Литвада өткен География пәні бойынша Еуропа олимпиадасында (EGeo) Қазақстан құрамасы жоғары нәтиже көрсетіп, жеті медаль жеңіп алды.
Бұл туралы 7-su.kz ақпараттық порталы turkystan.kz сайтына сілтеме жасап хабарлайды.
Алтын медальді еліміздің қоржынына Талдықорған қаласындағы №24 мамандандырылған лицейдің 9-сынып оқушысы — Дарын Бекбол иеленді. Ол кіші (жасөспірімдер) санатында (12-15 жас) ең үздік атанды.
Қола жүлдені Шымкент қаласындағы НЗМ-нің 9-сынып оқушысы — Микаэль Почукаев жеңіп алды.
Негізгі (үлкен) жас санатында (16–19 жас) Қазақстан құрамасының қоржынына медаль салғандар:
-
Қостанай қаласындағы НЗМ-нің 10-сынып оқушысы Андрей Енбахтов.
-
Талдықорған қаласындағы НЗМ-нің 12-сынып оқушысы Ақжол Болат.
-
Ақтөбе қаласындағы НЗМ-нің 12-сынып оқушысы Алихан Калмагамбетов.
-
Павлодар қаласындағы НЗМ-нің 11-сынып оқушысы Мансур Тұрсынғалиев.
-
Талдықорған қаласындағы НЗМ-нің 10-сынып оқушысы Рамиль Имашев.
Команданың жетекшілері мен жаттықтырушылары — республикалық және халықаралық олимпиадалардың бірнеше дүркін жүлдегерлері Абай Дүйсен мен Ақберен Айжарық.
Айта кетейік, EGeo олимпиадасы 2015 жылдан бері өткізіліп келеді. Басты мақсат — география және экология саласына қызығушылықты арттыру. Байқау үш кезеңнен тұрады: жазбаша тест, мультимедиялық тапсырма және дала туры. Барлық тапсырмалар ағылшын тілінде орындалады. 2024 жылы Қазақстан құрамасы алты медаль еншілеген болатын.
