Қазақстанның бірінші ракеткасы Елена Рыбакина АҚШ ашық чемпионатының (US Open-2026) финалына жолдама алды. Қазақстандық теннисші жартылай финалда әлемнің төртінші ракеткасы, америкалық Коко Гауффты жеңді, – деп хабарлайды 7-su.kz ақпараттық порталы.
Кездесу үш сетке созылып, 3:6, 6:4, 6:4 есебімен Рыбакинаның пайдасына аяқталды. Теннисшілер хард кортта 2 сағат 8 минут ойнады.
Матч барысында Елена Рыбакина бес эйс жасап, екі рет қос қателік жіберді. Сондай-ақ бес брейк-пойнттың үшеуін тиімді пайдаланды.
Финалдағы қарсыласы – Арина Соболенко
Осы жеңістен кейін Елена Рыбакина мансабында алғаш рет US Open турнирінің финалына шықты. Шешуші кездесуде қазақстандық теннисші әлемнің бірінші ракеткасы, Беларусь өкілі Арина Соболенкоға қарсы ойнайды.
Айта кетейік, Рыбакина бұл нәтижесімен әлемдік рейтингте бірінші орынға шығуды да қамтамасыз етті. US Open-2026 турнирінің қорытындысы бойынша қазақстандық спортшы рейтингтің көшін бастайды.
Жаңартылған WTA рейтингі 14 қыркүйек, дүйсенбі күні жарияланады.
