Атам, Оразбай Бөкенбаев 1903 жылы шаруа отбасында дүниеге келген. 12 жасында жетім қалып, ағайы Қасымның қарауында болған.1921-1925 жылдары Жаршапқан бастауыш мектебінде білім алып, артынша Жұма атты бай дүнгеннің малайы болып жұмыс істейді. 1928 жылы Жаршапқан ауылдық кеңесіне хатшылыққа қызметке тұрады. 1930-1931 жылдары қоймашы болып істеп, кейіннен «Талапты» ұжымшарының төрағасы болып тағайындалады. Қызылбұлақ ауылында сатушы да болады. Ол 1933 жылдың мамыр айынан бастап «Ақтекше» ұжымшарын басқарады. Араға 1 жыл салып «Талапты» ұжымшарына басқару қызметіне тағайындалған. 1935-1938 жылдары «Куйбышев» ұжымшарында есепші-бригадир қызметін атқарған.
1947 жылдарға дейін «Қызылбұлақ» ұжымшарын басқарған.
Атамның есімі тарихта ерлікпен қалғанын мақтан етемін. Ол соғыс кезінде танк колоннасының құрылысына 371 мыңнан астам рубль көлемінде қаражат аударған. 1943 жылы «Известия» газетінің бетінде «Қаражат жинау жалғасып жатыр. Құрметті жауынгерлер, мыңдаған колхозшылар сіздерге көмектесу үшін қолда бар ақшасын беріп отыр. Осындай адамдардың есімдерін ел білу керек. Ол: Оразбай Бөкенбаев Қаратал ауданындағы «Қызылбұлақ» ұжымшарының төрағасы, танк колоннасының құрылысына 300 мың рубльді берді. Бұл түскен қаржыға «Т-34» танкісі құрастырылды», – деп жазылды.
Оразбай атам істеген жұмысының нәтижесінде Қазақ ҚСР-ның 25 жылдық мерейтойына байланысты Грамотамен марапатталған. 1945 жылы Еңбек Қызыл Ту орденімен наградталып, 1946 жылы «1941-1945 жылдарғы Ұлы Отан соғысындағы ерен еңбегі үшін» медалі берілген.
Атам менің – себепшісі ерліктің,
Атам менің – ақ нұсқасы кеңдіктің.
Мақтан тұтам оның рухын, өрлігін,
Атам менің – қаймықпаған ең мықтым.
Еске аламын тарихты, бабамды
Соғысты ойлап сілкінтемін санамды.
Қан кешкен сарбаздардың жолында,
Барын берген мақтан етем атамды.
Күләнда БӨКЕНБАЕВА, зейнеткер ұстаз
