ТАБИҒАТТЫ ҚАСТЕРЛЕГЕН БАЛА ЕРТЕҢ ОТАНСҮЙГІШ БОЛЫП ӨСЕДІ. ЕРЕКШЕ АКЦИЯ

Уақыты: 18.04.2022
Оқылды: 1316
Бөлім: КҮНДЕРЕК

Тұмса табиғаттың  көркемдігі мен байлығы адам баласының игілікті ғұмыр кешіп, салауатты өмір сүруіне молынан мүмкіндік береді десек, «Атадан мал қалғанша тал қалсын» деген ғибратты сөзді айшықтаған бабалар тағылымы еске түседі. Қоршаған ортаның желекпен көмкерілуі мен Отанның гүлденуіне үлес қосу ұлтжандылықтың белгісі екені анық. Осы орайда Талдықорғандағы №9 орта мектебінде «Ағаш егу – сауапты іс» акциясы өтті.

Ағаш егу апталығына орай өрнек тапқан акция барысында іс-шараның мән-мазмұны айшықталды. Өз кезегінде шара қонақтары Алматы облыстық «Jetіsý» газетінің бас редакторы Әміре Әрін, Талдықорған гарнизоны баспасөз қызметінің басшысы Жанат Сембаев, Ауған соғысының ардагері Мейрамбай Ержановтардың қатысуымен өткелі тұрған ғибратты шараның негізгі мақсаты – жас ұрпақтың бойына отансүйгіштік, елжандылық қасиеттерін дарыту, табиғатты аялауға бағыттау екені айтылды.

Игілікті істің басында ақ батасын айтып, асқақтата құттықтау сөз сөйлеген облыстық «Jetіsý» газетінің бас редакторы, айбоз ақын Әміре Әрін:

– Табиғатты аялап, Отанды қастерлеуді бабалардың отты сөздерінен, ұлы істерінен жазбай тануға болады. Мақпал топырақтың үстіне біткен әр өскінді аялау, оның тамырын тереңге жіберетіндей баптау жас ұрпақтың бойына бұла күш, елі мен жерін сүйетін ұлы сезімді тудырады. Сонау ықылым заманда әлемге өркениет таратып, жабайы жылқыны қолға үйреткен, әлемде алғашқы болып әліпбиді ойлап тапқан, адамзат баласына шалбар киюді үйреткен түркі халықтарының тектілігі табиғатпен қатар өрілген, асқақтаған, дамыған, – деп асқақтата сөз саптап, ғибратты істің түп-тамырының қайдан бастау алатынына дейін салмақтап берді.

Өз кезегінде аталмыш мектептің директоры Ләйлә Сембаева сөз алып, балауса шақтан табиғатты қастерлеп, Отанды сүйген ұрпақтың шығар шыңы биік, тұғыры берік болатынын жеткізіп, оқушылардың елжанды, білімді, тұлғалық болмысы асқақ азамат болуы алдыңғы толқынның үлгісі, қоршаған ортаның кемел болуына тікелей байланысты екенін жеткізді.

Шара барысында «Жас Ұлан» бірыңғай балалар мен жасөспірімдер ұйымының мүшесі, 10-сынып оқушысы Айназ Оралбек, «Жас полиция көмекшілері» ұйымының белсенді мүшесі, 6-сынып оқушысы Асылхан Ниязов жүректерін тербеген лебіздерін жеткізді.

«Жас Ұлан» бірыңғай балалар мен жасөспірімдер және «Жас полиция көмекшілері» ұйымының мүшелері, белсенді оқушылар және қонақтардың қатысуымен мектеп ауласына 25 түп шырша көшеті отырғызылды. Құнарлы топыраққа тұрақ тепкен шыршалар шыңға бойлар бойшаң болсын деген ақ батасымен айбоз ақын Әміре Әрін шараны бастап берді. Игілікті іс ары қарай өз жалғасын тапты.

Айта кетерлігі, мектеп директоры Ләйлә Сембаева жақында жас ұрпақтың білімін жетілдіру, олардың болашақ мамандығын өзі таңдау мақсатында дайындаған жобаларын Біріккен Араб Әмірлігіне барып, қорғап қайтқан еді. Көбіне ата-аналардың нұсқауымен мамандық меңгеріп, ақырында дипломды сандыққа салып, өз мамандығы бойынша қызмет етпейтін жастардың қатары көбейгені көпке мәлім. Осының алдын алып мектеп қабырғасынан бастап жас жеткіншектерді өз мақсатына құлшындыру, жастайынан жаны қалаған саланы адаспай табуына бағытталған аталмыш ғылыми жобаны БАӘ қорғап қайтқан Л.Айтжанқызы бастаған топ алтын медальмен, арнайы дипломдармен марапатталған-ды.

Асыл СҰЛТАНҒАЗЫ

Алматы облысы