Оқи отырыңыз
2025 жылдың 23 наурызында Жетісу облысының орталығында өткен «Тазару» атты экологиялық акция қала тұрғындарын тазалық пен табиғатқа деген жауапкершілікке шақырды. Бұл шара «Ардагерлер» саябағында ұйымдастырылып, түрлі экологиялық жұмыстарды қамтитын игі мақсаттарды көздеді. Акцияға қала жастары, еріктілер, ардагерлер қауымы және басқа да азаматтар белсене қатысты.
Акцияның негізгі мақсаты – саябақты күл-қоқыстан тазарту, құс ұясын орнату сияқты экологиялық жұмыстар атқарылды. Сонымен қатар, қайырымдылық жәшігі арқылы мұқтаж жандарға киім-кешек жинау мен тарату жоспарланған. Бұл шара арқылы тұрғындар өздерінің экологиялық жауапкершіліктерін түсініп, қоршаған ортаға деген қамқорлықтарын көрсетуге мүмкіндік алды.
Шараға қатысқан тұрғындар үшін ыстық шәй мен бауырсақ тегін ұсынылды. Сонымен қатар, ұйымдастырушылар ұлттық ойындар мен мүгедектігі бар азаматтардың шағын концерттік бағдарламасын да назарға ұсынды. Бұл бағдарламалар шараның көңілді әрі ынтымақты атмосферасын қалыптастырып, барлық қатысушыларды біріктіруге үлес қосты.
«Тазару» эко-акциясы Жетісу облысының мүгедектер қоғамы қоғамдық бірлестігі мен қала әкімдігінің қолдауымен өткізілді. Бұл шара қала тұрғындарының арасында экологиялық сана-сезімді қалыптастыруға және ортақ істерге бірігуге шақырды.
«Тазару» эко-акциясы — бұл тек бір күндік шара емес, ол қала тұрғындарына табиғатқа деген жауапкершілікті және қоғамдағы қайырымдылықты дамытуға бағытталған маңызды бастама. Бұл акция арқылы әрбір адам қоршаған ортаға қамқорлық жасап, жақсылық жасаудың құндылығын сезіне алады.
Санжар СҰЛТАНҒАЗЫ
Фото: Жұмабай МҰСАБЕК
