Сөредегі сірескен кітаптардың ең көнесі – сонау ғасырдан қалған, мұқабасы сарғыш тартқан жыр-дастандар болса, одан кейінгілері Міржақып Дулатұлы, Бейімбет Майлин сынды Алаш арыстарының, Мұхтар Әуезов, Ғабит Мүсірепов сынды классиктердің том-том туындылары. Өткен ғасырдың алғашқы ширегіндегі көсемсөз шеберлерін айтпағанның өзінде әдебиеттің алтын ғасыры деп мойындатқан буынның кітаптары қолдан-қолға өтіп, көп оқылғандықтан әбден тозығы жетіп, үлбіреп тұратын. Сондықтан да «ең бақытты жазушылар осылар» деп бағалаушы едік. Сол қатардан табылатын қаламгердің бірі де бірегейі Бексұлтан Нұржекеев.
Қазақтың Мопассаны, махаббаттың мүсіншісі һәм жыршысы сынды ғажайып атқа ие болған Бексұлтан Нұржекеев оқырманы көп жазушы. Менің балаң жүрегімнің төрінен де әлдеқашан орын алып, жастық жігерімді жалындатып, кітапқа деген құмарлығымды ашқан да осы Бексұлтан аға болатын. Зерделі сөздің зергеріне айналған жазушының барлық шығармасы дерлік менің де құшағымда жүріп, жырым-жырымы шыққаны да шындық. Дұрыс түсініңіз, көзі қарақты оқырман «жырым-жырымы шығып» дегенде ойыншыққа айналдырды екен деп қалмаңыз. Керісінше, қайта-қайта оқып, біраз замандастарымды қызықтырып, нәтижесінде тең құрбыларымның біразын Бексұлтан ағаның әлемімен танысуға себепкер болғанымды мақтанышпен айта аламын. Бүгінгі таңда ең көп оқылатын жазушы кім деген сауланама жүргізіліп, оған кітапқұмарлардың: «Бексұлтан Нұржекеев» деп жауап қатқанын ескерсек, қарымды қаламгердің әр жазғаны көпшіліктің жүрегімен бірге соғып, Мәңгілік Елмен қатар жасаса беретін туындыға айналып кеткеніне көз жеткізесіз.
Көрнекті жазушы мәңгілік тақырыпты қаузаудағы шеберлігі мен адам жүрегінің нәзік пернесін дөп баса білетіндігімен, қоғамдықтан асып, адамзаттық ойдың мөлдір тұнбасын туындысына салып, ғажайып оқиғаларды сабақтау арқылы сананы жадылап алатын сиқыр күштің иесі. Тіпті, шығармасын қайталап оқыған сайын сырлы сезімнің сәуегейі секілді көрінеді де тұрады. Міне, қолымда жазушының жаңа туындысы. Ұлт-азаттық көтерілістің 100 жылдығына арналып, «Қарқара-100» сериясымен жарыққа шыққан роман мұқабасының қызуы әлі кете қойған жоқ. Көз алмай оқып шығуға деген қызығушылығымның артып тұрғаны да содан шығар. Осылайша туындыға деген ынтық жүректің құлшынысымен тарихи романды бір деммен оқып тастадым. Еріксіз «Әй, дүние-ай», деген күрсініс өңешіме кептеліп қалды. Сөз зергерінің қарымды қаламынан әр жылдарда туындаған «Кінәлі махаббат», «Күй толғақ», «Бір өкініш, бір үміт», «Ерлі-зайыптылар», «Жау жағадан алғанда» сынды көптеген шығармалары шырайы махаббат пен іңкәрлік, адамгершілік сынды асыл қасиеттермен қанықса, бұл еңбегінің мәні мен мазмұнын шыншылдығы арттырғандай. Жалпы, бақытты жазушының 13 томдық жинағына қарап ерен еңбегін бағалауға болады. Алайда, саны емес, сапасына мән беріп, кіл жауһарын іздейтін кемеңгер елдің әдеби қорына қосқан туындыларының барлығы да сахарада жалтылдаған сақинадай сәуле таратып, өмірге деген құштарлыққа бастайтын, тарихқа нұсқа болатын ерекше қолтаңба.
