Үлкен футболдан әуесқойлар арасында (18 жастан жоғары) Жетісу облысының чемпионаты аяқталды. Әр ауданмен қаладан жасақталған командалар жаз бойы мықтыны анықтау үшін топтық кезеңнен бастап бірнеше ойын өткізді. Жарыс «Спорт есірткіге қарсы» атты ұранмен өтті.
7-su.kz. Талдықорғандағы «Болашақ» алаңында өткен финалдық ойында Талдықорған қаласының құрамасы Көксу ауданының ойыншыларын 5:2 есебімен жеңді. Оның алдында Қаратал ауданының құрамасын 7:2 нәтижесімен ұтқан еді. Жарыстағы ерекше ойындарына қарай Жандос Алиайдаров «Үздік қақпашы», Әділет Талғатов «Үздік ойыншы» деп танылды.
— Жетісудағы футболдың дамуы жыл санап өсіп келеді. Оған осындай жарыстардың ықпалы зор. Өңір футболын дамыту үшін барын салып жүрген жандарға алғыс айтамыз. Талдықорған құрамасы жарыс басында-ақ фаворит болған еді, сол сенімнен шығып, өз міндетімізді абыроймен орындағанымызға қуаныштымыз, — дейді үздік қақпашы Жандос Алиайдаров.
Бұл жарысты әуесқойлар арасындағы үлкен футболдың дамуы үшін жасалған ерекше талпыныс деп атап өтсек те болады. Келешекте ұйымдастырушылар жеңімпазбен жүлдегерлерге деген көңілді арттырып, жарыс аясын кеңейтеді деген ойдамыз.
«ЖЕТІСУ-АҚПАРАТ»
