Қазақстанның ішкі істер министрлігі мемлекеттік тіркеу нөмірлік белгілерінің формасы мен үлгілеріне қатысты бұйрыққа өзгерістер енгізді, – деп хабарлайды 7-su.kz ақпараттық порталы inbusiness.kz сайтына сілтеме жасап.
Жаңашылдықтар екі бағытты қамтиды: мемлекеттік нөмірлердің әріптік серияларын кеңейту және жаңадан құрылған облыстардың цифрлық кодтарын ресми бекіту. Өзгерістер негізінен мототранспорт пен тіркемесі бар көлік иелеріне қатысты. Бұған дейін шетелдік қатысуы бар заңды тұлғалар, шетелдік азаматтар мен азаматтығы жоқ тұлғаларға тіркелген көліктер үшін тек Н және F сериялары қолданылса, енді олардың қатары алтыға жетті. Оған Н, F, G, I, J және K әріптері енгізілді.
Бұл қадам көлік санының артуына байланысты қолданыстағы әріптік және цифрлық комбинациялардың таусылуынан туындап отыр. Дегенмен, жеңіл және жүк көліктері үшін F сериясы өзгеріссіз қалды. Жаңа әріптік сериялар тек мотоцикл, мотороллер, тіркемелер мен жартылай тіркемелерге арналған.
Сондай-ақ барлық автокөлік иелері үшін маңызды өзгеріс бекітілді. 2022 жылы Абай, Жетісу және Ұлытау облыстары құрылғанда оларға тиісінше 18, 19 және 20 кодтары тағайындалған еді. Алайда, бұл кодтар іс жүзінде резервте сақталып келді. Ендігі бұйрықта 18 коды – Абай облысына, 19 коды – Жетісу облысына, ал 20 коды – Ұлытау облысына ресми түрде бекітілді.
Министрлік құжаттағы терминологияны да жаңартты. Заңнамаға сәйкестендіру мақсатында «шетелдіктер» деген сөз «шетелдік азаматтар» деген анықтамамен ауыстырылды. Жаңа ережелер маусым айының соңынан бастап күшіне енеді. Әкімшілік полиция комитеті бұл бұйрықтың орындалуын және мемлекеттік тіркеуден өтуін қамтамасыз етеді.
Мұндай өзгерістер көлік құралдарын тіркеу процесін оңтайландырып, азаматтар үшін қолайлы жағдай жасауға мүмкіндік береді.
