Оқи отырыңыз
Жетісу облысындағы тұтас бір ауыл қоқыс полигонының зардабын тартып отыр. Өйткені, Ақжар елдімекенінің дәл іргесінде тұрмыстық қалдықтарды тастайтын аумағы 5 гектарға жуықтайтын жер бар. Тау болып үйілген қоқыстың арасына мал өлекселері де тасталады екен. Соның кесірінен ауаға жағымсыз иіс тарап, қарашаның тынысы тарылады. Бұқара бұл мәселе 5 жылдан астам уақыт әлі шешімін таппады деп қапалы.
Бұл туралы "7-su.kz" желілік басылымы 31-арнаның Информбюро жаңалықтар бағдарламасы дерегіне сүйеніп хабарлайды.
Қоқыс полигоны ауылдың дәл іргесінде орналасқан. Үш ауылдың халқы дәл осы жерге тұрмыстық қалдықтарын төгуге мәжбүр. Себебі, арнайы орын жоқ. Тау болып үйілген қоқыстан күн жылынғанда жағымсыз иіс шығып, тынысымыз тарылады дейді тұрғындар. Бұл мәселе ақжарлықтардың бас ауруына айналғанынан бес жылдың жүзі болған. Ауыл жұрты ат шаптырым аумаққа малдың өлексесін лақтырып кететіндер көбейді деп қынжылады.
"Бұл мусор пәлембай жыл бізге жара болды. Ауылдың әкіміне де, районға да айттық. Мына көктемде мына қар ериді, өлексе көріп тұрсыздар ғой. Трассаға дейін жүз-ақ метр, салафан бәрі ұшады", - дейді Ақжар ауылының тұрғыны Серік Байсалбаев.
Осылайша бұл түйіткілді мәселеден ауыл-аудан әкімдігі де хабардар деген ауыл азаматтары ол жерді жеке шаруа иеленіп алған дейді.
"Көрдіңіздер өздеріңіз, қоқыс төккен жерді. Осының бәрі сасып, ауылды ластайды. Шошқадан тартып, түгел осы жерде. Жазда мына жер сасиды да, өзенге құяды. Енді қайда апарамыз басқа? Ана жақта орын бар болатын, ол жерді ашпайды. Жеке шаруа иеленіп алған. Тірі жанды жолатпайды, енді қайда апарамыз?", - дейді Ақжар ауылының тұрғыны Қиса Хәбиден.
Ұлардай шулаған жұрт қоқыс полигонын басқа жаққа көшірсін деген талаппен әкімдіктің табалдырығын талай тоздырған. Әзірге ешқандай нәтиже жоқ. Ал, ауылдық округтің әкімі тұрғындармен келіспейді. Атқамінер тұрмыстық қалдық тастайтын орынның заңды екенін айтады. Тиісінше, айналасын жиі тазалап, жинап отырмыз дейді.
"Ол жердің орналасуы санитарлық талаптарға сай келеді. Ал, мына мал өлекселерін тастайтын орын бар бізде. Ол адамның өзінің кінәсі ғой, оны біз шамамыз келгенше тазалап, обслуживание жасаймыз", - дейді Ақжар ауылдық округінің әкімі Елес Жапарғалиев.
Қазір бұл полигонның аумағы 5 гектардай жерді алып жатыр. Қараша көктемде от тұтанса маңайдағы орман мен басқа да нысандарға қауіп төнуі мүмкін деп дабыл қағады. Бұдан бөлек улы заттар адам денсаулығына зиян келтіреді деп қынжылады.
