Аудан орталығындағы Мәдениет үйі күрделі жөндеуден өтті. Маусымда басталған жұмыс шілде айының аяғында сәтімен аяқталды. Аудан орталығындағы көрнекті өнер ордасының шаңырағы тұтас ауыстырылды.
От жағар ғимараты бөлек жасалды. Үш жүзге тарта жаңа орындық қойылды. Киім қоятын арнайы бөлме қамдастырылды. Мұнда киім реттейтін арнайы шеберхана бар. Аспаптар қоятын бөлек бөлмесі тағы бар. Кеген халық театры мен «Ереуіл» фольклорлық-этнографиялық ансамбльдерінің дайындық жасайтын арнайы бөлмелері қамдастырылған. Кең залдың сахна төрі жарықтандырылды. Айта берсек, күрделі жөндеудің тигізген шарапаты көп.
– Шын мәнінде, халықтық атағы бар екі өнер ұжымы үлкен қуанышқа кенелді. Биылғы жаңа маусымға шығармашылық жаңа табыстармен, ізденістермен дайындық жасап жатқан жайымыз бар. Кеген халық театры Тынымбай Нұрмағанбетовтің «Табалдырығыңа табын» атты қойылымын сахнаға әзірлеу үстінде. Оның сыртында облыста өтетін фольклорлық ансамбльдердің байқауына да дайындық жасаудамыз. Ең қуаныштысы, күрделі жөндеуден өткен Мәдениет үйіне жаңа аспаптар мен киімдер енді келеді деп күтілуде. Бұл да қуанышымызды асқақтатып отыр, – дейді аудандық Мәдениет үйінің жанындағы «Ереуіл» фольклорлық-этнографиялық ансамблінің көркемдік жетекшісі Кәдірбек Сүлеймен.
Аудандық Мәдениет үйінің жанындағы халықтық атағы бар екі ұжымда майталман өнер иелері еңбек етеді. Олар ауданда өтетін іргелі шаралардың, халықтық мерекелердің көркі мен келбеті іспетті. Аудандағы жиын-тойлар солар арқылы ажарланып, жайнап, жаңғырып сала береді. Ілия Әбженбаев, Самиға Әлдекенова, Медет Құныпияев, Асан Дидар, Ақмарал Сүлеймен, Бейқұт Бекібаева секілді өнер иелерінің атына айтар алғыс мол.
– Тәуелсіздігімізден айналайық! Еліміз аман, жұртымыз тыныш болсын! Аудандағы қара шаңырағымыз күрделі жөндеуден өтті. Ел басқарған азаматтарға айтар алғысымыз мол, – дейді Кеген халық театрының режиссері, Қазақстанның еңбегі сіңген мәдениет қызметкері, Райымбек ауданының Құрметті азаматы Нағима Таласбаева.
Кеген халық театрының белді мүшесі, «Ереуіл» фольклорлық-этнографиялық ансамблінің күміскөмей әншісі Самиға Әлдекенова мақтаулы өнер иесі. Алматы қаласындағы эстрада студиясын 1985 жылы бітірген Самиғаның аудандық Мәдениет үйінде еңбек етіп келе жатқанына отыз жылдан асты.
– Менің бар ғұмырым, бар өмірім осында өтуде. Шығармашылық жолдарым осында өрнектелді. Бақытым да, бар қуанышым да осы бір ортада өтуде десем, артық айтпаймын. Еліме, халқыма жақсы әндерімді сыйлап келемін. Елім, өнерім мені жақсы күндеріме талпындырады. Соған разымын, – дейді күміскөмей әнші Самиға Әлдекенова.
Қанат Біржансал.
Райымбек ауданы.