Алматы облысының қоғамдық-саяси, әлеуметтік-экономикалық газеті

ҚАНАТ ЕСБОЛАТОВ КЕРБҰЛАҚ АУДАНЫНЫҢ ӘКІМІ БОЛЫП ТАҒАЙЫНДАЛДЫ

Уақыты: 21.09.2022
Оқылды: 634
Бөлім: ӘЛЕУМЕТ

Тоғыз жолдың торабында, шығыс пен оңтүстікті жалғаған теміржол түйісінде жатқан Сарыөзек кентіне арнайы барған Жетісу облысының әкімі Бейбіт Исабаев Кербұлақ аудандық мәслихат депутаттарының қолдауымен тағайындалған Қанат Есболатовты өңір активіне таныстырып, жұмысына сәттілік тіледі.

Әкімдіктің мәжіліс залында өткен жиында облыс басшысы жаңа әкімнің лебізін тыңдап, жергілікті халықты Күреңбел өңірінің кемел келешегі мен жарқын болашағына қажетті ауқымды да тиімді жобаларды бірлесе атқаруға шақырып, ұйымдаса еңбек еткенде ғана жетістікке жетуге болатынын еске салды.

Одан соң жарыссөзге шыққан зейнеткер Нұрбай Жантілеуов, Кербұлақ аудандық Аналар кеңесінің төрайымы Ғалия Ақбасова, Қызылжар ауылдық ақсақалдар алқасының төрағасы Баян Сырлыбеков жергілікті жұртшылықтыңатынан жаңадан сайланған әкімнің жұмысына табыс, ісіне береке тілеп, аудандағы өзекті мәселелерді бірлесе шешуге дайын екендіктерін жеткізді.

Аудан активі қатысқан алқалы жиынды қорытындылаған облыс әкімі Бейбіт Исабаев Күреңбел өңірінде қордаланған мәселелерге тоқталып, оларды шешудің жолдарын қарастыруды тапсырды. Оның айтуынша, ауыл шаруашылығы бағытындағы ауданда жыл басынан 22,2 миллиард теңгенің өнімі өндірілген.Биыл 99 мың гектар дәнді дақылдар, 11 мың гектар жемшөп,1,5 мың гектар майлы дақылдар, мың гектардан астам картоп егіліп, 165 мыңтонна астық,213 мың тонна шөп дайындалды.Ауданда 132,8 мың гектар жайылым жердің пайдаланылмай жатқандығы анықталып, 8,9 мың гектар жер мемлекет меншігіне қайтарылған. Осы бағыттағы жұмыс жалғасып, аудандағы суару жүйелерін қалпына келтіру қолға алынады. Одан бөлек, аудан жұртшылығын табиғи газбен қамтамасыз ету жұмысы жүреді. Ең өзекті мәселе – Сарыөзек ауылын ауызсумен қамтамасызету әлі күнге шешілмей отыр.

– Жобаны жүргізуде бас мердігер құрылыс-монтаждау жұмыстарын жүргізу кестесін сақтамаған. Мердігерлер қыркүйек айында аяқтау жөнінде уәде берді. Бұл мәселе менің тікелей бақылауымда.Жұмысты қадағалап, бақылауға алмағаны үшін аудан әкімінің осы салаға жауапты орынбасары Д. Жолжановқа «қатаң сөгіс» берілді, – деген Бейбіт Өксікбайұлы межеленген міндеттерді орындаудың бағытын көрсетті. – Біз елді мекендерді таза, сапалы ауызсумен қамтамасыз етуге тиіспіз. Ауданда жыл соңына дейін Талдыбұлақ, Аралтөбе ауылдарына ауызсу беру жоспарланса, Қарашоқы, Ақтөбе ауылдарына келесі жылы беріледі. Шилісу, Шаған, Қосағаш, Қарлығаш, Қарымсақ, Ақбастау, Тастыөзек, Қазансу, Басши ауылдарының ауызсу жүйелерін қайта жаңғырту мен құрылыс жұмыстарының жобалау-сметалық құжаттары дайындалып жатыр.Екі жыл бұрын салынған Онжас ауылының ауызсу жүйсінің сапасы талапқа сай емес, жүйе жиі істен шығады, жерасты су деңгейінің төмендеуіне байланысты ұңғымаларда су тапшы. Тұрғындар тарапынан осы мәселе жиі көтерілуде. Аудан әкімдігі облыстық энергетика басқармасымен бірге ауылға барып, проблеманың себебін анықтап, қабылданатын шаралар туралы маған баяндаңыздар.

Өз сөзінде Малайсары стансысы, Көкбастау, Көктал ауылдарындағы ауызсудың тапшылығы, «Сарыөзек – Көктал» бағытындағы автожолдыкүрделі жөндеу, Қоянкөз, Көксуауылдарының көшелері және Қайнарлы, Малайсары ауылдарының кірме жолын жасау, Қоғалы ауылдық ауруханасына күрделі жөндеу жүргізу, Арқарлы ауылы, Сайлыкөл, Жоламан стансыларына блокты-модульді медициналық пункттер орнату сынды жұмыстар жүргізілетінін жеткізген облыс басшысы жергілікті жұртшылықты жаңа әкіммен бірлесе жұмыс істеуге шақырды.

Мәди АЛЖАНБАЙ

Кербұлақ ауданы,

Жетісу облысы