наурызда өтіп, ширек финалға шыққан командалар анықталады.
Фото: championat.com
