Бүкіләлемдік бокс кеңесі (WBC) орта салмақтағы әлем чемпионы, Доминикан Республикасы өкілі Карлос Адамеске (24-1-1, 18 KO) қарсы міндетті қарсылас ретінде қазақстандық Мейірім Нұрсұлтановты (20-0, 11 KO) ресми түрде бекітті.
Басқарма тараптарға 6 мамырға дейін келісімге келу уақытын берді. Егер осы мерзім ішінде ортақ мәміле жасалмаса, WBC промоутерлік сауда ұйымдастырады.
Қазір орта салмақта екі белбеуді Қазақстанның тағы бір үздік боксшысы Жәнібек Әлімханұлы (16-0, 11 KO) иеленіп отыр. Ол WBO және IBF тұжырымдары бойынша әлем чемпионы. Ал WBA белбеуі Куба боксшысы Эрисланди Лараға (31-3-3, 19 KO) тиесілі.
Мейірім Нұрсұлтанов әлі күнге дейін кәсіби рингте жеңіліс көрмеген. 20 жеңісі мен 11 нокауттық көрсеткіші оны орта салмақтағы ең қауіпті қарсыластардың біріне айналдырады. Егер бұл жекпе-жек жүзеге асса, қазақстандық боксшы WBC белбеуі үшін алғаш рет жұдырықтасады.
Дереккөз: penalty.kz
Фото: sportburo.kz
