Күнделікті ары-бері өткенде үйінің маңайына қылау түсірмейтін, екі көшені төте жалғайтын жалғызаяқ жолды қысы-жазы таза ұстап, елдің алғаусыз алғысына бөленген көрші атаның жүгіргенде алдына жан салмайтын өнері барлығын жақында біліп таңғалдым әрі тамсандым. Таңғалғаным жетпіске келсе де жүгіруде анау-мынау жастарыңа шаң қаптыратын желаяқтығы. Тамсанғаным – «болмасаң да ұқсап бақ» деп Абай атамыз айтпақшы, Ғалым атамыздан үйренер, үлгі алар өнеге көп екен.
Ғалым Шерубаев атамыз 1955 жылы 8 маусымда Қытайдың Шәуешек қаласында дүниеге келген. 1962 жылы атамекенге көшіп келгеннен осы күнге дейін Алла берген қуаттың арқасында саялы өңірдің ауасын жұтып, суын ішіп келеді. Талдықорған индустриалды-педагогикалық техникумын (қазіргі политехникалық колледж) техник-механик мамандығы бойынша бітіргенімен өмір бойы қолайына жаққан құрылыспен айналысты.
– Жүгіруді серік еткеніме 15 жылдай болды. Әлі есімде, алғаш рет өңірімізге белгілі тұлға Сәдуақас Қожасбаевты еске алу турниріне қатысып, бағым мен бабымды байқадым. 50 жастан жоғарылар 10 шақырымға жүгірдік. 30 адамның ішінде 12-ші болып келдім. Табандылығыма риза болған кәсіпкер Ерлан Қожасбаевтың арнайы жүлдесіне ие болуым осынау іске деген құлшынысымды арттырып, жігерімді жаныды – дейді желаяқ атамыз.
Содан бері желдей ескен Ғалым атамыз біраз жарыстарға қатысып, замандастарының арасында оза шауып, жүлделі орындарға ие болып жүр. Ақсақалдың қабілет-қарымын байқаған аталмыш сала мамандары да түрлі деңгейдегі бәсекелерге апарып жүр.
Былтыр Республика күніне арналған 60 жастан жоғары ерлер арасындағы аудандық марафонда ІІ орынға ие болса, Қазақстан халқының бірлігі күніне арналған 10 шақырымдық LEPSI RUN спорттық жарысына қатысып, жоғарыда аталған санат бойынша І орын иегері атанып, арнайы сертификат – Жасылкөлге сапарды олжалады. Сондай-ақ әлемге әйгілі Алматы марафонында 10 шақырымға жүгіруде 60-70 жас аралығындағы 20 үміткердің ішінде мәре сызығын 4-інші болып кесіп, талайларды таңғалдырды.
Күнделікті таң намазын мешітке барып өтеген соң Ы.Алтынсарин атындағы орта мектептің ауқымды стадионын екі рет айнала немесе қара жолды жағалап 10 шақырымға дейін жүгіру Ғалым атамыздың күнделікті әдетіне айналған. Дене шынықтыратын жаттығуды да тұрақты жасайды. Одан кейін бау-бақшаны күтіп баптау, қолдағы бар малдың жай-күйін жасаудан қолы босамайды. Сонымен қатар бие байлап, саумал саууды әдетіне айналдырған.
Құдай қосқан қосағы Мәрия Бейсембайқызы екеуі мәпелеп өсірген 2 ұл, 1 қыздан қазіргі таңда 12 немере сүйіп отыр. Ұлдың үлкені Ерболат Сарқан политехникалық колледжінде студенттерге білім берсе, қызы Жанар Талдықорған қаласында ұстаздық етеді. Ал шаңырақ иесі Жанболат өз несібесін сауда-саттықта тауып жүр.
Осы жылдың 8 маусымында 70 жасқа толатын желаяқ атамызға Жаратқан иеміз ұзақ ғұмыр берсін, балаларының, немерелерінің қызығын қызықтап, мағыналы ғұмыр кеше берсін деген ақ тілегімізді білдіреміз.
Партия ЖЕҢІСХАН
Сарқан ауданы
