Англиялық танымал промоутер Фрэнк Уоррен ісін өзі жүргізетін орта салмақтағы британиялық боксшы Дензел Бентли (21-3-1, 17 КО) қазақстандық чемпион Жәнібек Әлімханұлымен (17-0, 12 КО) қарымта айқас өткізгісі келетінін мәлімдеді.
Бұл туралы 7-su.kz ақпарттық порталы Vesti.kz сайтына сілтеме жасап хабарлайды.
25 қазанда Бентли Венесуэла боксшысы Эндри Сааведрамен (17-1-1, 14 КО) жекпе-жек өткізуі керек болатын. Бұл кездесудің жеңімпазы қазіргі кезде Әлімханұлына тиесілі WBO белбеуіне міндетті үміткер атанады.
Алайда, белгіленген күнге үш апта қалса да, бұл жекпе-жек ресми түрде жарияланған жоқ. Уоррен Бентлидің рингке оралуы кешіктірілуі мүмкін екенін айтты.
«Әлі нақты емес, бірақ 25 қазанда өтпейтін сияқты. Жекпе-жек кейінге шегерілуі мүмкін. Біз бұл мәселемен айналысып жатырмыз», — деді промоутер.
Сонымен қатар, Уоррен өзінің боксшысын IBF және WBO тұжырымдары бойынша орта салмақтағы чемпион Жәнібекпен кездестіргісі келетінін айтты. Ол тіпті қазақстандық боксшы бұл кездесуден қашқақтап жүргендігін меңзеді.
«Біз ұзақ уақыттан бері (Бентли үшін) Жәнібекпен айқас ұйымдастыруға тырысып келеміз. Не болатынын көре жатармыз. Жәнібектің алдағы уақытта жекпе-жегі бар, одан кейін ол міндетті қарсыласымен кездесу керек. Сол кезде Дензел сол міндетті қарсылас болады«, — деді Уоррен.
Айта кетейік, британиялық боксшы бұған дейін де қазақстандықпен рингке шыққан болатын: 2022 жылдың қарашасында Әлімханұлы төрешілер шешімімен жеңіске жеткен еді.
Уоррен атап өткендей, қазақстандық боксшының келесі жекпе-жегі қазірдің өзінде жоспарда тұр. Соңғы мәліметтерге сәйкес, 32 жастағы боксшы WBA чемпионы кубалық Эрисланди Ларамен (31-3-3, 19 КО) титулдық кездесу өткізеді.
Әлімханұлы 2025 жылдың 5 сәуірінде Астанада рингке шыққан. Ол кезде Жәнібек франциялық үміткер Анауэль Нгамиссенгені (14-1, 9 КО) бесінші раундта нокаутқа түсірді.
Ал Бентли соңғы рет 2024 жылдың 7 желтоқсанында Бред Полсты (19-2-1, 11 КО) ұпай санымен жеңіп, орта салмақтағы Ұлыбритания және Еуропа чемпионы атағын иеленді. Бірақ ол кейін бұл титулдардан бас тартып, әлем чемпионы атану мүмкіндігін қарастыруда.
Айта кетейік, Дензел Бентли орта салмақтағы Ұлыбританияның үш дүркін чемпионы, ұлттық титул иегері, WBO International белбеуі мен Еуропа чемпионы атағын алған.
