Оқи отырыңыз
Қапшағай қаласының әкімі Талғат ҚАЙНАРБЕКОВ халық алдында қорытынды есебін берді. Кездесуге облыс әкімінің орынбасары Жеңіс ТҰЯҚОВ қатысты.
Күн тәртібіндегі мәселе бойынша баяндама жасаған қала әкімі Талғат Қайнарбеков өткен жылдың жемісті болғанын айтып, ағымдағы жылға бекітілген жоспармен бөлісті.
– 2018 жылдың 11 айында қаланың әлеуметтік-экономикалық тұрғыда дамуы өңірдің 2016-2020 жылдар аралығына арналған Даму бағдарламасына сәйкес жүзеге асырылды. Өткен жылдың 11 айында бюджетке түскен салықтар мен басқа да міндетті төлемдер белгіленген межеден асып түсті. Жұмыс 100,4 пайызға орындалып, өсу қарқыны 126,8 пайызға жетті. Одан бөлек, республикалық бюджетке болжамда белгіленген 16184,9 млн. теңгенің орнына 16170,8 млн. теңге қаражат түсіп, жоспар 99,9 пайызға орындалды. Бұл 2017 жылдың осы мерзімімен салыстырғанда 140,4 пайызды құраса, жергілікті бюджетке түсетін салықтар жоспары 102,4 пайызды құрады, – деген Талғат Қанатұлы баяндамасын бюджеттік саладан бастады.
Сондай-ақ, өңір басшысы өнеркәсіп, ауылшаруашылығы, тұрғын үй-коммуналдық шаруашылығы және көркейту, қаланың өнеркәсіптік орындары, құрылыс, әлеуметтік сала, білім мен денсаулық, мәдениет, спорт және туризм салалары мен қоғамдық тәртіп бағыттарында атқарылған жұмыстарға жеке-жеке тоқталды. Атап айтар болсақ, өнеркәсіп бағытында өткен жылы жалпы сомасы 60587,5 млн. теңгеге өнім өндірілген. Ал ағымдағы жылға жоспарланған көлем – 70000,0 млн. теңге.
Есептік кезең қорытындысы бойынша «Кнауф Гипс Қапшағай», «Полимерметалл-Т», «Пеноплэкс», «Магнетик», «АЯМ» жауапкершілігі шектеулі серіктестіктерінің өндіріс көлемі жоспарда бекітілгеннен асып түскен. Сонымен қатар, макарон өнімдерін өндіретін «Маревен Фуд Тянь-Шань» ЖШС іске қосылды. «ВЭС Сарыбұлақ», «ВЭС Кербулак» жел электр стансысы да өз жұмысын бастады. Жыл басынан бері өнеркәсіп саласында жаңа ашылған кешендер мен бұрынғыларын кеңейту есебінен 468 жұмыс орны ашылды.
Қала тұрғындарының игілігі үшін 238 көпқабатты үйдің құрылысы жүргізілуде. Одан бөлек, Қапшағай қаласында 50 пәтерлік несиелік тұрғын үйдің құрылысы аяқталып, қолданысқа берілген. Баспаналарға инженерлік коммуникациялық жүйелер де тартылған. Шағынаудан алаңдарын көркейту жұмыстары жалғасып, 373,2 млн. теңгеге 1, 2, 3-шағын-аудандарда барлығы 38 алаң қалпына келтірілді. Бұл туралы Т. Қанатұлы:
– Өткен жылы атқарылған құрылыс жұмыстарының сомасы 7161,2 млн. теңгені құрады. 15,9 мың шаршы метр тұрғын үй пайдалануға беріліп, 2019 жылы 16,2 мың шаршы метр тұрғын үй салу жоспарлануда. Бүгінде барлық құжаттамалары дайын. Қалада 900 орынды мектеп құрылысының жобалау-іздестіру жұмысы әзірленді. Мемлекеттік тапсырысты орындау мақсатында қаңтар айында Қапшағай қаласында 150 орынды «Нұр-бөбек», 45 орынды «Балбөбек» жекеменшік балабақшасы мен Кербұлақ ауылында 20 орынды «Көркемай» балабақшалары ашылды. Барлығы 2895 бала мектепке дейінгі оқыту және тәрбиелеумен қамтылды, – деді.
Өңірде жұмыссыздар санын азайтуда жұмыспен қамту бөлімінің атқарған жұмыстары зор. Былтыр 2070 азамат жұмыссыз ретінде тіркелсе, оның 1325-і жұмысқа орналастырылған. Сонымен қатар, 2521 жаңа жұмыс орны құрылды.
Баяндама аяқталғаннан кейін тұрғындар өздерін толғандырған мәселеге қатысты сауалдарын қойды. Сұрақтардың басым бөлігі қалада жаңа мектеп, мүмкіндігі шектеулі балаларды оңалту бағытында орталық, автобекет, Мәдениет үйін салу, коммуналдық қызметке төленер төлемдер мөлшерінің азаюы төңірегінде қойылды. Қала басшысы қойылған сұрақтарға жан-жақты жауап беріп, тиісті мекеме басшыларына мәселені шешуді тапсырды.
Жиын соңында өңір басшысының бір жыл көлемінде атқарылған жұмысы оң бағасын алып, көптің көңілінен шықты.
Қуат ҚАЙРАНБАЕВ.
