Қазақстан ұлттық құрамасының өкілі Санжар Әділов Жапонияның Айти–Нагоя қалаларында өтіп жатқан XX жазғы Азия ойындарында қола жүлдеге ие болды, – деп хабарлайды 7-su.kz ақпараттық порталы.
Отандық спорт тарихында айтулы оқиға орын алды. Қазақстандық спортшы ММА-дың дәстүрлі стилі бойынша 65 келіге дейінгі салмақ дәрежесінде жүлдегер атанды. Бұл жетістік ел қоржынына кезекті медальды салып қана қоймай, спорт жылнамасына алтын әріптермен жазылды.
Аралас жекпе-жек өнері Азия ойындарының бағдарламасына алғаш рет енгізіліп отыр. Санжар Әділов осы халықаралық додада ММА бойынша жүлде иеленген тұңғыш қазақстандық спортшылардың бірі ретнде тарихқа енді. Жоғары дайындық пен мықты жігердің арқасында отандасымыз Азияның ең үздік жекпе-жек шеберлерімен тең дәрежеде өнер көрсетіп, ел намысын абыроймен қорғап шықты.
Аталған дода құрлықтағы ең беделді спорттық жарыстардың бірі саналады. Дүбірлі бәсеке 19 қыркүйек пен 4 қазан аралығында Жапонияның Айти–Нагоя аймағында өтуде. Қазақстан құрамасы үшін бұл жарыс үлкен сынақ әрі өз шеберлігін әлемге паштаудың бірегей мүмкіндігі.
Спорт саласын дамыту мен жас спортшыларды қолдау елімізде жүйелі түрде жүзеге асырылып келеді. Мұндай халықаралық жетістіктер жастар арасында салауатты өмір салтын насихаттауға, жекпе-жек өнеріне деген қызығушылықты арттыруға зор серпін береді. Отандық спортшылардың әлемдік аренада бақ сынауы еліміздің спорттық инфрақұрылымын ары қарай жетілдіруге әрі жаттықтырушылар құрамының кәсіби деңгейін көтеруге жол ашады.
Санжар Әділовтің бұл жеңісі – бүкіл елдің, бапкерлер ұжымының және жанкүйерлердің ортақ қуанышы. Қазақстан құрамасының өзге де өкілдері алдағы бәсекелерде жоғары нәтиже көрсетеді деген сенім мол.