Бексұлтан Нұржекеев осы уақытқа дейін тек қана жазушылық қырынан ғана танылған тұлға емес. Ол ұлт руханияты үшін күресіп жүрген шынайы күрескер. Талай-талай келелі мәселелердің бастамашысы болумен қатар, қоғамдағы қайшылықтар мен жұмбақ дүниелердің шешімін айтып, рухани таластан тұратын «қызылалаңда» кесек-кесек сөздерімен, дәйек-дәлелімен ұлты үшін у ішуге баратынын көрсеткен жан. Жиындарда тілдей қағазға телміріп сөйлейтіндердей емес, бабадан дарыған ділмарлығымен ағып сөйлеп, ақиқатты ашына айтқан шешендігімен талайды тәнті етті. Тауанды тарихқа келгенде толғақты тақырыптарға тереңдеп, Орбұлақ шайқасының да қаһарман қазақтың қайсарлығын танытқан қанды ғасырдың куәсі екенін айтып, Шыңғыс қаған жайлы ақиқатқа толы ойларын алдаспандай өткір мінезімен ортаға салып, тарихымызды түгендеп, келеңсіздікті жүгендеуде де мазмұнды мақалалар жазып, оқырманның сана-сезіміне қозғау салып жүрген тұлға. Сонымен қатар, «Жазушы» баспасынан әдебиет әлеміне енгісі келген талай жастардың кітабын шығарып, оларды қанаттандырған және басқа да көптеген келелі мәселелерде ақиқаттан танбай халық үшін қызмет етіп келе жатқан қоғам қайраткері.
Рас, қоғам қайреткері ретінде атқарған игі істерін түгендеудің өзі үлкен ізденісті талап етеді. Ал оның қаламынан туындаған әңгіме, повесть, роман мен мақалаларды айтар болсақ, Бексұлтан Нұржекеевтің ең алдымен адалдықты жаны сүйетін жазушы екенін аңғарамыз. Яғни, Мұхтар Әуезов айтқандай: «Әдебиет – ардың ісі» екенін аса жауапкершілікпен сезініп, сол жолда мазасыз күндер мен ұйқысыз түндерін арнағанын ақ парақтың бетіне маржандай тізілген шығармаларынан аңғаруға болады. Сол үшін де қаламгер қауым үшін осындай ең басты қасиет саналатын көрегендік пен адалдықтың шыңына шыққан жазушы, сонымен қатар ақиқаттың ауылына ат шалдырған шыншыл тұлға деп мойындауымызға тура келеді.
Әлқисса, сөзімнің басында айтқан Бексұлтан ағаның «Жалын» баспасынан шыққан «Әй, дүние-ай» атты романы ғасырды қамтыған, қазақ халқының басынан кешкен зобалаң күндердің жиынтығына айналған туынды. Тарихи шындықтан құралған шығарма. Ұлт-азаттық көтерілісінің туын көтерген Қарқара қазақтың қасиеті де, қасіреті де болды. Қауырсын қаламын жүрегінің қанына матырып отырып, ғаламат туынды жазғанын романды оқысаңыз сіз де түсінесіз, ардақты оқырман!
Қысталаң жылдарда қынадай қырылған қазақтың бір бөлшегі – албан руының 1916 жылғы көтеріліс кезіндегі тағдыры жайлы кеңінен баяндалатын шығарманың өміршең болатынын осы бастан Күреңбай сыншы секілді болжап, айтып қойғанның артықтығы жоқ. Ақиқаттан құралған, көркем тілмен өрнектелген романның ерекшелігі – болған оқиғаны шалқымай нақ-нақ беруінде. Тіпті, Қарқара, Мыңжылқы немесе Жаркент жеріндегі жайлаулардың әр пұшпағын жақсы білетін жазушы өзге қаламгерлердей емес, табиғатты қысқаша суреттеп, елінің мұң-зарын, қасіретті тағдырын кеңінен баяндауға тырысқан. Сондықтан да шағын бөлімдерден құралған романда алты аталы албанның азып-тозғаны, саяқ құрлы сая таппай сансырап, үркіншілікке түскені аса шебер тілмен бейнеленген. Оқып отырып, бір ғана рулы елдің ғана емес, дәл сол тұстағы тұтастай қазақ ұлысы басынан кешкен нәубетті кезең көз алдыңызға келіп, көңіліңіз толқып, жанарыңызға жас үйіреді.
