Оқи отырыңыз
Алматы облыстық мәслихатының тұрақты комиссиясының кезекті онлайн отырысы өтті. Комиссия төрағасы Асхат Сүлейменов күн тәртібінде индустриялық-инновациялық, энергетикалық инфрақұрылымдарды, туризмді дамыту, шағын және орта бизнесті қолдау мәселелері қаралатынын айтты.
Туризмді, экотуризм мен этнотуризмді дамытуға экономиканың маңызды саласы ретінде баса мəн беру керектігін айтқан Президент Қасым-Жомарт Тоқаевтың тапсырмасына орай облыс аумағында атқарылған жұмыстар туралы облыстық туризм басқармасының басшысы Жанар Алшымбаева баяндама жасады.
Оның айтуынша, 2017-2019 жылдар аралығында облыста туристік нысандардың саны 15 пайызға, туристік ағым мен көрсетілген қызметтердің көлемі 2 есе артқан. Алайда індеттің таралуына орай шектеу шараларына байланысты туризм саласының даму көрсеткіштері биыл күрт төмендеген. 2020 жылдың 9 айдағы қорытындысы бойынша облыста туристерді қабылдайтын 800 нысан қызмет көрсеткен. Бұл көрсеткіш өткен жылмен салыстырғанда 4 пайызға өсіп, ақылы туристік-сауықтыру қызметтері 32 пайызға төмендеп, 9199 миллион теңгені құраған. Жыл соңына дейін туристік нысандардың саны 808 бірлікке жетіп, 1 мың 500 адамға 11 321,9 миллион теңгеге қызмет көрсетіледі деп жоспарлануда.
– Облыстық туризм басқармасы туристік саланы дамытудың 2019-2025 жылдарға арналған мемлекеттік бағдарлама аясында Алакөл жағалауындағы туризмді дамыту мен Алматы тау кластерінің нысандарына ерекше назар аударуда. Ол үшін 2019 жылы облыстық бюджеттен 191 миллион теңге, 2020 жылы мемлекеттік бюджеттен 4,9 миллиард теңге, оның ішінде, 3,147 миллион теңге облыстық бюджеттен бөлінді. Алматы тау кластерінің дамуы 8 локацияда шоғырланған, алайда мұндағы туристік өнімнің 80 пайызы облыстың үлесіне тиесілі. Бюджет есебінен 110 миллион теңгеге Талғар локациясы бойынша туристік нысандардың инженерлік-коммуникациялық инфрақұрылымының, оның ішінде, автожолдардың құрылысы бойынша техникалық-экономикалық негіздемесі әзірленуде. «Oi-Qaraqai Lesnaya Skazka», «Ақбұлақ» тау шаңғы курорттарын дамыту бойынша жол карталары әзірленіп, бекітілді, – деді басқарма басшысы.
Ұлттық парктердің аумағында экологиялық туризм инфрақұрылымын одан әрі дамыту үшін бірінші кезектегі инфрақұрылымдық жобалардың тізбесі айқындалды. 83 шақырым автомобиль жолдарының, 69 шақырым электрмен жабдықтау желілерінің және 8 шақырым сумен жабдықтау жүйесінің, Шарын өзенінде гидронасос станциясын және автономды кәріз-тазарту құрылысыныңжұмыстары атқарылады.
Басқарма басшысының айтуынша, туризм басқармасының бастамасымен «Жұмыспен қамтудың жол картасы – 2020» бағдарламасының шеңберінде негізгі туристік локацияларда 32 бірлік санитарлық-гигиеналық тораптарды орнатуға 480 миллион теңге бөлінді. Облыстық бюджеттен бөлінген 20,1 миллион теңгеге ұлттық парктердің аумағындағы ең танымал 6 туристік маршрут құрылысы жүргізілуде. 2020 жылы Қайыңды көліне алып баратын ұзындығы 12 шақырым «Саты – Қайыңды» автожолын күрделі жөндеудің жобалық-сметалық құжатын әзірлеу үшін жергілікті бюджеттен 14 миллион теңге бөлінді. Құрылыс-монтаждау жұмыстары 2021 жылдың бірінші жартыжылдығында басталады.
Баяндаманы тыңдаған мәслихат депутаттары Алакөл жағалауына биоәжетхана орнатып, көл жағасын таза ұстау үшін тиісті шараларды қолданып, көлді адамдардың ластануынан қорғау керек деген ұсыныс айтты. Сонымен қатар, Ұйғыр ауданына қарасты Шонжы ауылындағы халық демалатын орындардың көпшілігі жол үстіне салына бастағандығы, Жамбыл ауданында жерленген әулие-әмбиелерге зиярат ету үшін баратын жол мәселесі де назардан тыс қалмады.
Еңлік КЕНЕБАЙ
Алматы облысы
Сурет - ғаламтордан
