«МЕКТЕПКЕ ЖОЛ» жақындай түспек

Тамыз айының 1-інен әлеуметтік жағдайы төмен отбасын қолдау, балалардың мектепке бармай қалуының алдын алу мақсатындағы «Мектепке жол» атты республикалық акциясы басталды. Қыркүйектің 30-ына дейінгі екі айды қамтитын акция  ҚР Білім және ғылым министрлігінің бастауымен жыл сайын жүзеге асуда. Оған ел көлеміндегі әр облыс, аудандар мен қалалар үлес қосуда. Осыған орай облыстық әкімдікте облыстық басқарма басшылары мен БАҚ өкілдерінің қатысуымен баспасөз мәслихаты өтіп, онда акцияның ұйымдастырылуы мен насихатталуы жайы сөз болды.

Баспасөз мәслихатын аш­қан облыс әкімінің орын­баса­ры Бақтияр Өнербаев «Мек­тепке жол» акциясы бары­сын­да жас жеткіншектерге қолдау көрсету әр азаматтың парызы екенін атап өтіп, бұл іске об­лыс тұрғындарын түгелдей жұмылдырып, әсіресе, қал­талы азаматтар мен мекеме, ұйым­дардың көмекке зәру балаларға қол ұшын беруіне ықпал ету керектігін айтып өтті. 

– Өткен жылы көптеген нә­ти­желі жұмыстар жүргі­зілді. Соның арқасында 51 237 бала­ға 427 млн. 500 мың теңге көле­мінде көмек   көрсетілді, оның ішінде 46 392 оқушыға 375 млн. 8 мың теңгеге демеу­шілік есе­бінен оқу құралдары мен мектеп формасы алынды.

Ішкі істер бөлімдерімен ке­лі­сілген рейдтер кестесі жаса­лып, түнгі клубтар мен ойын залдары, көңіл көтеретін орын­дарды, қала сыртындағы шаруа қожалықтарын және сая­жай­ларды аралады. Барлығы  13 149 рейд жасалып, 1 035 ішкі істер бөлімінің қызметкері және ата-аналар қоғамы, тағы басқалары қатысты. Рейд барысында 99 050 аула мен үйді аралап, оған  27 790 мұғалім тартылды.

Қала, аудан арасында бюд­жет­тен тыс қаражат есебінен басым көмек көрсеткендер – Талдықорған, Қапшағай қала­лары мен Жамбыл, Еңбек­ші­қазақ, Алакөл, Қаратал аудан­дары. Биыл да осындай жұмыс­тар атқарылып, балалардың мектепке толық баруы қам­тама­сыз етіледі, – деді өз сөзін­де Бақтияр Әлтайұлы.

Биылғы «Мектепке жол» акциясы ел Тәуелсіздігінің  25 жыл­дығына орай «Бақыт­ты балалық шақ мекені» атты ұран­­мен өтуде. Шара аясында «Бала­ларды мектепке жинау­ға кө­мек­тес», «Оқушыға мек­тепке барар жолды табуға көмек­­тес», «Барлық балалар мек­тепте оқу­ға тиіс», «Мен мек­тепті таң­даймын» атты қайы­рымдылық көрсе­туші­лер не­ме­се меценат­тар фестивалі ұйымдасты­рыл­мақ.

Облысымызда бүгінгі күні акция мақсатымен халықты таныстырып, ақпараттандыру жұмыстары жүргізілуде. Мұқ­таж балалар тізімі аудан­дық, қалалық білім бөлімдерінде бекітіледі.  Көмек алуға үмітті ата-аналар осында келіп тізім­деліп, акция барысында туын­даған сұрақтарын көлденең тарта алады. Бұл турасында жиын барысында облыстық білім басқармасының бас­шы­сы Ләззат Базарқұлова айтып, жур­налистерді толғандырған сауалдарға жауап берді. Бар­ша облыс тұрғындарын қайы­рым­дылық акциясына үлес қосып, одан шет қалмауға шақы­ра­мыз.

 

Алма ЕСЕНБАЕВА.

---