Роман желісі дауыл алдында бір сәт тынған теңіздей жайма-шуақ тірліктен басталады. Мұрты жаңадан тебіндеген бозбаланың толысқан бойжеткенге аңсары ауып, дәнекер-жеңге арқылы таныспаққа ұмтылып, түпкі мақсаты қалыңдық қылуды ойлаған Тазабектің серілігімен суреттелетін шығарманың әлқиссасының өзі оқырманды бірден әуелетіп әкетеді. Жастыққа тән албырттық пен сұлуға деген құмарлықты көріп, «көрінгенге көз салған арсыз көңілдің» емес, жайлаудан аққан ерке де тұма бұлақтай мөлдір махаббатқа куә боласыз. Алайда, ақ патшаның 19 бен 43 жас аралығындағы азаматтарды майдан даласына апарып, қара жұмысқа жегу туралы жарлығы мамыражай тірліктің мақамынан жаңылдырып, албан жұртының қару алуына апарып соғады. Одан ары сәт-сәтімен сабақтасқан ел өмірі шығарманы шамырқанып, шамданбай, ашынып, тасынбай оқуға мүмкіндік бермейді. «Мен, қазақпын!» деген кез келген жанның қаны қызып, жаны жаншыла отырып оқып шығарына кепілмін. Себебі, шынайы жазылған шығарма оқырманын өзімен бірге ғұмыр кешуге еріксіз жетелеп әкетеді.
Қазақ басына қаптап келе жатқан қара бұлтты іштей сезген Өмірәлінің Тазабекті үйлендіруге қам жасап, Тілеулінің мәпелеп отырған қызы Шәйіге құда түсіп, құйрық-бауыр жескен күнінен роман шарықтау шегіне жетіп, қазақ халқының аянышты тағдыры басталады. Келін алатынына көзі жетіп, көңілі сенген Өмірәлі көп ұзамай озбырлардың оғына таңылып, мерт болады да, шоқпар жонып сайланған Тілеулі аяғынан жарақат алып, дерті асқынған соң Тазабек пен Шәйіге батасын беріп, шаңырақ көтертеді. Алайда, оқып отырып жанардан жас ағызатын, іштей өшігетін тұсымыз да осы бір қуанышты да қаралы түннің оқиғасы. Бұл тұсты жазушы: «Таңға жуық тәтті ұйқының кезінде өртеген болу керек, шаңырақтың шоғы әлі сөнбепті. Тілеулі мен Әжікенді, қырғыз отыншыны үлкен үйде, Ағынтай мен бір ұл, бір қызын отаулы үйде әуелі өлтіріп, артынан өртеп жіберіпті. Тігерге тұяқ қалдырмай малды айдап әкеткендеріне қарағанда, көп адам келіп, қорықпай, аспай-саспай істеген», – деп қаралы түнді, Шәйіні мәпелеп өсірген ата-анасы, бауырларының отқа оранып, шаңырағының күл-талқаны шыққанын шебер тілмен өрнектеп, ашына жазып, мәңгілік мөрлегендей. Өйткені бұл адам қиялымен туындап, иу-қию оқиғаларға құрылған қайбір кино сценарийі емес, бұл – тарихи шындық. Ал шындықты оқып отырғанда жаныңызды шоқ үстіндегі көмбеге шыжғырғандай сезінетініңіз рас.
Дегенмен, роман оқиғасының шиеленісі әу баста, Шәйіні мал бағып жүрген жерінде екі орыстың қорлап, жазалаушылардың бейбіт жатқан ауылдарды жаныштап, қауқарсыз жан демей шал-кемпір мен жас балаға дейін қырып кеткенінен басталады. Оған:
– Ойбай, әне жатыр!
