Оқи отырыңыз
Президент Қасым-Жомарт Тоқаевтың «Жаңа жағдайдағы Қазақстан: іс- қимыл кезеңі» атты биылғы Жолдауы көпшіліктің көңіліндегі ойды қозғады дер едім. Себебі, тікелей эфирден көрген жұртшылық айтылған соны пікірлер мен тың ойларға ерекше назар аударды.
Өз басым тыңдай отырып, еліміздің өркендеуі жолында көптеген игілікті іс қолға алынатынына қатты қуандым. Әрбір салаға қатысты бастамалардың жаңашылдығы көңілді күпті еткен ойларды тарқатып, сенімімді нығайтты. Әсіресе, мемлекеттік биліктің барлық тармағын реформалау керектігін айтуы Қасым-Жомарт Кемелұлының саясаттағы тұлғасын асқақтата түсті. Меніңше: «Егер азаматтарымыздың әл-ауқатын шын мәнінде жақсартқымыз келсе, олардың өздерін осы іске белсенді түрде тартқан жөн. Алдағы саяси реформалардың барлығы халықты мемлекет басқару ісіне кеңінен қатыстыруға бағытталуы керек.
Мысалы, қоғамдық пікір сауалнамалары ауыл әкімдерінің сайлау арқылы қызметке келуіне қатысты сұраныстың артқанын көрсетіп отыр. Бұл маңызды қадамды жан-жақты ойластырып, дәйекті түрде жүзеге асырған жөн. Мұндай жүйенің қалай жұмыс істейтінін нақты білуіміз керек. Алайда, бұл мәселенің шешімін кейінге қалдыруға болмайды. «Келесі жылы бірқатар ауылдық округ әкімдерінің өкілеттік мерзімі аяқталады. Ауыл әкімдерінің тікелей сайлауын өткізуге болады деп ойлаймын» – деген сөзі қордаланған мәселелердің шешім табатынын көрсеткендей болды.
Расында ауылдық округ әкімдері өңірдің өркендеуіне елеулі үлес қосатын тетік саналады. Өйткені, әрбір жердің, әрбір аймақтың кемшілігі мен жетістігін жетік білетін әкімдер қажетті салалардың жұмысын қалай жүргізуді де меңгеретіні анық. Сол себепті, ауылдық округ әкімдерін сайлау бүгінгі күннің кезек күттірмес мәселесі дер едім. Оның үстіне жергілікті халықтың мұң-мұқтажын өз ішінде жүрген жандар жақсы білетінін ескеру керек. Ал, білікті маман атқарған істің игілікке айналатыны белгілі.
Осындай маңызды қадамдар қолға алынғанда елімізді жарқын болашақ, кемел келешек күтіп тұрғанын байқау қиын емес.
Сабазжан СМАҒҰЛОВ,
Кеген аудандық мәслихатының депутаты
