БЕЙСЕН ҚҰРАНБЕКТІҢ СӨЗДЕРІ БІРАЗ ЖЫЛДАН КЕЙІН АФОРИЗМГЕ АЙНАЛАДЫ

Уақыты: 09.12.2020
Оқылды: 2769
Бөлім: ЖАНСАРАЙ

Жетісуда кіндік қаны тамған танымал тележурналист, халықтың қалаулы ұлы Бейсен Құранбек тірі болғанда 9 желтоқсанда туған күнін дүркіретіп атап өтер ме еді?! Әттең, бір кем дүние... Сол қуанышты көру маңдайына жазбады.

«Өмірдің өлшемі – Өлім! Кімнің кім екені өлгенде белгілі болады» деп өзі айтпақшы, Бейсен ағамыздың осы сөзінің ақиқаттығына бүгінде көз жеткізудеміз. Өмірден өзі кетсе де оның айтқан сөздері, философиялық ой-тұжырымдары өміршең екенін уақыт дәлелдеуде.

«Көңіл дейтін өте нәзік, адам деген өте қымбат, өмір деген өте қысқа» деген сөзінің өзінде біз күнделікті тіршілікте мән бере бермейтін қаншама құндылық жатыр?! Бейсен ағамыз жасаған отбасының жеті қағидасы да жас отбасыларға табылмайтын бағыт-бағдар деп білемін. Одан бөлек, жас ұрпақ тәрбиесіне қатысты, жалпы өмір туралы тұжырымдары болашақта да ұлт мүддесіне қызмет ете бермек.

Бұл сөздер біраз жылдан кейін афоризмдерге айналуы да әбден мүмкін. Өйткені, Бейсен ағаның әрбір сөзінің мағынасы терең, құндылыққа толы. Сол себепті, Бейсен аға туралы ғылым өмірге келуі қажет деп білемін. Бұл жалындап келе жатқан жастардың көпшілігінің тілегі. Солардың бірі өзім Бейсен ағамыздың ұмытылғанын қаламаймын. Күні кеше өткен қалалық «Дарын» ғылыми жоба байқауында Бейсен ағамыздың өмірін зерттеп, жүлделі 2-орынды иелендім. Бұл менің бейсентануға басқан алғашқы қадамым.

Алдағы үлкен мақсат – Бейсен ағамыздың журналистік жолы мен қалдырған мұраларын зерттеп, халыққа жеткізу. Қазақ барда жалынды журналист Бейсен Құранбектің аты өшпейді, керісінше, уақытпен бірге ол туралы естеліктердің құндылығы арта түседі деп білемін. Жүргізген телебағдарламалары естелік мұра болып халық жүрегінде қалды. Бейсен ағамыздың жолын жалғау бізге парыз. Бұл ойымды барлық қазақ жастары қолдайды деп ойлаймын.

Әйгерім ЕСІМХАН,

№ 12 орта мектеп-гимназиясының 10-сынып оқушысы

Талдықорған қаласы