Бәрі Жомарт жаққа жалт қарады. Үйме-жүйме тоғыз өлік теңнен шашылған мүлікше теңкиіп-теңкиіп жатыр екен. Атпапты. Бірін қылышпен басынан екі-үш шапқылап, бірін мылтықтың істігімен әлденеше шаншып-түйреп өлтіріпті», – деген жан ауыртар көріністер дәлел болмақ. Дәл осы эпизодтың аяғында екіқабат әйелдің сұлап жатқанын, қолтықтан қиғаштай шапқан қылыш ішек-қарнын ақтарып, қан-жыны араласып жатқан шарана шақаны көрген Тазабектің «Жауыздар-ай», – деп ыңыранып жібергенін оқығанда, оқыстан әлдекім біреу миға ине шаншып алғандай шіміркенетінің анық. Бұл азғантай албан елінің емес, алты Алаштың басына төнген қаралы жылдардың көрінісі. Міне, осындай оқиғаларды бір-бірімен байланыстырып, аса көркем тілмен нақ-нақ суреттеген Бексұлтан Нұржекеевтің «Әй, дүние-ай» романы бастан-аяқ ақиқатпен сабақтасқан, шындықпен өрілген, шеберлікпен суреттелген сом дүние.
Әр бөлімде өрбіген оқиғаларды жеке алып қарастырсақ та жазушының дарынын даралап, шығармасы сұрапыл күштен туындағанын дәлелдеп бере аламыз. Өйткені, бірнеше томдық шығармаға арқау болатын мол дәлелдер мен дейектерді, сан кейіпкердің тағдырын бір романға сыйдырып, әр бөлімге оқырманды жетелеп отыратын оқиғаларды қиюластыру – жазушының асқан шеберлігін, қаламының қуатты екенін көрсетеді. Бұл жағынан келгенде грузин халқының басынан өткерген қысталаң жылдарын бейнелеген «Алтау мен жетінші» атты шағын әңгімесін «Жан пида» романы арқылы әлемге әйгілеген Шыңғыс Айтматовтың ерен еңбегі еске түседі. Бірақ, Айтматовтың туындысындағы осы бір әңгіме ғана батырлық пен бағландықты, тектілікті танытса, Б. Нұржекеевтің «Әй, дүние-ай» романындағы әр бөлім, әр эпизод қазақ халқының күрескерлігін, тағдыр талайына түссе де жастығын ала жастанатын қайсарлығын және қазаққа өз қандасынан асқан дос жоқ екендігін әйгілейді.
Бексұлтан Нұржекеев аталмыш шығармасында орыс халқының астамшылдығын, озбырлығын жан-жақты айта келе, айбынды Алаш жұртының қай заманда болса да ақиқаттан танбайтын, жалғандыққа қия баспайтынын, сол арқылы басқа халықтан үстем тұратындығын жеткізуге күш салған. Бұл Мәңгілікке бет алған елдің айбынын алты құрлықтан асыратын, «жаһандану дәуірінде жаһаннамға бет алғандай рухани тоқырап бара жатырмыз» деп байбалам салатындарға сабақ боларлық дүние. Әңгіме арнасын роман желісіне қарай бұрып, Бексұлтан ағаның ұлт тарихы жолында бел шеше кіріскен шығармасымен ойымды ширатайын. Жанама кейіпкердің бірі – орыс қызы Софья (Сопыйа) қазақ халқының әнін әуелетіп қана қоймай, ішкі дүниесімен де Алаш жұртына етене жақын болып кеткендігін, жазалаушылардың озбырлығы мен қанішерлігіне көзі жетіп, «мені бұдан былай орыс деп атамаңдар, мен қазақпын», – деп Қожақтың жары болғандығы шығарманың шырайын кіргізе түскен. Алайда, жалынды жазушының «Орыстың қызын әйел еткенің үшін» деп Қожақты өлтіріп, аузына өзінің қасасын тығып кеткенін Тазабектің көзімен көрсете суреттеуінің өзі, отаршыл елдің жауыздығын дәлелдей түседі. Ал кішкене ғана бүлдіршіннің артын ойып, тоңқайтып кеткен жерін ұятта болса атаусыз қалдырмауының түпкі мақсаты түсінікті. Осындай жәбір көрген елдің ұрпағы қасіретті жылдарды жан-жүрегімен ұғынсын, ер болса екінші рет жатжұрттықтарға кеудесін басқызбасын деген елдік ұстынды тебіндету бұл. Сөз шындықтан бұзылмайды. Бұл көріністер жазушының ой-қиялының жемісі емес, осы романды жазарда кірпік қақпай, көз ілмей ізденістен туындаған, бүкпесіз шындықтан құралғанын тарихын таныған кез келген оқырманның шынайы қабылдайтыны сөзсіз.
