Алматы облысының қоғамдық-саяси, әлеуметтік-экономикалық газеті

СӘУІР АЙЫНАН БАСТАП ЗЕЙНЕТАҚЫ МЕН ЖӘРДЕМАҚЫ ӨСТІ - МИНИСТРЛІК

Уақыты: 15.04.2022
Оқылды: 2095
Бөлім: ӘЛЕУМЕТ

«2022-2024 жылдарға арналған республикалық бюджет туралы» Қазақстан Республикасының Заңына сәйкес 2022 жылғы 1 сәуірінен ең төменгі күнкөріс деңгейі 37 389 теңге, айлық есептік көрсеткіш (АЕК) 3 180 теңге болып белгіленді.

Сәуірден бастап жасына байланысты және еңбек сіңірген жылдары үшін зейнетақы төлемдерінің мөлшері 4 пайызға артты. Бұл ретте жасы бойынша ең төменгі зейнетақының мөлшері – 48 032 теңге.

Базалық зейнетақы төлемінің мөлшері ең төменгі күнкөріс деңгейінің жаңа мөлшеріне пайызбен белгіленеді. Сәйкесінше, 2022 жылғы 1 сәуірден бастап оның ең төменгі мөлшері 20 191 теңгені құрайды. Нәтижесінде базалық зейнетақы төлемін ескере отырып, ең төменгі зейнетақы мөлшері 1 сәуірден бастап 68 223 теңгеге өсті.

Облыс бойынша бұл өсім жалпы есеппен 688 мыңнан астам зейнеткерге қатысты жүргізіледі. Бұдан басқа, 1 сәуірден бастап ең төменгі күнкөріс деңгейі шамасының өзгеруіне байланысты жәрдемақылардың мынадай түрлері 3,8 пайызға артты:

- мүгедектігі бойынша және асыраушысынан айрылу жағдайы бойынша мемлекеттік әлеуметтік жәрдемақылар;

- мүгедектігі бар балаларды тәрбиелеп отырған ата-аналарға, қамқоршыларға берілетін мемлекеттік жәрдемақы;

- бала кезінен І топтағы мүгедектің күтімін жүзеге асыратын отбасыларға (тұлғаларға) төленетін арнаулы мемлекеттік жәрдемақы.

Айлық есептік көрсеткіш мөлшерінің ұлғаюына байланысты келесі жәрдемақы мөлшері ұқсас түрде 3,8 пайызға артты:

- №1 және №2 тізімдер бойынша мемлекеттік арнайы жәрдемақылар;

- бала бір жасқа толғанға дейін оның күтіміне байланысты мемлекеттік жәрдемақылар;

- бала туғанда берілетін біржолғы мемлекеттік жәрдемақы;

- арнайы мемлекеттік жәрдемақы;

- бірге тұратын төрт және одан да көп балалары бар көпбалалы отбасыларға берілетін мемлекеттік жәрдемақы;

- «Алтын алқа», «Күміс алқа» алқаларымен марапатталған немесе бұрын «Батыр ана» атағын алған, «Ана даңқы» ордендерімен марапатталған көп балалы аналарға төленетін ай сайынғы мемлекеттік жәрдемақы.

Осылайша, зейнетақы мен жәрдемақыларды жоғары мөлшерде төлеу Заң жобасына қол қойылғаннан кейін жүзеге асырылады. Бұл ретте сәуірден бастап Заңға қол қойылған айға дейінгі өткен төлемдер қайта есептеледі, ал тиісті қосымша төлемдер кезекті зейнетақы немесе жәрдемақы төлеумен жүргізілетін болады. Төлемдерді жоғарылату қайта есептеуге қосымша өтінішті талап етпей, автоматты режимде іске асырылады.

ҚР Еңбек және халықты әлеуметтік қорғау министрлігі

Еңбек, әлеуметтік қорғау және көші-қон комитетінің Алматы облысы бойынша департаменті