Оқи отырыңыз
Адам мамандық таңдау- дан жаңылыспауы керек. Бала кезден «Кім болам?» деген сауал әрбіреудің көкірегінде маздап жүретіні анық. Сол сұраққа көпшілігі «мұғалім боламын» деп жататынын жиі аңғарамыз. Ал ұстаздық ету екінің бірінің қолынан келеді деу оңай болғанымен, іске көшкенде қиын мәселе, әрине.
Елдің болашағы білімді жастар екені бәрімізге мәлім. «Білімдінің күні – жарық, білімсіздің күні ғаріп» демекші, көзі ашық, көкірегі ояу кез келген білімді ұрпақ өз Отанының жолында аянбай тер төгуі тиіс.
Білім адам баласының қоршаған ортаны танып білуге, оны меңгеруге деген ұмтылыстың ең ұлысы. Төле би бабамыз- дың мына нақыл сөзін түйсінген абзал: «Біліп айтқан сөзге құн жетпейді, тауып айтқан сөзге шын жетпейді» деп ой түйінін түйетін еді. Өзің білмесең білгендерден үйрену керек. Сондықтан да білмегенді үйрену айып емес.
Жас ұрпақ біздің болашағымыз. Жастарды тәрбиелеу бүгінгі аға буынға басты міндет болса, ал ұрпақтың білім нәрімен сусындауы ұстазға жүктелген іс. Ата-ана мұғаліммен тығыз байланыста болып, бала тәрбиесіне жауапты екенін ұмытпауы тиіс.
Атамекен ауылындағы А. Розыбакиев атындағы орта мектеп КММ-дегі білікті басшы Әсем Нұрбаева ата-ана мен оқушы көңілін таба білген сыйлы жан екенін тілге тиек еткенді жөн көрдім. Сонымен қатар білімді де білікті физика пәнінің мұғалімі Айсұлу Сейтқасымова да мамандығына адал, оқушылар үшін аянбай қызмет қылып жүрген ардақты ұстаздардың бірі. Жас болса да өте еңбекқор, жаңа заман талабына сай жеткіншектерді ақпараттандырып, олармен өнегелі сабақтар өткізіп, шәкірттерін үнемі жарыстарға апарып, аудандық олимпиададан жүлделі орындардан көрінуіне ықпал етіп келеді. Ізденіс үстінде жүретін, қосымша сабақтар өткізіп, барлығына уақыт таба білетін нағыз өз ісінің маманы.
Біз осындай мамандық таңдаудан қателеспеген, ісіне адал жас мамандармен ортамыз толысып келе жатқанына дән ризашылық білдіреміз. Олардың келешегі жарқын боларына, қызметіне құлшына кірісетін ұстаздан білім алған оқушының болашақта осал болмайтынына иланамыз. Ел игілігі үшін тер төгетін мамандардың мақсатына жетуіне тілекшіміз.
Тоқтаргүл КИГІЗБАЕВА
ардагер ұстаз
Атамекен ауылы
Панфилов ауданы
