Әзербайжанда өткен Guba Open 2026 халықаралық шахмат турнирінде Қазақстан құрамасының өкілдері әйелдер арасында үздік нәтиже көрсетіп, ел қоржынына кезекті беделді марапаттарды сыйлады, – деп хабарлайды 7-su.kz ақпараттық порталы 24.kz сайтына сілтеме жасап.
Губа қаласында 4-10 қыркүйек аралығында ұйымдастырылған 2nd International Chess Festival халықаралық фестивалі әлемнің 11 елінен жиналған 76 шебердің басын қосты. Олардың қатарында 6 гроссмейстер мен 10 халықаралық дәрежедегі шахматшы бақ сынады. Тартысты бәсекеде отандық спортшылар жоғары шеберлік пен тактикалық дайындық танытты.
Өте тартысты өткен интеллектуалды бәсекеде 15 жастағы отандық шахматшы Мария Холявко әйелдер арасында дара шығып, бірінші орынды жеңіп алды. Ол тоғыз өрбіген партияның қорытындысы бойынша 6 ұпай еншіледі. Мария жарыс барысында бес қарсыласын тізе бүктіріп, екі кездесуді тең аяқтады. Жалпы заңды есепте де жас дарын 5-13 орындарды өзара бөліскен спортшылардың қатарына еніп, қосымша көрсеткіштер бойынша 12-орынға тұрақтады.
Еліміздің тағы бір өкілі, 19 жастағы Аяулым Қалдарова жарысты 5 ұпаймен аяқтап, әйелдер арасындағы екінші орынды иеленді. Қос отандық шахматшымыздың бұл жетістігі – отандық шахмат мектебінің халықаралық аренадағы бәсекеге қабілеттілігін тағы бір мәрте дәлелдейді. Үздік үштікті Әзербайжан өкілі Лала Гусейнова түйіндеді.
Аталған зияткерлік доданы Әзербайжан шахмат федерациясы мен «Ağ Top» шахмат клубы бірлесіп ұйымдастырды. Халықаралық турнир Губа қаласындағы шахмат мектебін ұзақ жылдар бойы жемісті басқарған беделді төреші Гудрат Исмаиловтың құрметіне арналған. Жалпы жарыс қорытындысы бойынша бірінші орынды 7 ұпай жинаған әзербайжандық Мисратдин Искандаров пен Вугар Манафов өзара бөлісті.
Қазақстан шахмат федерациясы соңғы жылдары жас дарындарды қолдау мен халықаралық турнирлерге жіберу жүйесін белсенді жолға қойып келеді. Мария Холявко мен Аяулым Қалдарованың бұл табысы – жүйелі еңбек пен табандылықтың оң нәтижесі. Жастардың мұндай халықаралық жеңістері елімізде бұқаралық спортты дамытуға, әсіресе қыздар арасында шахмат ойынын кеңінен насихаттауға серпін береді.
