Атам Нұрахмет Көшербаев Отан үшін от кешкен асыл азаматтың бірі. Батыр 240-атқыштар дивизиясында болып, жаудың бетін қайтарған. Курск шайқасына қатысып, елін, жерін жаудан азат етуде аянбай тер төккен. Атқыштар дивизиясы құрамындағы бөлім әскерлері әдетте ең қиын шайқастарға қатысқан. Атамыз сол сұрапыл кезеңді бастан өткеріп, қан майданнан аман қалған. Жеңісті жақындатуға аз да болса үлес қосқан. Курск шайқасы Кеңес Одағының армиясы үшін шешуші сәттердің бірі болғанын тарихтан талай мәрте оқыдық. Онда Кеңес әскерлері жаудың шабуылын тоқтатып, жеңіске қол жеткізді.
Қарулы қақтығыстар мен қиян-кескі ұрыстарда батырлығымен танылып, бірнеше рет наградалармен марапатталған атамыздың ерлігі біз үшін үлгі-өнеге. Ұрыс алаңындағы батырлығы үшін «Жауынгерлік ерлігі үшін» медалін кеудесіне тақты. Бұл батыр атамның жауға қарсы көрсеткен қаhармандығы мен ерлігі.
Жеңіс күні біз үшін тек батырларымызды еске алатын күн емес. Бұл әлемде бейбітшілікті сақтау қажеттігін ұғындыратын маңызды күн.
Атамның әскери қызметі мен майдандағы көрсеткен ерлігі туралы естеліктер мен ұрпаққа қалдырған тарихы біз үшін үлкен қазына. Ерліктері арқылы біз ата-бабаларымыздың Отанға деген адалдығынан үлгі алуымыз керек. Біз әрқашан сол соғыста қаза тапқан батырларымызды құрметтеп, олардың жауынгерлік жолын ұрпақтан ұрпаққа жеткізуге міндеттіміз. Батыр аталарымыздың есімдері ешқашан ұмытылмай, тарихта мәңгі қалады.
Гүлмира КӨШЕРБАЕВА,
Қорғас орта мектебінің ағылшын
тілі пәні мұғалімі
