Еліміз ерекше жүлде күткендердің бірі – Әмір Маймұратов. Құзға өрмелеуден сынға түскен спортшымыздың жеңіске деген бастапқы қадамы сәтті басталып еді, финалдық кезеңде бір сәттік қателік жарыс жолынан шығарды.
О, бастағы жылдамдық, жеңіске деген жігерді байқағандар бірден «Олимпиада ойындарының жүлдесіне лайық» десті. Алайда соңғы нәтиже шыққанша, финалдық кезең аяқталғанша талай іс лезде өзгеріп, қайта сынға түсер спортшының шапшаңдығы да алдыңғысындай болмайтындығы белгілі. Құзға өрмелеу бойынша Қазақстан құрамасынан Олимпиада ойындарына қатысқан жалғыз спортшы Әмір Маймұратовтың кейінгі нәтижелері жоғарылап, жақсарған. Олимпиаданың іріктеуінде 4,89 нәтиже көрсетіп, Олимп ойындарының рекордын жаңартты. Әлем басылымдары да назарда ұстап, үздіктер қатарына қосқан. Ақпарат кеңістігі шұғыл шулап, бұл жетістіктің қанша уақыт сақталатынын да шамалаған. Жеке өзінің ғана емес, Олимпиаданың рекордын жаңарту – айтулы жетістік. Алайда бұл ұзаққа созылмады. Индонезиялық Веддрик Леонардо 4,79 секнудта межені бағындырып, рекорд жаңартты.
Қазақстандықтың көрсеткіші финалдық кезеңге өтуге жеткілікті болды. Құзға өрмелеуден 14 финалда ирандық спортшы Реза Алипур (іріктеуде 5.26 уақытта көрсеткен) екеуара сайысқа түсіп, Әмір 6,14 уақытты көрсетті. Қарсыласы болса 5.57 нәтижесімен оңай асып кетті. Осылайша алғашқы айналымда рекорд орнатқан Әмір финалдық кезеңде сүрінді. Ал құзға өрмелеу бойынша Веддрик Леонардо чемпион (нәтижесі 4.75) болса, қытайлық У Пэн (4:77) 2-орын алды.
Айта кетейік, 29 жастағы Әмір Маймұратов осыған дейін Әлем чемпионатында 27-ші, Азия ойындарында 7-орын алған болатын. Ел намысын спорттық құзға өрмелеуден Олимпиада ойындарында қорғаған жалғыз спортшы.
Серік Қантай