«Ақылдасамыз» деп алдап шақырып, түрмеге жауып, Жәмеңке, Ұзақ сынды батырлардың біріне у беріп, екіншісін оққа таңғанын тайға таңба басқандай тарихи деректермен байланыстырған Бексұлтан Нұржекеев тұлғаларымызды сахна бетіне жаңаша қырынан алып шыққандай. Дегенмен, шың басына шыққан жандардың өлімі де шыңнан құлаған алып қарағайдай болады екен-ау. Сол кезеңде соқыр қоғам дүмбісінің күшімен дүниеден өткен Жәлменде би баласы Пышан ақын қазасының өзі осы бір ойымызға айқын дәлел. Ал «Халқым деген Қапезде, жау ғып ұстап бердің бе», – деп итжеккенге айдалған Қапездің зары оқырманды, күллі халықты «әй, дүние-ай», деп қаншама өкіндірді десейші!
Үш тараудан тұратын (дейін, кейін, түйін) романда қуаныш пен қайғыны сәтті сабақтастырған жазушы отарлаушыларға кереғар кейіпкерлерді де атап өткен. Алайда, самсаған сары орыстың арасынан саусақпен санарлық қана жақсылар бары көрсетілген. Оның өзі тегі бір халқынан теперіш көрген – Кобзев. Үлбіретіп өсірген қызын зорлап, өлтіріп кеткен екі орыстан ала алмаған өшін Тазабектің қайтаруы, осы қарызын өмір бойы өтей алмаспын деп білген Кобзевтің көшерде үйін сыйлап кетуі, Шәйіні қорлағаны үшін екі інімді өлтірдің деп Кобзев сыйлаған баспанаға Сергейчуктің от қойып жібергені, бәрі-бәрі қаламгердің шатысқан дүниені парасаттылықпен тарқатып беруі мен асқан шеберлігінен туындаған айқын да анық көріністер.
Ал қынадай қырылып, түгесілуге шақ қалған жұрттың үдере көшкен кезінде «жау жағадан алғанда, бөрі етектеннің» керін келтірген, атасы жеңілген қалмақтардың қоқаңдауы жанға батады. Онсыз да сансырап, Қытайға барып жан сауғалармыз деп көшкен елдің малын айдап, қыз-келіншектерін өңгеріп кеткен қалмақтардың жайы романның идеялық желісіндегі жатжұрттықтардың мазағы мен қорлауына ұшыраған қазақ трагедиясын айқындай түседі. «Қазақ пен қырғызды кіріптар қылып, қалмақтың тілеуін құдай беріпті. Тау арасынан тұтқиыл шыға келіп шабуылдайды екен. Малын айдап, әдемі қыз-келіншектерін өңгеріп әкетеді екен. Сол әкеткеннен кейбірі қайтпай қалып жатқан көрінеді. Аштан өлгенше, қалмаққа қатын болайын деген шығар, бәлкім, өлтіріп тастаған шығар, анығын ешкім білмейді. Көбін бір түн асырып қайта әкеп тастайды екен. Селге аққан салындыдай не өң жоқ, не түс жоқ, сөлбірейіп қайтады екен қыздар. Жаны олжа болған соң, қалғанына көз жұмады екен бәрі. Қорғансыз жандардың төзуден өзге шарасы жоқ». Романдағы осы бір сөйлемнің өзі 1916 жылғы албандар көтерілісінің тек қана орыс пен қазақ арасындағы кескілесуден тұрмайтынын, қазақтың хәлін қырғыз ағайындардың да кешіп, екі жұрттың анталаған жаудың арасында қалғаны баяндалады. Ал басты кейіпкер Шәйінің тағдырына келер болсақ, қыз күнінде орыстан қорлық көргені аздай, үркіншілікте дәу қалмақтың қамағында қалып, зорлығына көндігуі – жазушының әйел өкініші арқылы қазақ трагедиясын биік деңгейде беруге күш салғандығы. Рас, қазақтың жастығын ала жығылатынын жоққа шығара алмаспыз. Бұл біздің тегімізде жатқан қасиет. Осы жағынан келгенде Тазабектің қос орыс пен дәу қалмақтан кек қайтарғанын, тозған жұрт пен алты шаңырақты ағайынына бас бола білгендігін жазушы назардан тыс қалдырмаған.
