ҚР Мемлекеттік қызмет істері агенттігінің Жетісу облысы бойынша департаментінің басшысы Қобылан Манап «Еріктілер кеңесі» консультативтік-кеңесші органының мүшелерінің және жергілікті атқарушы органдар өкілдерінің қатысуымен облыстың тыл ардагерлері Любовь Синянская мен Кәнімжан Абанованың шаңырағына арнайы барып, Мемлекет басшысының атынан мерекелік медальді салтанатты түрде табыстады.
– Тыл ардагерлерін ұлықтау – бұл елдің өткені мен болашағы арасындағы тарихи сабақтастықты сақтау. Сіздердің еңбектеріңіз – бүгінгі бейбіт өміріміздің іргетасы. Ұрпақ бұл ерлікті ешқашан ұмытпауы тиіс, – деді Қобылан Тоқбергенұлы.
Любовь Синянская сұрапыл соғыс жылдарындағы тылдағы қиындықтарды, жас болса да елі үшін жан аямай еңбек еткен кезеңін тебірене жеткізді. Жеңіске жету жолында өз үйіндегі жалғыз түйені майданға өткізген сәті есінде ерекше сақталғанын айтты. Ал Кәнімжан Абанова да елдің болашағы үшін төзіммен еңбек еткен сол жылдарды, ауылшаруашылығындағы ауыр жұмыстарды, түн ұйқысын төрт бөліп, майданға азық-түлік дайындаған аналар мен қыз-келіншектердің ерлігін толқып есіне алды.
Ұлы Жеңістің 80 жылдығы – бұл тек мереке ғана емес, тарих алдындағы парызымызды өтейтін кезең. Ал тылда тынымсыз еңбек еткен ардагерлер – шынайы құрметке лайық батырлар.
ҚР Мемлекеттік қызмет істері агенттігінің
Жетісу облысы бойынша департаменті
