Алматы облысының қоғамдық-саяси, әлеуметтік-экономикалық газеті

РЕСПУБЛИКА БОЙЫНША ЕҢ ҮЗДІК АУЫЛ ӘКІМІ АНЫҚТАЛДЫ - МЕМЛЕКЕТТІК ҚЫЗМЕТ

Уақыты: 27.12.2022
Оқылды: 1337
Бөлім: ҚҰҚЫҚ-ЗАҢ

Мемлекеттік қызмет істері агенттігінің төрағасы Дархан Жазықбаев «Үздік ауыл әкімі» республикалық байқауының жеңімпаздарымен кездесті.

Аталған агенттік бастамасымен ауылдық округ әкімдері арасында «Үздік ауыл әкімі» республикалық конкурсы өткізілді. Конкурстың мақсаты үздік ауыл әкімдерін анықтау және насихаттау.

Кездесу барысында агенттік төрағасы үздік ауыл әкімдерін өз қызметінде халықтың сұранысына сай ашық, адал әрі әділ болу маңыздылығына тоқталып, аталған байқаудың ауылдарды дамытуға және де осы бағыттағы жұмыстарды жандандыруға оң септігін тигізетіндігіне сенім білдірді. Өз кезегінде ауыл әкімдеріне ҚР Президентінің жанындағы Мемлекеттік басқару академиясында көшбасшылық, сөз сөйлеу, дағдарыстық коммуникация және басқа дағдыларын шыңдауға арналған арнайы тренингтер өткізілді.

Атап өту керек, конкурсқа қатысу үшін еліміздің түкпір-түкпірінен жүзге жуық ауылдық округ әкімі өтінім берді. Облыстардың арасында Қостанай облысынан 14 әкім, Солтүстік Қазақстан және Жамбыл облыстарынан 12 әкім конкурсқа өтінім беріп, белсенділік танытты.

Байқау екі кезеңде өткізілді: өңірлік және республикалық.

Өңірлік кезеңге қатысушылар ауылдық жерлерде халықтың өмір сүру жағдайларын жақсартуға бағытталған жобаларды қорғап, экономикалық және әлеуметтік әсері бар ауылды дамыту жөнінде ұсыныстар енгізді. Екінші кезеңде ауыл әкімдерінің проблемалық жағдайлар бойынша ситуациялық кейстерді шешу қабілетіне баға берілді.

Конкурс қорытындысы бойынша Түркістан облысы Шардара ауданы Жаушықұм ауылдық округінің әкімі Нұрбақыт Нұрсейітов «Үздік ауыл әкімі» атағын иеленді.

Екінші орынды Павлодар облысы Успен ауданы Новопокровск ауылдық округінің әкімі Вячеслав Николаевич Симоненко, үшінші орынды Ақтөбе облысы Шалқар ауданы Айшуақ ауылдық округінің әкімі Оралбек Әбшанов ие болды. Сондай-ақ, Шығыс-Қазақстан облысы Ұлан ауданы Аблакет ауылдық округінің әкімі Арыслан Агланбеков – «Үздік шаруашыл әкім», Қарағанды облысы Нұра ауданы Баршын ауылдық округінің әкімі Зәуре Мұқанәлиева – «Ашық әкім», Солтүстік-Қазақстан облысы Аққайың ауданы Шағалалы ауылдық округінің әкімі Гүлмира Добромирова – «Үздік әлеуметтік жоба» номинацияларының иегерлері атанды.

Байқау жеңімпаздары мен номинация иегерлері Мемлекеттік қызмет істері агенттігі төрағасының Құрмет грамотасымен марапатталды.

ҚР Мемлекеттік қызмет істері агенттігінің баспасөз қызметі