Алакөл ауданында жас спортшылар мен әуесқойлардың басын қосқан волейболдан ерлер арасында аудандық чемпионат аяқталды, – деп хабарлайды 7-su.kz ақпараттық порталы.
Жарысты Алакөл ауданының ішкі саясат, мәдениет, тілдерді дамыту және спорт бөлімі мен Жетісу облысының бұқаралық спортты дамыту бөлімі және спорттық іс-шараларды өткізу клубы КММ-нің Алакөл аудандық филиалы бірлесе ұйымдастырды.
Спорттық бәсеке Қарабұлақ спорт кешенінде өтті. Додаға Үшарал қалалық округінен, сондай-ақ Жыланды, Екпінді, Көлбай, Үшбұлақ, Қарабұлақ, Еңбекші, Жайпақ, Қайнар және Көктұма ауылдық округтерінен жиналған 10 команда қатысты.
Жалпы алғанда 100-ден астам спортшы алаңға шығып, жоғары дайындық пен жеңіске деген жігерін көрсетті. Тартысты ойындардың қорытындысы бойынша жүлделі орындар келесідей бөлінді:
-
1-орын: Қайнар ауылдық округінің командасы;
-
2-орын: Үшарал қалалық округінің командасы;
-
3-орын: Жайпақ ауылдық округінің командасы.
Үздік шыққан командалар мен жүлдегерлер арнайы кубоктармен, медальдармен және мақтау қағаздарымен марапатталды. Сонымен бірге чемпионат барысында шеберлігімен танылған ойыншылар ауданның құрама командасына іріктелді. Олар енді облыстық бәсекеде аудан намысын қорғайтын болады.
Ауылдық аймақтарда мұндай турнирлерді жиі өткізу – өңірдегі бұқаралық спортты жаңа деңгейге көтерудің негізгі тетігі. Жастардың салауатты өмір салтын ұстануына, бос уақытын тиімді әрі пайдалы өткізуіне спорттық инфрақұрылым мен жүйелі жарыстар тікелей ықпал етеді.
Жергілікті деңгейдегі командалық ойындар ауылдар арасындағы достық байланысты нығайтып, жас таланттардың үлкен спортқа қадам басуына жол ашады. Аудан ішінен іріктелген мықты спортшылар облыстық жарыстарда бақ сынап, кәсіби шеберлігін шыңдай түседі.
Алдағы 22-26 шілде аралығында Алакөл ауданында волейболдан ерлер арасында Жетісу облысының чемпионаты өтеді. Жерлестерімізге алдағы маңызды додада жеңіс пен сәттілік тілейміз!
