Оқи отырыңыз
Алматы қаласында «Business Lady Qazaqstan – 2022» республикалық байқауы өтті. Шарада Алматы облысының ең үздік бизнес ледиі анықталды. Байқаудың мақсаты – қазақстандық кәсіпкер әйелдерге өз жетістіктерін көрсетуге мүмкіндік беру.
«Business Lady Qazaqstan – 2022» жобасының Алматы облысында өткен іріктеу кезеңіне 8 кәсіпкер әйел қатысты. Байқау аясында қатысушылар өздерін таныстырып, қазылар алқасы қойған сұрақтарға жауап берді. Сондай-ақ, өз өнерлерін көрсетті.
– Біз кәсіпкер әйелдердің еңбегін халыққа көрсеткіміз келеді. Жеке басының дамуына ықпал етеміз. Олар үшін тәжірибелі жаттықтырушылар шақырамыз. Біздің жобаға қатысқан арулардың қаншалықты өзгергенін «дейін» және «кейін» деп салыстыру арқылы байқауға болады, – дейді жобаның бас продюсері Аида Хамзина.
Аида Хамзинаның айтуынша, қазіргі таңда көптеген әйел бизнеске бет бұрған. Әсіресе, жас буын кәсіпкерлер жобаға қатысуға көптеп өтініш береді. Олар мұнда өздерін ғана көрсетіп қоймай, тәжірибе алмасып, іскер байланыс орнатып, бизнес саласындағы кейбір мәселені бірлесіп шешуге үлкен мүмкіндік алады.
– Біздің байқау сән байқауы емес. Бұл шығармашылық пен бизнеске апаратын жол. Кәсіпкер әйелдердің қоғам мен мемлекетке тигізген пайдасын елге көрсету. Мәселен, біз әртүрлі брендті білеміз. Бірақ оны кім жасағанын білмейміз. Аталған жобаға қатысқан бизнес ледилер бұл үлкен жолға қалай келгенін, қандай қиындықты жеңіп шыққанын айтып, әріптестерімен бөліседі. Бұл баға жетпес тәжірибе биікті бағындырам деген әйелге үлкен пайдасын тигізері анық, – дейді Аида Хамзина.
Байқауда бас жүлде мен 1 миллион теңгенің сертификатын Анар Ақжанова жеңіп алды. Қылқалам шеберінің бала күнінен есту қабілеті нашар. Бала күнінен сурет салуға әуес. Ол өзінің алғашқы картинасын 12 жасында сатқан көрінеді.
– 25 жасыма дейін көптеген байқауға қатыстым. Қазіргі мақсатым – кәсіпкерлікпен айналысу. Өзім арнайы топ құрып, жаңа деңгейге көтерілсем деймін. Ең үлкен қиындық – қаржының болмауы. Бірақ мен инвесторлардың өнеріме қолдау көрсетуін сұрайтын боламын. Болашақта өз командама басқа суретшілерді де тартамын, олардың шығармашылығына жол ашамын. Өнер біздің мемлекетте қолжетімді болуы керек, – дейді Анар. Сондай-ақ, биыл ол қараша айында Алматыда өтетін «Business Lady Award – 2022» республикалық байқауына өңір атынан қатыспақ.
Аталған жоба 2018 жылдан бастап республиканың барлық аймағында ұйымдастырылып келеді. «Business Lady Award – 2022» жобасына кәсіпкерлікпен айналысатын кез келген әйел қатыса алады.
Айгүл БАЙБОСЫНОВА
Алматы облысы
