Оқи отырыңыз
Алматы облысының полицейлері интернеттегі алаяқтықтың кең таралған түрлері жайында айтып берді. Бұл туралы "Жетісу" газеті хабарлады.
Бүгінгі күні елімізде кеңінен жайылып келе жатқан интернеттегі алаяқтық өте қауіпті қылмыс түріне айналып үлгерді. Талай адамды тақырға отырғызатын интернет алаяқтық дегеніміз – ақпараттық құралдарды қолдану арқылы жасалатын алаяқтық қылмысы болып табылады. Интернет алаяқтықтан сақтану үшін алдымен сіздер көрсетілетін қызметтердің нақтылығына көз жеткізіп алуларыңыз керек.
Интернет алаяқтықтың елімізде жиі кездесетін дерегіне тоқтала кетсек.
Біріншіден, интернетте тауарды сату немесе қызмет көрсету туралы хабарландыру орналастырылады. Яғни, алаяқтар құрбандарын тауардың төмен бағасымен, қолжетімділігімен қызықтырады. Кейін олар тауардың 50 пайызын алдын ала төлеу керектігін айтады. Ал төлем жасалғаннан кейін іске үшінші адам араласады. Ақшаны алған соң зардап шегушіге тауардың басқа елде екені, оны елге жеткізу керегін, мәселелер туындап жатқанын айтады. Кейін телефон нөмірі өшіріліп, тауар жоқ болады.
Екіншіден, онлайн кредит рәсімдеу дерегі жиі кездеседі. Алаяқтар өздерін банк қызметкері ретінде таныстырады. Олар клиенттердің картасында күмәнді операция жүргізілгенін айтады. Осы әрекетті бұғаттау үшін картаның артындағы 3 таңбалы санды айту керек деп түсіндіреді. Қажет болған мәліметті алған соң хабарласып мәселенің шешілгенін айтады. Алайда олар осы сәтте интернет-банкинг арқылы зардап шегушінің есепшотындағы ақшаны алып қояды. Сондықтан, өздеріңіздің жеке мәліметтеріңізді ешкімге бермей, осы секілді хабарламалар түсіп жатса, міндетті түрде банкке барып, мән-жайды тікелей сұрастырыңыздар.
Үшіншіден, қоңырау шалып немесе хабарламалар жіберу арқылы белгілі бір іс-шарада жеңіске жеткенін, арнайы сыйлыққа ие болғанын айтатынын жеткізеді. Олар бұл әрекетке мұқият дайындалады. Сыйлықты жолдау үшін жеке мәліметтерін сұратады.
Төртіншіден, қылмыскерлер пайда табу үшін әлеуметтік желіге жарнама береді. Көбінесе биржаға немесе букмекерге аз ақша салып, көп ақша табуға болатынына сендіреді. Салдарынан олар алаяқтардың құрбандары болады.
- Алаяқтардың құрбаны болмау үшін ең алдымен, жеке мәліметтеріңізді ешкімге бермеңіздер. Күмәнді тексерілмеген ақпаратқа сенбеңіздер. Тауарды тексермей, оған алдын ала төлем жасамаңыздар. Дүкенге хабарласу арқылы тауардың бар-жоғын тексеріп алғаныңыз абзал. Күмәнді келісімдер бойынша ақша аударудың керегі жоқ. Табыс көзі әрқашан ашық болуы тиіс. Құрылғыңыздағы кұпиясөзді үнемі ауыстырып отырыңыз. Бұл ертең сіздің жеке мәліметіңізді басқа біреу пайдаланбауы үшін қажет. Ең маңыздысы, әрқашан сақтық шараларын ұмытпауларыңыз қажет, - деп ескертеді Ақсу ауданы полиция бөлімі бастығының міндетін атқарушы, полиция подполковнигі Айдос Қалжатбай.
"ЖЕТІСУ-АҚПАРАТ"
Сурет - ғаламтордан
