Алматы облысының қоғамдық-саяси, әлеуметтік-экономикалық газеті

СӘБИДІ ҚҰЙРЫҚ МАЙМЕН СЫЛАҒАН ДҰРЫС ПА?

Уақыты: 23.06.2022
Оқылды: 711
Бөлім: БАСТЫ БЕТ

Кезінде әжелеріміз қойдың майын жұқалап турап, он-он бес минуттай шыжғырып, жылы сұйықтықты баланың денесіне жағатын. «Таяқтың екі ұшы болады» демекші, қойдың майымен ысқылаудың пайдасы  аз емес. Табиғи әрі қолжетімді май теріні жұмсартып, қан айналымын жақсартады, суық күні үсік шалудан сақтайды, сонымен қатар, тері ауруларын (күбірткі, қотыр, теміреткі) алдын алады. Сәбидің денесі сымбатты әрі қуатты болады, ал майды емген балаға тұмау тимейді. Ал бала денсаулығы – ұлт саулығы. Осы орайда балалар педиатрі, массажист, хирург, онколог Айгерім Асқарқызымен аз-кем ой бөлістік.

– Баланың кеудесін маймен сылау – тұмау кезіндегі ең үлкен қателік. Ол ауруды одан әрі асқындырып, обструктивті бронхитке әкеліп соғады. Яғни, тыныс жолдарының ісінуі мен қабынуы пайда болады. Ал балаға 3-4 айынан бастап құйрық май сорғызу дұрыс емес. Себебі ондай құнарлы затқа сәбидің бүйрек, бауыр ұйқыбезінде майдың ферменттерін ерітетін без дайын болмайды. Соның салдарынан гастрит, өт жолдарындағы ақаулар, ішек жолдарының ауруы пайда болады –  дейді Айгерім ханым.    

Педиатрдың сөзінше, баланың денесіне массаж жасау барысында, қойдың майы түгіл арнайы дәріханада сатылатын майды жағуға болмайды.  Қазіргі таңда Ресей және Американың медицинасы  оны тек дәрігердің нұсқауымен ғана қолдану керегін айтады. Терінің саңылауларын түрлі сұйықтықтармен бітеу- зат алмасу, дененің тыныс алуын тежеп, физиологиялық жетілуіне кері әсерін тигізеді.

Көпшілікке таныс баланың денесінде «тікеннің» пайда болуы да сол себепті. Айгерім Асқарқызының айтуынша, тікен – тері бездерінің арнайы саңылауларына жиналатын шаң-тозаң. Ал оны сәбидің түктерімен шатастырып та жатады. Бұл туралы маман: «Естіп те жүрген шығарсыздар, бала құрсақта жатқан кезде анасы көп шемішке шақса, онда сәби тікенмен туылады деген миф бар. Ол мүлдем дұрыс емес. Себебі, анасының жегені құрсақтағы балаға еш әсерін тигізбейді. Ал тікен – нәрестенің терісіне жағылған майдан болады. Оны алып тастау әркімнің өз еркінде. Өйткені, оның балаға еш әсері жоқ»,– дейді.

     Медицинада «гипертонус синдромы» деген термин қалыптасқан. Жалпақ тілмен айтар болсақ, «жауырынның жабысуы». Бұрындары баланың мазасы кетіп жыласа, жауырынын бірінші болып тексеріп, жабысып қалған болса, уқалап ашатын. Мұны дәрігер жауырынның астынан өтетін артерияның қысылып қалуымен түсіндірді: «Баланың жауырыны жабысқанын анықтау үшін, сәбидің қолын жоғарыға көтереміз. Егер тыпыршып жылап, мазасы кетсе, жауырыны жабысқан деген сөз. Оны міндетті түрде ашу керек. Себебі, тамыр қысылып тұрған соң, ол жүйкеге қатты әсер етеді», – дейді.

     Дені сау бала – жарқын болашақтың кепілі. Балаңыздың денсаулығына бей-жай қарамай, тек мамандардың көмегіне жүгініңіз.

Дана БӘКІР,
Тұран университетінің студенті