Жетер жерге жетіп, жанымыз аман қалды дегенде «жаңа өкімет орнады, кедейлердің күні туды», – деген желеумен азған жұртты шекарадан қайта өткізіп, 1916 жылғы қырғыннан 16 жыл өткенде қолдан жасаған аштықпен жусатып салуының өзі тарихта бедерленген оқиға. Шығарманың негізгі тарауына албандар көтерілісі арқау болғанымен, жұт, ашаршылық кездердегі халықтың әлеуметтік-тұрмысы, тіршілігі романның көркемдігін қандырып, мазмұнын тереңдетіп, тым биікке көтермесе, жанама оқиға ретінде төмендетіп тұрған жоқ. Өлместің қамымен ін бағып, тышқан аулап, оны көршілерінен, өзге ағайындарынан жасырып, түнделетіп қазанға салған Кобзев, Табай, Шәйілердің ашаршылық кезіндегі өмірін, қала берді күллі қазақтың тағдырын Бексұлтан Нұржекеев қаламгерлік қайсарлығының арқасында ұмытылмастай, өшпестей етіп тарих сахнасына көтерді. Дәл бүгінгі тойғанына секірген қоғамның кейбір кейіпкерлері осы романды оқыса, өткен тарихын санасына тоқыса, ұлттық рухымыздың аспандап, қазақ атының асқақтауына әрекет жасар еді-ау деген ой да келеді жұмыр басымызға. Жазушы: «Қытайға босып бара жатқан аш-жалаңаш жиілей бастаған соң, біреу-міреу балалардың өзін жеп қойып жүрер деп қауіптеніп, Табай өзі балаларды бастап барып тау-тасты аралап кезетін болған. Өлгелі жатып та ұятын ойлайтын қазақ тышқан жегенін бір-бірінен жасырады. Түнде қайнатып, түнделетіп жейтін... Анда-санда қоян ұстаса, күнде қоян жеп жүргендей, оны жариялап айтатын», – деп нәубетті кезеңді бір шаңырақтың тұралаған тұрмысы арқылы беруінің өзі, роман композициясындағы қазақ трагедиясын көз алдыңызға алып келіп, шығарманың идеялық желісіне жан бітірген.
Ал бірінші дүниежүзілік соғысқа арнап «Соғыс және бейбітшілік» атты төрт томдық кітап жазған Лев Толстойдай емес, 1941–1945 жылғы қырғында Шәйі мен Тазабектің қос ұлының майдан даласынан қайтпай қалуы арқылы, оймақтай оймен ойранды жылдарды жеткізе салған жазушының хас талантқа тән тегеурініне таңғалмасқа шара жоқ. Әлем елдерін әбігерге түсіріп, жанына жара салған қасіретті кезеңдегі қазақ тірлігін шағын бөлімді оқиға арқылы бере білген Бексұлтан Нұржекеев «аз жазса да, саз жазар» жазушы екендігін қайталай дәлелдеді. Ит тағдырдың талқысына көп түскен Шәйі Тазабектен ерте айырылып, сұрапыл соғыстан қайтпай қалған қос ұлының қазасына шыдады-ау. Алайда, перзент сүймеген кенже ұлының жас келіншегі ойнастықпен бала тауып, оны Шәйіге тастап көлденең көк аттымен қашып кеткені – қаралы жұрттың қабырғасына бататын қасіреттің бір ғана бейнесі, көрінісі. Келінім неге бұлай істеді деп кінә тағуға Шәйінің құқығы жоқ. Өлген өлді. Тірі тіршілігін істеу керек дегенді меңзеген, қысталаң уақыттың салмағын жан-жүйесімен сезінген жазушы қазақ тағдырын осындай аянышты оқиғалар арқылы еркін баяндаған. Бұл да шығарманың шырайын келтіріп, айшықты етіп, мазмұнына мән беретін – Мәңгілік Елдің өткен ғасырдағы қасіретті кезеңінің жарқын көрінісі.
