Дзюдо жапондық жауынгерлік өнердің бір түрі. Осы спортпен айналысып, елдің даңқын шығарып жүрген оғландарымыз өте көп. Бұл күні қазақстандық жастардың дені дзюдомен шұғылданады. Солардың бірі Уәлихан Серік. Көрсетіп жүрген нәтижелері жаман емес.
Уәлихан Алакөл ауданына қарасты Жанама ауылының тумасы. Сол елді мекендегі қазақ орта мектебінде білім алады. Биыл 11 – сыныпқа аяқ баспақ. Ал, дзюдомен 7 жасынан бері айналысып келеді. Ол былтыр оқушылар арасындағы дзюдодан өткен республикалық жарыста 3-орынға табан тіреп, қола жүлде иеленіпті. Жас спортшы үштіктен көрінудің өзі қиын болғанын, сол жолда есепсіз тер төгілгенін айтады. Келер жылы осы турнирге тек 1-орын алу үшін ғана баратынын сөз етеді.
Спорт шеберіне үміткер деген атағы бар өреннің болашағынан жаттықтырушысы да көп үміт күтеді. Сондықтан әрдайым Уәлиханның жаттығуына айрықша назар аударып, салмақ дәрежесін қадағалап отырады. Осы тұста жеткіншектің де өз айтары бар.
– Спорттық дзюдода соққы беруге болмайды. Сондай-ақ, қолмен аяқтан қапсырып ұстау, көзді шұқу, жақты ауырту, қылқындыру сияқты әдістерге де рұқсат жоқ. Партердегі күресте тек шынтаққа ғана ауырту тәсілдері рұқсат етіледі. Бұл тұрғыда жаттықтырушым Ербол ағайдың маған үйретіп жатқан айла-тәсілдері көп. Менің жеңіс тұғырынан көрінуімнің себепкері де осы кісі. Айтар алғысым шексіз, – дейді жас дзюдошы.
Уәлихан дзюдодан бөлек самбо, қазақша күреспен де шұғылданады. Бұл спорт түрлерінен жеткен жетістіктері де бір төбе. Ол Елдос Сметов сынды әйгілі спортшы болуды армандайды.
«Жетісу-Ақпарат»
