Оқи отырыңыз
Өткен жылдан бастап Алматы облысында «Қарапайым заттар экономикасы» салаларын дамыту шеңберінде жобаларды жеңілдікпен несиелеу бағдарламасы бойынша жалпы сомасы 57,1 млрд.теңгеге 192 жоба мақұлданды. Агроөнеркәсіптік кешен, тамақ өнеркәсібі, туризм және қызмет көрсету, жеңіл өнеркәсіп және ағаш өңдеу, өнеркәсіп, электр энергетикасы және басқа салалардағы жобалар жеңілдікті несие алды. Бұл туралы "Жетісу" газеті хабарлады.
Жобаларды іске асыруға мониторинг жүргізу және сүйемелдеу мақсатында «Атамекен» кәсіпкерлер палатасының жанынан жобалық кеңсе құрылып, оның жұмысына облыстық кәсіпкерлік және индустриялық-инновациялық даму басқармасының, «Даму» кәсіпкерлікті дамыту қоры филиалының, «Аграрлық несие корпорациясы» АҚ филиалының және екінші деңгейлі банктердің өкілдері тартылды.
- Жалпы бағдарлама бойынша біз құны 86,2 млрд.теңге болатын 265 жобадан тұратын жобалар тізімін әзірледік. Бағдарламаның операторлары екінші деңгейлі банктер мен аграрлық несие корпорациясы болып табылады. Бүгінгі таңда банктер мен аграрлық несие корпорациясы тарапынан жалпы сомасы 57,1 млрд. теңгеге 192 жоба мақұлданды. Кәсіпкерлік субъектілері қаражатты өндіріс орнын кеңейтуге, мал мен техниканы сатып алуға, көктемгі егіс жұмыстарына алды. Қазіргі таңда тағы 21 жоба қарастырылу үстінде. 38 жоба бойынша құжаттар жиналып, бизнес-жоспарлар жасалуда, – деп атап өтті Алматы облыстық кәсіпкерлер палатасының директоры Әсет Шаяхметов.
Мәселен, бағдарлама бойынша Талдықорған қаласындағы «Жұмағали» шаруа қожалығы дәнді (күріштен басқа), бұршақ және майлы дақылдарды өсіруге 75 млн.теңге алды. Талғар ауданында кеңселік және студиялық жиһаз өндіретін «P.T.Z» ЖШС зауыты 500 млн.теңгеге қаржыландырылып, бүгінде өндірісін кеңейту мен өнім жинағын үлкейтуде. Бағдарламаның арқасында Еңбекшіқазақ ауданындағы «Альтаир» өндірістік кооперативіне құрастырмалы темірбетон және бетон конструкциялар мен бұйымдар өндірісін іске қосу үшін 135 млн.теңге көлемінде жеңілдетілген несие берілді. Кеген ауданында «Тасбұлақ» ЖШС 8,8 млн.теңгеге жылқы сатып алып, мал фермасын ашты.
Айта кетейік, «Қарапайым заттар экономикасы» салаларын дамыту аясында басым жобаларға жеңілдікті несие беру бағдарламасы елде 2019 жылы іске қосылды.
Айгүл БАЙБОСЫНОВА
Алматы облысы
Сурет ғаламтордан алынды