Сонымен қатар Бексұлтан Нұржекеевтің «Әй, дүние-ай» романында қазақ халқының ділмарлығын, шешендігін, айтқыштығын көрсететін мақал-мәтел, нақыл сөздер суреткерлік шеберлікпен көркем түрде үйлесімді қолданылған. Дарынды жазушы Асқар Сүлейменов жайлы қалың оқырманның аузынан: «Қазақ даналығына көп үңілген жазушының өзгеден озық тұратын жері – сөзді ойната білуінде. Мысалы, «Кәрі қойдың жасындай жасым қалды» деген теңеуді «Саба түбі сарқынды жасым қалды» деген баламамен беруі», – деген бір ғана пікірін талай естіп, көкейге түйіп жүруші едік. Ал Бексұлтан Нұржекеев бұл жағынан келгенде әр сөзіне талғампаздықпен қарап, мақал-мәтелдердің мәндісімен ойын түйіндей білген. Диалог, монолог барысында әр кейіпкердің аузына «Жақсының бір аты бар залым деген, жаманның бір аты бар момын деген», «Жапалақты таспен ұрсаң да жапалақ өледі, жапалақты тасқа ұрсаң да жапалақ өледі», «Екіауыз біріксе, бірауыз жоқ болады» немесе «Қара жердің өлгені – қар астында қалғаны» сынды мәнісі терең, мағыналы сөздерді қолдану арқылы ғұмырлық шығарманы айшықты ете түскен. Сонымен қатар, Софья, Қапез, Пышан, ашаршылықта көз жұмған Қапездің шәкірті Қаратай сынды, арғысы Көдектердің әнін қазақтың талайлы тағдырымен сабақтастыруының өзі, жан-жүйені босатар, «Елім-айлап» еңіретер шығарма екенін дәлелдей, нақтылай түседі. Тарихта әнші һәм ақындық атымен қалған Софьяның:
Жайлайды Іле бойын албан, суан,
Қуғаны қысы-жазы қызық-думан.
Қытайға бас сауғалап босып жатыр,
Орыстың озбырлығы – бәрін қуған.
Болғанмен затым орыс, жарым – қазақ,
Ол тартқан маған да ортақ мұң мен азап.
Орыстан қазақ қашса, мен де қашам,
Қазақтың келіні деп қылар мазақ, – деп әндете айтқан ақық туындысы жазушының шеберлігі әбден толысып, кемерінен асқанда терең зерттеп, әр нәрсені зерделеп барып жазған шығармасының шұғыла шашар, шырайын кіргізер эпизодтары екеніне дәлел.
Үш тараудан тұратын бұл романның «Түйінінде» Шәйінің өткенге ой жүгіртіп, бір әулеттің арқа сүйер тірегі, қазыналы қарты болуы баяндалған. Жазушының тілімен айтқанда «темір өзек кемпірдің» қасіреті көп те, қанағаты аз ғұмыры кино лентасындай көз алдынан тізбектеліп өтіп, жалған дүниеге жалқы рет ғана шүкіршілігін айтуымен тиянақталған.
