Оқи отырыңыз
Мемлекеттік хатшы Қырымбек Көшербаевтың төрағалығымен Қазақстан Республикасы Президенті жанындағы Сыбайлас жемқорлыққа қарсы іс-қимыл мәселелері жөніндегі комиссияның кезекті отырысы өтті. Селекторлық режимдегі басқосуға облыс әкімі Амандық Баталов қатысып, тақырыпқа сай Жетісу жерінде атқарылып жатқан жұмыстарды баяндады.
Жиында тауарларды, жұмыстарды және қызметтерді мемлекеттік сатып алу кезіндегі сыбайлас жемқорлыққа қарсы іс-қимыл жөнінде қабылданған шаралардың орындалу барысы талқыланды. Комиссия төрағасы мемлекеттік сатып алулардың тиімді жұмыс істеуі әлеуметтік-экономикалық мәселелерді шешуге, отандық салаларды дамытуға және ұлттық тауар өндірушілердің өнімдерін қолдауға ықпал ететінін атап өтті. Сонымен қатар, аталған салада сыбайлас жемқорлық тәуекелдері жоғары екені, мұндай жағдай рәсімдік және қаржылық тәртіп бұзушылықтар, бюджет қаражатын ұрлау және өзге де теріс мақсаттағы іс-әрекеттер кезінде орын алатыны айтылды.
Осы тұрғыда аймақ басшысы Амандық Баталов:
– Ашықтықты қамтамасыз ету үшін облыста барлық қажетті шаралар қабылдануда. Мемлекеттік сатып алулар электронды форматта өтеді. Биыл 199 млрд. теңгеге 89 384 келісімшарт жасалды. Бюджет қаражатын тиімді пайдалану үшін облыс, аудан, қала әкімдіктерінде бірыңғай мемлекеттік сатып алуды ұйымдастырушы жұмыс істейді. Сыбайлас жемқорлықтың алдын алу мен түсіндіру жұмыстары жүйелі жүреді. Келіп түскен шағымдарды камералық бақылау арқылы қарауды ұсынамын. Жеткізушілердің келісімшартты дұрыс орындамауы салдарынан заңбұзушылықтар орын алуда. Жарты жылдың ішіне 11 фактінің жетеуіне сот үкімі шығып, қылмыстық жауапкершілікке тартылды. Осы бағыттағы жұмыстар қатаң бақылауда, – деді.
Бұл ретте мұндай құқықбұзушылықтардың басым бөлігі құрылыс, тұрғын үй-коммуналдық шаруашылығы, білім беру, денсаулық сақтау және мәдениет салаларында болатыны, ал ұрланған бюджет қаражатының көлеңкелі айналымға түсетіні туралы айтылды. Жиында Президенттің көмекшісі – Қауіпсіздік Кеңесінің хатшысы Әсет Исекешев мемлекеттік сатып алу кезінде сыбайлас жемқорлық тәуекелдерін төмендету жөніндегі ұсыныстарын жеткізді. Сонымен қатар комиссияда кәсіпкерлік субъектілерінің құқықтары мен заңды мүдделерін сақтау үшін атқарылып жатқан жұмыстар, сатып алу бағаларын асыра көтеру, төленген салықтар туралы мәліметтерді құбылту, мемлекеттік сатып алу порталының тиісті деңгейде қызмет атқармауы, кінәлі адамдардың өз дәрежесінде жауапқа тартылмауы секілді мәселелерді қарастырды.
Комиссия отырысының қорытындысы бойынша Мемлекеттік хатшы бірқатар нақты тапсырма беріп, олардың орындалуы бақылауда болатынын айтты. Қаржы министрлігіне Комиссияның мемлекеттік сатып алу саласындағы мемлекеттік реттеуді қамтамасыз ететін ұсынымын әзірлеу тапсырылды.
Мәулен ӘНЕРБАЙ
