Оқи отырыңыз
Премьер-Министр Асқар Маминнің төрағалығымен өткен Үкімет отырысында еліміздің 2021 жылғы қаңтар-тамыз айларындағы әлеуметтік-экономикалық дамуы және республикалық бюджеттің атқарылуы қорытындыланып, елдегі санитарлық-эпидемиологиялық жағдай мен алдағы күзгі-қысқы кезеңге дайындығы сараланды. Селекторлық жиынға Алматы облысының әкімі Амандық БАТАЛОВ онлайн режимде қатысты. Бұл туралы "Жетісу" газетінің тілшісі хабарлады.
Аталған жиын еліміздің жаңа Экология, геология және табиғи ресурстар министрі Серікқали Брекешевтің мемлекеттік қызметші антын беруімен басталды. Алғашқы баяндаманы ҚР Денсаулық сақтау министрі Алексей Цой жасап, еліміздегі санитарлық-эпидемиологиялық жағдайдың жақсарып келе жатқанын жеткізді. Оның айтуынша, вирустың репродуктивті индексі 0,87 пайызға, ал инфекциялық және реанимациялық төсектердің жүктемесі 35%-ға дейін төмендепті. Коронавирустың таралу қарқыны бойынша Түркістан облысы «жасыл аймақта», Шығыс Қазақстан, Жамбыл, Қызылорда, Солтүстік Қазақстан және Батыс Қазақстан облыстары «сары аймақта» орналасқан. Қалған 11 аймақ «қызыл аймақта» тұр. Бүгінгі таңда вакцинаның бірінші компонентін 7,1 миллионға жуық, екінші компонентін 6 миллион адам алыпты. Үкімет басшысы екпе алудан кенжелеп тұрған Батыс Қазақстан және Маңғыстау облыстарында жұмысты күшейту қажеттігін ескертіп, «қызыл аймақта» орналасқан өңірлердегі сырқаттанушылық деңгейін тұрақты төмендету жайлы аймақ басшыларына тапсырма берді.
Бір қуанарлығы, жиналыста Үкімет басшысы Қазақстан экономикасының даму көрсеткішінің пандемияға дейінгі деңгейге жеткенін атап өтті. Биылғы жылдың сегіз айының қорытындысы бойынша жалпы ішкі өнімнің өсімі 3% құрапты. Осыған орай экономиканың дамуы, ақша-несие саясаты, республикалық бюджеттің атқарылуы, мемлекеттік сатып алудағы жергілікті қамту туралы ұлттық экономика министрі Әсет Ерғалиев, ұлттық банк төрағасы Ерболат Досаев, Қаржы министрі Ерұлан Жамаубаев, әлеуметтік маңызы бар азық-түлік тауарлары бағасына қатысты жағдай туралы Сауда және интеграция министрі Бақыт Сұлтанов, өнеркәсіп пен энергетика секторының дамуы туралы Индустрия және инфрақұрылымдық даму министрі Бейбіт Атамқұлов пен Энергетика министрі Мағзұм Мырзағалиев, агроөнеркәсіптік кешендегі ахуал туралы Ауылшаруашылығы министрі Ербол Қарашөкеев баяндады.
Олардың айтуынша, биылғы қаңтар-тамыз айларында Алматы, Жамбыл, Қостанай, Маңғыстау облыстары және Шымкент қаласы барлық 7 негізгі макрокөрсеткіш бойынша, Ақмола, Ақтөбе, Атырау, Қарағанды, Қызылорда, Павлодар, Солтүстік Қазақстан облыстары және Нұр-Сұлтан қаласы 6 көрсеткіш бойынша, Шығыс Қазақстан, Түркістан облыстары және Алматы қаласы 5 көрсеткіш бойынша әлеуметтік-экономикалық даму өсімін қамтамасыз етіпті. Батыс Қазақстан облысы ең төменгі көрсеткішті көрсетіп тұр. Үкімет басшысы әкімдіктерге көрсеткіштердің төмендеуі мен баяулауы байқалатын экономика секторларында өсу қарқынын арттыруды, экономиканы одан әрі әртараптандыру, инвестициялар тарту және жұмыс орындарын құру жөніндегі жұмыстарды жалғастыруды тапсырды.
Жылыту маусымына әзірлік бойынша жүргізіліп жатқан жұмыстар да көңіл қуантады. Энергетика министрі Мағзұм Мырзағалиевтың айтуынша, қазіргі таңда еліміз бойынша 10 мыңнан астам автономды қазандық, 45,6 мыңнан астам тұрғын үйдің қысқы дайындығы біткен. 3,8 мың шақырым жылу желілері, 13,6 мың шақырым сумен жабдықтау желілері жөнделіпті. Жылыту маусымына 11,1 мыңнан астам білім беру объектісі және 5,7 мың денсаулық сақтау объектісі сақадай сай. Көмір өндіруші компаниялар 68 млн. тонна көмір өндіріпті. Есесіне тұтынушылардың коммуналдық қызметтер үшін берешегі 14,4 млрд. теңгеге жеткен. "Көш басында" Алматы, Нұр-Сұлтан, Шымкент қалалары мен Қызылорда облысы тұр.
Үкімет басшысы әкімдіктерге білім беру, денсаулық сақтау объектілері мен үйлерде жоспарланған жөндеу жұмыстарын белгіленген мерзімде аяқтауды тапсырды.
Қажет АНДАС
