Алматы облысының қоғамдық-саяси, әлеуметтік-экономикалық газеті

ТАЛДЫҚОРҒАНДА ЖЕТІСУ УНИВЕРСИТЕТІНІҢ 50 ЖЫЛДЫҒЫ ТОЙЛАНДЫ

Уақыты: 31.10.2022
Оқылды: 1048
Бөлім: РУХАНИЯТ

Тарихынан тағылым таратқан, сан шәкіртті елдің ертеңі үшін түлетіп, сан мың жүрекке парасат-пайымы бөлек сүрлеу-сүрдек ұсынған Жетісу жеріндегі басты білім ордасы – І.Жансүгіров атындағы Жетісу университеті жарты ғасырлық тойын өткерді. 

Салтанатты шара аталмыш білім ордасының мәжіліс залында өрнек тауып, зиялы қауым өкілдері, халық қалаулылары ыстық ықыласын арнады. Торқалы тойға арнайы қатысқан Жетісу облысы әкімінің орынбасары Рустам Әли тұғыры биік оқу ордасының білім кеңістігіндегі алар орнын айшықтады.

Иә, осыдан 50 жыл бұрын іргетасы қаланып, есігін қазақтың қара домалақ балалары мен қаракөз қыздары үшін айқарған білім ордасы бүгінге зор тарихи жетістіктермен жетті. Оны салтанатты шарада көрсетілген бейнефильмді тамашалау барысында көріп, шежірелі белестеріне зейін қойдық.

Айта кетерлігі, рухани тойдың әлқиссасы Ілияс ақынның ескерткішіне гүл шоқтарын қоюмен басталғанды. Шара қонақтары оқу орны бас  ғимаратының фойесінде «Жетісу университетіне 50 жыл: білімге, ғылымға, мәдениетке қосқан үлесі» атты көрмені тамашалады. Мерейтойға орайластырылған іс-шара аясында университеттің дәріс залына білім ордасының түлегі, Халық қаһарманы, қазақ ғарышкері Айдын Айымбетовтың есімі берілді. Сондай-ақ, «Журналистика және ақпарат» білім беру бағдарламасының оқу радиостудиясы ашылды.

Құлагер ақынның есімін иеленген, білім көкжиегінде Қазақстанның көшбасшы университеттерінің сапынан орын алған білім шаңырағының тарихын тізбектеген бейнефильмнен кейін, алғашқы болып облыс әкімінің орынбасары Рустам Әли сөз алды. Ол жазиралы аймақ, жұмақ мекеннің әрбір қасиетін айшықтай келе, өңірдің маңдайға басқан жұлдызындай жарқыраған жалғыз университеттің жетісулықтар үшін мақтаныш екенін жеткізді. Сонымен қатар, бүгінгі салтанатқа қатысып отырған университеттің бұрынғы басшыларын көріп отырғанына көңіл сүйсінгенін атап өтті. Жетісу облысының әкімі Бейбіт Исабаевтың торқалы тойға деген ақжарма лебізін арқалап келгенін айтып, 50 жылдық мерейтой ғасырлық думанға ұласа берсін деді. Сонымен қатар, өңір жетістігін, атқарылып жатқан бірегей жоспарлар мен ілкімді істерді жеткізді.

Мерейтой барысында университетке өмірін арнап, сан жылдан бері жастарға телегей білім, терең тәрбие ұсынып келе жатқан бірқатар ұстазға облыс әкімінің Құрмет грамотасы мен Алғыс хатын табыс етті. Физика-метематика факультетінің қауымдастырылған профессоры Айтбай Рахымбековтың кеудесіне ҚР Президентінің жарлығымен берілген «Ерен еңбегі үшін» медалін тақты.

Шындығында елдің ғылым-білім айдынында жемісті желкен көтерген І.Жансүгіров атындағы Жетісу университеті кемел елдің келешегі үшін қалтқысыз қызмет етіп келе жатқан бірегей білім ордасы. Аталмыш шаңырақтың шаттығымен ортақтасқан зиялы қауым мен ел азаматтары ішінде ҚР Парламенті Сенатының депутаты Амангелді Толамисов сөз алып, ҚР Парламенті Сенатының Төрағасы Мәулен Әшімбаевтың, халық қалаулысы Әлия Әпсәметова ҚР Парлементі мәжілісінің Төрағасы Ерлан Қошановтың құттықтау хатын оқыды. Сонымен қатар, бірқатар халық қалаулылары, ұйымдардың төрағалары сөз алып, университет тойына деген жылы лебізін арнап, марапатын табыс етті.

Салтанатты шара әуелеген ән, күмбірлеген күйге толы мерекелік концертпен мәресіне жетті.

Асыл СҰЛТАНҒАЗЫ

Жетісу облысы