Облыс орталығындағы спорттың дамуы кейінгі кезде оң бағытқа бет алып, түрлі іс-шара жиі ұйымдастырылып, тұрғындардың да тұрақты шұғылдануына жағдай жасалып келеді. Былтыр сәуір айында Талдықорған қаласы әкімінің қолдауымен дене шынықтыру және спорт бөлімі ашылып, өз жұмысын бастады. Басшысы Жаннұр Әбішевпен тілдесудің сәті түсті.
– Құрылғанына бір жылға жуық уақыт болған бөлімнің бүгінге дейінгі жұмысы көз алдымызда. Жаннұр Мұратұлы, өзіңіз кеңінен тоқтала кетсеңіз.
– Рақмет, бір жыл ішінде көптеген істерді жүзеге асырдық, әлі талай жобамыз дайын тұр. Барлығы өз ретімен келе жатыр. Біздің мақсат – Талдықорғанның спортын дамыту. Ол үшін жүйелі жұмыс жүргізуіміз қажет. Қаламызда түрлі спорт нысандары бар, алдағы уақытта осы бағытта бірнеше ғимарат салынады. Сондықтанда кәсіпқой деңгейде де, әуесқой бойныша да тұрғындардың емін-еркін спортпен айналысуына жағдай жасау – біздің міндет. Енді осыған дейінгі спорттық шаралардың негізгісіне тоқтала кетсем. Есіңізде болса, алғашқы жарысымыз 27 мектептің оқушылары қатысқан «Мектеп барысы» (7 кезеңнен тұрды) жобасы. Одан кейін еліміздің бірнеше облысынан және Ресейден келіп арнайы қатысқан (1500 спортшы болды) «Qazaq marathon Taldyqorgan», 10 жылдан астам қаламызда тоқтап қалған үлкен футболдан қала чемпионаты ұйымдастырылып, оған 8 команда қатысты. Тағы сондай көптен бері болмай кеткен Талдықорған гарнизоны әскери бөлімдері арасындағы спартакиаданы қолға алдық. Қала әкімінің ұсынысымен «Aula fit» жобасы (100 спорттық шара өтті, оған 4 мың бала қатысты) бастау алды. Ұлттық спорт түрлерінен тұратын жарыс өтіп келеді. Мүмкіндігі шектеулі жандар арасында түрлі эстафеткалық жарыс ұйымдастырылып, әуесқойлар үшін футбол, волейболдан қала біріншілігі әр мезгіл сайын өтіп келеді.
– Ал бөлім спорттық шараларды ұйымдастырудан бөлек тағы қандай істер атқарады?
– Біздің бөлім спортшыларға түрлі спорттық разрядтар беру, жаттықтырушыларға және әдіскерлерге біліктілік санатын беру бойынша мемлекеттік қызметтер көрсетеді. Бұл қызметтер қаладағы дене шынықтыру мен спорт саласын дамытуға бағытталған және қала тұрғындары үшін өте маңызды мәнге ие деп білемін. Былтырдан бері бөліміміз тарапынан 561 мемлекеттік қызмет көрсетілді. Олардың ішінде мерзімі бұзылған немесе шағымданған деректер тіркелген жоқ. Бұл біздің жұмысымыздың тиімділігін және тұрғындарға көрсетілетін қызметтің сапасын айғақтайды. Нақты айтсақ, спортшыларға разрядтар беру бойынша – 365, біліктілігі жоғары деңгейдегі екінші санатты жаттықтырушыларға – 125, біліктілігі жоғары деңгейдегі екінші санатты әдіскерге – 13, спорт төрешісі бойынша – 58 мемлекеттік қызмет көрсетілді. Бізге жүгінген жандарға заң аясында тиісті жауап беріп, еңбегіне қарай бағалап, түрлі санаттарды тапсырамыз.
Серік Қантай
