Алматы облысының қоғамдық-саяси, әлеуметтік-экономикалық газеті

ТАЛДЫҚОРҒАН ҚАЛАСЫНЫҢ ӘКІМІ 100 КҮНДЕ НЕ ІСТЕДІ?

Уақыты: 23.06.2022
Оқылды: 640
Бөлім: БАСТЫ БЕТ

Талдықорған – көркейіп, дамып келе жатқан жарқын қала. Облыс орталығы әрі Жетісудың кіндік қаласы болғандықтан  өзіне тән мәселелер де баршылық. Журналистер үйінде «Талдықорған: шаһар басшысы 100 күнде не істеп үлгерді?» деген тақырыпта өткен брифингте қала әкімі Әсет Масабаев көпшілікті мазалап жүрген сұрақтарға жауап берді. 

 Бірінші кезекте бұған дейін даулы мәселеге айналған баспана кезегі мен үй құжаттарына қатысты мәселенің түйінін тарқатты. Қазіргі таңда Талдықорғанда 16 179 азамат тұрғын үй кезегінде тұр. Оның 6187-і – бюджеттік ұйымдардың қызметкері, 9992-і – халықтың әлеуметтік осал табына жататын азаматтар. Сонымен қатар апатты үйде тұрып жатқан тұрғындардың да мәселесі өзекті болып табылады. Талдықорған қаласының аумағында 14 апатты үй бар. Онда 300-ден астам тұрғын тұрып жатыр. Ескі үйлер Кивилев, Шевченко, Абылай хан көшелері мен «Жетісу» шағынауданында орналасқан.    
«Бұл тұрғындарға үй «Нұрлы жер»  бағдарламасы аясында дайындалған «Талдықорған қаласының 2022-2025 жылдарға арналған тұрғын үй қорын реновациялау бағдарламасы» шеңберінде беріледі. Бұл бағдарлама арқылы апатты тұрғын үйлерді сүріп,  азаматтарды жаңа қонысқа көшіру қарастырылған. Бірақ бұл үйлер мұрагерлік жолмен қалдыра алатын жалдамалы үй болып табылады», – деді қала басшысы.
Аялдамалар мәселесі де – жиі көтерілетін тақырыптардың бірі. Сәуір айынан бастап, Шығыс шағынауданында, Шахворостов, Гагарин, Алдабергенов, Біржан сал көшелерінде, Қадырғали Жалайыри даңғылында 10 аялдама кешенін салу жұмысы басталған. Құрылыс жұмысы шілде айында аяқталады деп жоспарлануда.

Қаланың оңтүстік-батысында жаңа шағын аудандар бой көтермек. Қаратал өзенінің оң жағалауы да абаттанады деген жоспар бар. Бұл ретте магистральдық инженерлік желілерді салу, тұрғын үйлер, IT-лицей, оңалту орталығы, сот сараптамалық институтының  құрылысын бастау үшін жобалық сметалық құжаттама әзірленуде. Бұл ретте: «Қазір басты мәселе – жаңа шағын ауданды жылумен, сумен жабдықтау, кәріз желілерін қосу үшін қуат жеткіліксіз. Алдағы уақытта қазандықтардың санын көбейтіп, су мұнараларын салу қажет. Сонымен қатар, инженерлік желілерді салу үшін жобалық сметалық құжаттамасын әзірлеуге қаражат қажет. Тиісті инженерлік желілерге жер учаскелерін бөлу мақсатында жоспарлау жобасын өзгерту керек», – деді Әсет Масабаев.
Брифинг барысында журналистер қала әкіміне сұрақ қойды. «Хабар 24» телеарнасының тілшісі Ардақ Айбарұлының «Неге Балапанов көшесіндегі тегіс жол жөнделіп жатыр? Оның орнына қала шетіндегі ой-шұңқыры көп жолдарды жөндеуге болмас па еді?»  деген сауалына қала әкімі былайша жауап берді: «Бұл қаланың ішіндегі магистральды жол болып саналатындықтан бірнеше жылда бір жөнделіп тұруға тиіс. Қонаев көшесі бойынша 2012 жылы бордюр жасалған болатын. Одан кейін кішігірім ғана жөндеу жұмысы жүрген. Сол себепті биыл Балапанов және одан басқа да бірқатар көше жөнделуде. Бұлар  жобада бекітілген, сараптамадан өткен. «Оның орнына неге қала шетіндегі жолдар жөнделмейді?» деген сұрағыңыз орынды. Ол ауылға қарасты жолдар болғандықтан, кезең-кезеңімен жөнделеді. Ал қала ішіндегі жолдарды жаңартып отыруға тиіспіз», – деді.
Журналист Олег Бессонов қоғамдық көліктер жайына тоқталып, «оқушыларды тасымалдауға жеке автобустар бөлінсе» деген ұсынысын айтты. Оқушылар мектепке барып қайтатын уақыттарда бағыттар бойынша қосымша екі автобустан қосу арқылы бұл мәселені шешуге болатынын жеткізді әкім.
Блогер Алуа Қожахмет  қаламыздың көрікті жеріне айналған Салтанат сарайы, драма театры алдында қоқыс тастайтын жәшіктердің жоқтығын сынға алды.
Брифингте қаланың дамуына, халықтың жайлы өмір сүруіне қатысты бірқатар мәселе көтерілді. Әсет Дүйсебекұлы 100 күнде қаланың тыныс-тіршілігін толық танып, зерделеп үлгергенін байқатты.

 

Алма ЕСЕНБАЙ,
Жетісу облысы