Салтанатты шараны филиал төрағасы Әлікен Дәркенбаев ашып, жылы лебізін білдірді.
– Біздің осылай бейбіт аспан астында өмір сүріп отырғанымыз – сол бір отты жылдары жанын қиған боздақтардың, майдан мен тылда жанкештілікпен еңбек еткен аға буынның арқасы. Сол үшін әрдайым олардың рухына бас иіп, тағзым ете- міз, – деді ол.
Мұнан кейін шараға қатысушылар қан майданда қаза тапқан боздақтарды бір минут үнсіздікпен еске алды. Артынша облыстық Д. Рақышев атындағы филармониясы мен «Талдықорған әуендері» халықтық, фольклорлық-этнографиялық ән-би ансамблі өнерпаздарының орындауындағы патриоттық әндер шырқалды. Концерттік бағдарлама аясында ардагерлер мен қонақтар соғыс жылдарындағы әндер мен поэтикалық шығармалардан үзінділер тыңдап, көңіл толқытты. Осындай тамаша кешті ұйымдастырушыларға шынайы алғыстарын жеткізді.
Шара соңында Әлікен Дәркенбаев ардагерлерге Алғыс хат табыс етіп, гүл шоқтары мен тәтті сый-сияпаттар ұсынды.
С. ҚАСЫМБЕКҚЫЗЫ
