ОҚУ ЖЫЛЫНЫҢ АЯҚТАЛУЫ: ІІМ ТҮЛЕКТЕРГЕ ҮНДЕУ ЖАСАДЫ

Уақыты: 22.05.2024
Оқылды: 358
Бөлім: КҮНДЕРЕК

ІІМ түлектер мен олардың ата-аналарына үндеу жасады, - деп хабарлайды Polisia.kz.

"Құрметті ата-аналар мен түлектер! 25 мамырда еліміздің барлық мектебінде оқу жылының аяқталуына арналған сынып сағаттары өткізіледі. Салтанатты іс-шаралар барысында полиция органдары қоғамдық тәртіп пен жол қауіпсіздігін қамтамасыз ету бойынша барлық шараларды қабылдайтын болады. Ішкі істер министрінің тапсырмасы бойынша әрбір оқу орнына жауапты полиция қызметкері бекітілді. Патрульдік нарядтар іс-шаралар өткізілетін орындарға барынша жақын болады", - делінген хабарламада.

ІІМ мәліметінше, соңғы жылдардағы тәжірибеге сүйенсек, мектептердегі "соңғы қоңыраулар" аяқталғаннан кейін ата-аналардың рұқсатымен көптеген түлектер іс-шараларды өз бетінше жалғастырады. Өкінішке қарай, жасөспірімдердің көлік тізгіндеуі қайғылы оқиғаларға әкеліп жатады.

Былтыр мұндай деректер Жамбыл, Атырау облыстары мен Алматыда болған. Одан бөлек, ата-аналардың бақылауынсыз балалар тыйым салынған жерлерде суға түсіп жатады. Былтыр Ақмола, Маңғыстау және Атырау облыстарындағы су айдындарының шомылуға жабдықталмаған жерлерінде жасөспірімдердің суға кету жағдайлары тіркелгені айтылды.

"Осыны ескере отырып, ата-аналар мен түлектерді мінез-құлықтың қажетті нормалары мен ережелерін сақтауға шақырамыз. Құқық бұзушылықтар анықталған жағдайда дереу 102 арнасына, ал төтенше жағдайлар туындаған кезде 112 нөміріне хабарласуды сұраймыз", – деді департамент бастығы – ІІМ ресми өкілі Шыңғыс Алекешев.

Фото ©️ Тұрар Қазанғапов