Әдетте қаламгерлердің шығармасына дендеген кезде, ол жайлы пікір айтқанда, «бұл туындының негізгі тақырыбы мына оқиға», – деп ашып айтып, қалғанын жанама эпизодтар мен қосымша оқиғалар қатарына жатқызатын едік. Ал сексен мен жетпістің бел ортасында 1916 мен 1991 жылдар аралығындағы тарихи оқиғаларды қамтығаны ғажайып шығарманның асылы мен нәсілі мына бір кезең еді деп атай алмайсың. Ғасырға жуық аралықты бейнелеген туындының қабырғасын қалаған әр кезең де қазаққа қасірет әкелген зобалаңды жылдар. Бұл қасіретті оқиғалар романның негізі тақырыбы, өзегі бола білген. Олар: 1916 жылғы албан көтерілісі, сол ғасырдың 20-30-шы жылдардағы Азамат соғысының дүрбелеңі, қолдан жасалған ашаршылық кезең, Саяси қуғын-сүргін тұсы, Ұлы Отан соғысының қасіреті мен 1986 жылғы Желтоқсан көтерілісі.
Желтоқсан демекші, «Қазақстанды қазақ басқарсын», – деп алаңға шыққан жастардың арасында болған Кәусеннің өлімі, әже жүрегін қақыратып, Шәйіні аурухана төсегіне таңады. Темірөзек кемпірдің жығылғаны қыршын кеткен немересінің аянышты хәлінде жатыр. Кезінде орыс пен қалмаққа арын тонатқаны аз болғандай, енді келіп немересін де жазалаушылардың зорлап, ұрып-соғып өлтіргені бас кейпкердің өлімін жақындатқандай. Талай азапты бастан кешіріп, халықтың сауатын ашу үшін ұстаздық қызметті де атқарған, үйленген күні ата-ана, ағайынынан ажырап, Тазабекті оққа таңғаны, соғыста қос перзентінен айырылғаны аз болғандай, Кәусенін кебінге орап өзі жоқтау айтқан Шәйінің тағдыры шынымен аянышты. Бұл шығармадағы кейіпкердің ғана басындағы мұң мен зар емес, мұқым елдің мұңы екені ақиқат. Кезінде қылықты қыз болған Шәйіден қаусаған кемпір болған Шәйі арқылы қазақ ұлысының бір ғасырда көрген зобалаңын байқауға болады. Ал ащы ақиқатты естуден жеткізудің жолы ауыр екені белгілі. Сондықтан да, осындай тәуекелге барып, өткен жайлы өшпестей із қалдырған Бексұлтан Нұржекеевтің қаламгерлік қайсарлығын мойындаған абзал...
Тәуелсіздіктің таңы атып, Қазақстанның тұңғыш Президенті Нұрсұлтан Назарбаев болғанын
естіген Шәйінің «Құдай бар екен ғой!» деп шүкіршілік айтып, жан тапысыруымен романның нүктесі қойылған. Бүгінде кейуананың шүкіршілігін кемеңгер елдің ұрпағы сәт сайын айтып келеді. Ел Тәуелсіздігінің 25 жылдығы мен Ұлт-азаттық көтерілісінің 100 жылдығына арналған «Әй, дүние-ай» романы жай ғана көркем шығарма емес. Бұл қайсар елдің жүрегіне өшпестей сызат салған, тарихта мәңгі қалған, азап пен мазақты бастан кешкен қазақтың азаттық алған күніне дейінгі аралықты қамтыған – тарихи-тәлімді туынды. Ғажайып оқиғалалармен көмкерілген, парасаттылықпен пайымдалған Бексұлтан Нұржекеевтің «Әй, дүние-ай» романы Қазақстан Республикасының Мемлекеттік сыйлығын алуға әбден лайықты шығарма екені даусыз. Ал шындығына келсек, танымы терең, талғамы зор, рухы биік жазушының аталмыш романы бірнеше мыңжылдықты артта қалдырып, бүгін еркін ел атанып, Ұлы Дала иесі екенін ақ әлемге жасқана емес, жалындата айтып, Мәңгілік Елге көшін бағыттаған қайсар жұрттың ерен ерлігіне зерделі сөз, көркем оймен құйылған, бағасы саф алтыннан да қымбат ескерткіш деп бағалауымыз заңды.
Осындай әділ бағаны кез келген көркем дүниенің өресін бұлтақсыз безбендей білер қалың қара ормандай оқушы қауымы алдымен айтып отыр.
Асыл Сұлтанғазы