Алматыда тасжолдағы велоспорттан Азия чемпионатында андер және элита сатысындағы қыздар арасында топтық жарыс өтті, деп хабарлайды федерацияның баспасөз қызметі.
Қазақстандық андер қыздар 112,6 шақырымды жүріп өтті. Ел намысын Ақпейіл Өсім, Бота Батырбекова, Виолетта Казакова, Елизавета Склярова қорғады. Нәтижесінде Ақпейіл чемпион атанды. Оған қашықтықты бағындыру үшін 2 сағат 56 минут 51 секунд қажет болды. Жарыстың күміс жүлдесі индонезиялық Девика Соваға бұйырса, үздіктер «үштігін» тағы бір қазақстандық спортшы Склярова түйіндеді.
«Арманым орындалды, мен өз жеңісімді ата-анама арнаймын», — деді мәреден кейін А.Өсім.
Элита қатарында еліміздің намысын Рината Сұлтанова, Махаббат Үмітжанова, Марина Кузьмина, Фаина Потапова және Анжела Соловьева қорғады. Алайда қазақстандық қыздардың ешқайсысы бұл жолы жеңіс тұғырына көтеріле алмады. Велошабандоздарымыздан үздік шыққан Соловьева жетінші орыннан көрінді.
Фото: olympic.kz
