Оқи отырыңыз
Жетісу облысы әкімінің міндетін атқарушы Жеңіс Тұяқов азаматтарды жеке мәселелері бойынша қабылдап, 6 азаматтың талап-тілегін тыңдап, өзекті мәселелердің шешілуіне қажетті тетіктерді қарастырды. Көбінесе азаматтар баспана, әлеуметтік көмек, жол қауіпсіздігі мәселелеріне қатысты сұрақтар қойды.
Талдықорған қаласының тұрғыны, ардагер-педагог Хания Есдәулетова Д. Қонаевқа арналған кітапшаларды шығарып, таратуға қолдау көрсетуді сұрады. Тұрғын үймен қамтамасыз ету мәселесін де көтерді. Жеңіс Тұяқов бірінші мәселе бойынша қолдау көрсетілетінін, мемлекеттік қордан баспана беруге келсек, ол үшін кезекке тұру керектігін айтты.
Алакөл ауданының тумасы Берік Байқуанышевты да баспана алаңдатады екен. Зейнеткер, 2-ші топтағы мүгедек өмірлік қиын жағдайға тап болып, 5-қабаттағы жатақхананың бір бөлмесін 10 мың теңгеге жалға алуға мәжбүр болыпты. Бұған дейін Талдықорған қаласында тұрған. 2019 жылы баспана кезегінде 25-ші болса, биыл 3343-ке ауысып кеткен. Себептерін нақтылау керек. Әзірге аудан әкімдігіне демеушілер арқылы тұрғын үйді жалдау ақысын төлеуге көмек көрсету тапсырылды.
Бақытжан Шаяхметова облыстық психикалық денсаулық орталығында медбике болып жұмыс істейді. 40 жылдай бюджеттік салада жүрсе де жеке баспанасы жоқ. Келесі жылы зейнеткерлікке шыққан соң бюджеттік ұйымның қызметкері кезегінен айырылады екен. Енді оған соттан көмек сұрау керек. Оң шешім болған жағдайда ағымдағы кезекті сақтап қалуға болады.
Қаратал ауданы, Үштөбе қаласының тұрғыны Ләззат Шалабаева «Қазақ халықаралық қатынастар және әлем тілдері» университетінің табалдырығын аттаған ұлының оқу ақысын төлеу үшін көмек сұрады. Жалғызбасты ана теміржол вокзалында диспетчер болып жұмыс істейді. Айлығы шайлығынан артылмайтындықтан қаражат жетіспейтінін алға тартты.
Облыс әкімінің міндетін атқарушы мұндай шығыстар бюджетте қарастырылмағанын айтып, тек демеушілер ғана қаржылай көмек көрсете алатынын түсіндірді.
Сарқан ауданының тұрғыны Еркеш Денисламова жеке мәселесі бойынша заңгерлік көмек сұрады. Оған тиісті қолдау көрсетіледі.
Жеке кәсіпкер Салтанат Ибадуллаева «Жастар-2» шағынауданына қатысты бірқатар түйткілдерді көтерді. Атап айтсақ, республикалық маңызы бар Талдықорған – Үштөбе жолына «Сергек» бейнебақылау камераларын орнату, №228 бағыттағы автобустар санын көбейту сынды өзекті мәселелерді қозғады. Сондай-ақ, Еркін ауылындағы кәріз бен тазарту құрылыстарынан шыққан жағымсыз иіс мәселесі қашан шешілетінін сұрады.
Талдықорған қаласының әкімі Әсет Масабаев алдағы жылға қала бюджетінен 25 «Сергек» камерасын сатып алып, орнатуға қаражат қарастырылғанын айтты. Оның бірі Талдықорған –Үштөбе жолының тұрғындарды алаңдатып отырған бөлігіне, қаладан шыға беріске орнатылады. Мұнда қауіпсіздікті қамтамасыз ету мақсатында жол учаскесін 2 жолақтан 4 жолаққа дейін кеңейту де пысықталуда. Жобалық-сметалық құжаттаманы әзірлеуге қаражат бөлініпті. Жалпы қала бойынша автобустардың санын көбейту мәселесі алдағы жылы ғана шешімін таппақ. Ал, мектеп оқушыларын тасымалдауға келсек, балалардың қала ішінде және тағы да басқа мектептерде білім алуына байланысты мұндайға мүмкіндік жоқ. Бұл ретте Талдықорған қаласының барлық оқушылары мен студенттеріне қоғамдық көлікте тегін жүру қарастырылған.
«Жайлы мектеп» ұлттық жобасы аясында 900 орынды мектеп құрылысы 2024 жылы басталады деп жоспарлануда. Бұл туралы облыстық білім басқармасының басшысы Айжан Адамбекова мәлімдеді. Қажетті құжаттаманы дайындау жұмыстары жүргізілуде, жер телімдері анықталыпты. Нысан 2025-2026 жылдары пайдалануға беріледі.
Облыс әкімінің міндетін атқарушы Жеңіс Тұяқов көтерілген мәселелер бойынша басқарма басшыларына, аудан, қала әкімдеріне нақты тапсырмалар берді.
Гүлжан ТҰРСЫН,
Талдықорған қаласы
