Нашақорлық қоғам дерті. Есірткіге тәуелді болу ессіздікке ұрындырмақ. Онымен күрес үнемі жүргізіліп отырғаны маңызды. Осы ретте Талдықорған төрінде спорттық шаралар ұйымдастырылды. 5-6, 7-8, 9-11 сынып оқушылары арасында волейбол, баскетболдан турнир өтті.
Облыстық білім басқармасының дене тәрбиесі, спорт, алғашқы әскери дайындық және қосымша білім берудің ғылыми-тәжірибелік орталығы ұйытқы болған «Шұбар доп», «Алтын доп» бәсекелері 3 күнге жалғасты. Оған қала, аудандардан 100-ге жуық команда қатысты. Сайысқа түскен ұл, қыздарға құрмет айрықша. Олар жеңіске жету жолында аянып қалмады.
Спорттық шараның басты мақсаты – оқушылары арасындағы волейбол, баскетбол ойынын дамыту, жасөспірімдер арасында саламатты өмір салтын насихаттап, жекелей спорт шеберлігін шыңдау. Сонымен қатар нашақорлыққа қарсы күресті үдетіп, оның алдын алу.
Жарыс қорытындысы бойынша волейболдан 5-6 – сынып қыздар арасында І орынға Көксу ауданының, ұлдар арасында Ескелді ауданының оқушылары ие болды. Ал 7-8 – сынып қыздар арасында І орынға Ақсу ауданының, ұлдар арасында Панфилов ауданының жеткіншектері қол жеткізі. 9-11 – сынып қыздар арасында І орыннан Талдықорған қаласының командасы, ұлдар арасында Панфилов ауданының командасы көрінді.
Баскетболдан 5-6 – сынып қыздар арасында І орынды Ақсу ауданының, ұлдар арасында Қаратал ауданының өрендері иемденді. 7-8 – сынып қыздар арасында І орыннан Ескелді ауданының командасы, ұлдар арасында Сарқан ауданының командасы жеңіске жетті. 9-11 – сынып қыздар арасында І орынға Сарқан ауданының, ұлдар арасында Ескелді ауданының оқушылары табан тіреді.
Доп додасында облыстық білім басқармасының басшысы Марат Сүлейменов сөз сөйлеп, спортшыларға ізгі тілегін арнады. Жарысқа қатысқан оқушыларды Алғыс хатпен және жеңімпаз атанған командаларды диплом, медаль, кубоктармен марапаттады. Шара соңында жастарға баскетбол, волейбол доптарын сыйға берді.
Медет ЖҰМАБАЙ
